يوم من عمري

واحد طلع من بيتهم كاشخ رايح عرس رفيجة.. تبخر وتعطر وركب سيارتة متجة للبنك بيسحب فلوس وتالي بروح العرس

واول ما وصل لمكينة السحب اكتشف إن بوكة ناسية بالبيت..ورجع للسيارة وهو جدام السيارة رن التيليفون وحط ايدة اب مخباتة بطلع التيليفون والمفتاح بوقت واحد واول ما قال الوو طاح التيليفون وياي يلحق علية قبل لا يوصل الارض ومن التدوده طاح المفتاح.. ليهني وماكو اي مشكلة..

لكن المشكلة إن التيليفون طاح تحت السيارة وكان اكو بالوعة (وانتوا بكرامة) وطاح فيها!! والمعظلة إن المفتاح طاح وتدرفع لين وصل لتحت السيارة بالنص .. وما يقدر يجندس بكشختة.. ولو جندس.. إيدة ما توصل لنص السيارة... ولا يقدر يتصل على السايق او اي احد اييبلة السبير ..فكر وما لقى حل..حاول ايب أخشبة طويلة ولكن مالقى بالجمعية أي أخشبة....

لا تليفون ولا مفتاح ولا بوك يعني حتى مايقدر ياخذ تاكسي!!

وراح يتصل تيليفون من داخل الجمعية وبعد ربع ساعة وصل له السبير ورجع قري واخذ مفتاحة وسحب فلوس وراح العرس

حسبالكم خلصت السالفة؟؟

لا طبعا اليوم كان كلة قبّس!!

اول ما وصل العرس صفط سلم على المعرس وطلع ويتفاجأ بأن سيارتة مسكرة عليها سيارة وما يقدر يطلع وبعد مرور ثلث ساعة تقريبا تأتي صاحبة السيارة (إتزنقح) وتقول :(( ويييييييييييييييييي؟؟!! صاكين عليك؟؟؟ ههههههه السموحة!!))
تصوروا يا إخوان ويا أخوات مدى برود هذي المرأة ومدى حرارة الولد اللي من بداية اليوم وهو متعكنن!! طبعا ما كلمها بس قالها ترى عيب والله عيب اللي قاعد اتسوينة تبين أصك عليج الحين واعطلج ثلث ساعة؟؟!!
جان ترد علية: ويييي اشصاير عاد انا شفتك صافط قلت هذا اكيد رايح العرس وبطول وقلت انا شغلتي 10 دقايق .. اروح واخلصها واهو ما طلع!! مامداك اتسلم!!
تصوروا ... تقول ممداك اتسلم!!! وانتي شكو؟؟؟؟ اشعليج ؟؟
عموما اهو شاف الحوار ماراح اييب نتيجة بلعها ومشى..
وقرر أنة يروح المطار عشان ياخذ تيليفون وتشب ويعيش مثل الاوادم...وصل الحبيب للمطار وصفط ونزل للمطار ودخل وأخذ رقم ونطر دور لمدة نص ساعة علشان ياخذ التشب ولما وصل دورة قالة الموظف عطني البطاقة المدنية
دخل إيدة الحبيب بجيبة ومالقى البوك وراح السيارة وما لقى البوك.... البوك البووووووك وييين البووووووووووووووووووك!!!

وبعد تفكير عميق تذكر أنة وهو صافط عند الفندق بالعرس مر واحد رفيجة ومن زمااااااان ماشافة وقعد يسولف معاة ورفيجة يسألة عن الشغل و بالصدفة أكتشف أنة يحتاجة في شغل (اي الصديق يحتاج صاحبنا بشغله مهمة ) وقالة عطني كرتك وصاحبنا فتح البوك وهو يسولف وعطاة الكارت وخلى البوك فوق السيارة لانة قعد يكتبلة رقم الموبايل على الكارت فوق السيارة

ولما خلص جود (المسعدة )اللي صاكة علية وصلت ونسى البوك مع حديثة معاها.. وعصب ومشى والبوك فوق السيارة وأكيد طاح!!
وطبعا اختربت جميع محاولات الذهاب للديوانية أو لأي مكان وكان لا بد لوضع حد للنحس الملازم لهذا الولد في هذا اليوم..
فقرر إنة يرد البيت وكانت الساعة قد شارفت على التاسعة مساء.. وصل البيت واتصل على البنك وأخبرهم بإلغاء جميع كروتة
وقعد أمقلدم يطالع التلفزيون وهو ماله خلق شي كلش...

وياب ورقة وقلم وكتب شنو يبي يسوي من باجر علشان يبتدي بإجراءات إسترجاع ما فقد منة
1-التوجة صباحا للبطاقة المدنية وأخذ ورقة بدل فاقد
2- التوجة للبنك وإعطائهم ورقة البطاقة المدنية لكي يستطيع سحب فلوسة من البنك (مع خصم دينارين لانة سحب اقل من الفين دينار)
3- التوجة لشركة الإتصالات التابعة لة وأخذ التشب
4- التوجة لمحل تليفونات وشرء تيليفون جديد
5- الذهاب لوزارة الداخلية قسم المرور واصدار بدل فاقد لإجازتة
6-إتخاذ قرار حاسم أنة سيقاطع العروس لمدة عام كامل من اليوم واللي يزعل منة (زعل بو يعل)

وبعد مرور يوم على هذة الحادثة اتصل صديقة يقول لة: أنت وينك دقيتلك وسمعت شي طاح وتالي انقطع!!
قالى هاذ أنت اللي دقيت وخسبقتني ؟؟؟
قال اي شالسالفة؟؟
قالة قولي انت اول ليش كنت داقلي؟؟
قالة كنت بقولك إذا بتمر الديوانية يبلي جيس بنك وياك من راعي البنك اللي يم محطة البانزين اللي في منطقتك!!
قولي انت اشصار فيك؟؟؟


شفتوا رداة الحظ اللي صارت؟؟
اقول هذي السالفة بمناسبة مرور عام على إنتهاء القرار الحاسم اللي إتخذتة بعدم الذهاب إلى أي عرس
ومن باجر اي عرس يعزموني علية بروحلة وأنا امربط تيليفوني وبوكي وسويجي بسلسلة ورابطها برقبتي

كل 27-3 وأانتم بخير..... وقبسني اكثر!!