الملكة إليزابيث

الملكة إليزابيث

شحلوها عمرها عمر شعيب النبي...ما شاء الله..... صحة وعافية وخير وراحة بال...

وعندها هالديرة اللي يالله من فضلك تلق تلق وشزينها... تدرون شنو السر؟؟

لا عوار راس ولا نواب ولا حكومة ولا صيحة ولا لغوة ولا أهل يتخانقون على المناصب ولا أحد من اهلها يقدر يبوق!!

عايشة ملكة ... تعرفون يعني شنو ملكة؟؟ صح ملكة كل همها شلون يتعلمون إعيالها البروتكول وشلون يكلمون الناس وما يردون على اي أحد...و حاطه لها خط أحمر(بس مو مثل خطوطنا الحمرة) بينها وبين الحكومة والشعب.. تاخذ لها كل راس سنة هالجم مليون باوند وتصرفهم على هالطخومة والالماسات وتعايد بالباجي على ويليم وأخوانة... وأتمشى في ربوع بريطانيا طول السنة ولا همها ..تسوق السيارة ..وتصيد الغزلان.. وأتمشى بين هالبحيرات ... وتضوط ريلها وين ما تروح.... ويمكن أكثر شي ممكن يأذيها نفسيا ولدها تشارلز والساحرة كاميليا... لكن عمرها ما تأذت من حكومة ومجلس ومنو احط ومنو اشيل وهذا وذاك...

وتلاقي البريطانين يحبونها ليش إنها (دابهٍ سليمة) كافية خيرها شرها .. ومن كثر ماهي مؤمنة بالدستور.... دستورهم مو مكتوب ... إلا حافظينه (دستور عرفي) وتقول هذا رئيس وزراؤكم منكم وفيكم إن جانة زين حطووة فوق روسكم.. وإن جانة شين دوسوا اب بطنة!!

وهذي ديرتكم عمروها وسووها ومالي شغل فيكم .. إن سويتوا خير فلأنفسكم وإن سويتوا شر فعليها.. ولايكون اشوف اي واحد إموطوط صوب الباكنجهام بالاس ؟؟ لأحش ريولة.. ما ايني إلا رئيس الوزراء بس و مو كل يوم بعد ..اشرب معاة (افتر نون تي) ويغثني نص ساعة ويطلع...

وخلوني أنا وريلي وأعيالي وأحفادي وحمولتي كلها وجنايني ناخذ هالجم مليون باودن من راسٍ مرفوع كل 31/12 من كل سنة من إيراد الدولة

ونترك لكم التجارة والعمارة والمناصب ولالنا اي شي غير البيزات.. ويوم شبوا إعيالها وقالوا نبي مناصب وناس تخدمنا وتهابنا وتسمع كلامنا؟؟ حطت لهم هالمزارع وكوّدت هالإيرلندين ومسّاحة الجوخ والحبربش وقالت استانسوا فيهم وطلعوا حرتكم و شيخوا عليهم وخل يكون لكم برستيجكم.... صرفوا واستانسوا وسافروا ولا (إدوارد يستجوب ولا هيلي يطنطن ولا جون يفضح!!)