ما تصبرنيش.. ما خلاص.. أنا فاض بيه ومليت .... بينلي إنت الإخلاص وانا اضحي مهما قسيت

إنما للصبر حدود
للصبر حدووووووود



الأربعاء، 27 أكتوبر 2010

7 بطاط وفلافل وصلاّحوووووو

بكل دناءة وخسة ووقاحة .. تلتفت الموظفة للمندوب وتقول له ... تبي تخلص المعاملة اليوم ولا تمر باجر؟؟
المندوب : لا حضرتك يا ريت الناهرده..
الموظفة : عندك ورقة وقلم
المندوب : ايوة تفضلي
الموظفة : اكتب ... 7 بطاط وفلافل ... 4 حلوم .. واحد منهم من غير طماط.. 2 بطاط وبيديان وخل يكثر الطحينة و4 كولا.... بسرعة ولا اتأخر روح يبهم من مطعم شاي ونعنع وتعال ... وإن تأخر ترى ما راح اسلمك المعاملة إلا باجر
وتنطلق ضحكة صديقاتها أمهات الحجاب المنفوخ

راح المندوب وياب الاكل لانة بالنهاية يبي يخلص الشغل بسرعة...
وتكون المفاجأة...بانها ترفض تسليمة المعاملة لان الطلب ما فيه (مخلل)
يا عل يخللونج يا جليله الحيا..
وبعد ان ترجاها المنوب أعطتة المعامله وهي تقولة ثاني مرة ماراح اسامحك

قصص كثيرة سمعتها من موظفين الدولة خصوصا في وزارة الأشغال والعمل والبلدية
سمعت عن موظف يطلب كروت شحن للموبايل...
مر على موظف يطلب موبايل
عادية سالفة كروت بترونت للبانزين
ملينا من سالفة وين هدايا الشركة من اقلام وكبابيس ورزنامات

لكن ريوق !! هذي يديده علينا
لعن ابوج هذا سحت في بطنج حرام وإن قل ثمنة ... يعني يا بخت المندوب اللي بييج وأنتي يوعانة الصبح
ويا قرادة المندوب اللي بييج عقب الريوق !!

ثلاث او اربع موظفات متحجبات وحجابهن بالشهر التاسع من النفخه ضحك وسوالف وطلبات وعدم مبالاة
مكياج صارخ لم اراه في وجه اهلي واهم رايحين عروس .. اشوفة الساعة التاسعة صباحا في وجه بعض الموظفات !!
معاشج كلة على المكياج وعلى الجنين اللي براسج
اظافر شطولها تشمخ من يسلم المعاملة
قذلة شقراء (ولا شقار ديانا رحمة الله عليها) تطل من الحجاب مع ظهور التراجي (شحقة متحجبة)
اما اللباس فالعفيفة منهن لابسة مايسمى بالعباة الإسلامية وهي بريئة من الإسلام... تلقاها مترصرصه ولن اشرح اكثر من ذلك

الخلاصة بعض موظفات وزاراتنا هداهن الله مصخوها والشرهه على مدرائهم اللي شايفينهم جذي وساكتين
ولحد يقول حرية.... ملعون ابوها حرية دام هذي اخلاقهم لا لبس ولا شكل ولا اداء وهم يطرون ريوق

الأحد، 24 أكتوبر 2010

قوم ... مات حظنا

ناصر.. ناصر


أممممم


قوم يمة قوم


أمممم أمممممم


يا ناصر..... ناصر قوم يمة روح دوامك.. قوم


ZZzzZzzzZZz


ناصر يالله قوم يا حبيبي ... من نام الصبح مات حظة.


امممممممممم يمه يمه خليني شوي أنام


قوم يا يمة قوم شوف شغلك الدنيا معفوسة وانت ليلحين نايم..


أنزين انزيييييييييييين بس خمس دقايق وقعديني





بعد خمس دقائق...


ناصر.... قوم يا حبيبي قوم


أممممممم


ناصر قوم يالله الناس ضحى قوم لحق على شغلك..


انزين انزيــــــــــــــــن


يا ناصر تعبت قلبي ... كلنا معتمدين عليك ..قوم جابل الشغل... كل يوم نوم نوم نوم


إفففف يا يمة الشغل ماشي زين


وين زين الدنيا معفوسة والموظفين واصلين حدهم .. كل يوم مشاكل وشكاوي


ZzzZZZzzzZZ


نويصر ... قوم هديت حيلي . قوم الطيور طارت برزاقها


أمممم أمممممم


قوم يا خيـــــــــــبتي .. مالت على هالزمن اللي حدني لك ... قوم


يمة يمة والله كل شي بيمشي ... بس سكتي شوي خل انام


اي صح صارلك اربع سنين تقول كل شي ماشي .. ولا شفنا شي ..


ZZZzzzZZzzZZz


قوم قوم قوووووووم


بس يا يمة خليني شوي انام


هالشوي لي متى؟؟ لي متى يا وليدي عيزت وأنت نايم .. قوم



مات حظك .... لا تموت حظنا معاك.. وراك ناس ناطرة منك شي



ZzzzZZzzzZZZz .......ZzzZZzzzZZzz



يا ربي ما أدري شسوي بهالولد .. بموتني ناقصه عمر... قووووم يا ناصر والله حرام عليك ... قوم خل الناس تعرف إنك موجود
خل يحسون فيك .. او على الأقل خل يحسون إنة في ريال بالشركة خايف عليهم .. على حلالهم على مستقبلهم
قوم سو شي خل بعد عينك يذكرونك بالخير على الاقل !!



وما زال ناصر نايم.... يا عسى نومته هنية
ما زالت أمة تحن ... وتشكي علومٍ ردية



ويبقى السؤال .. متى بقوم ناصر وبيشتغل ...؟؟ وماذا ستفعل أم ناصر؟؟ هل ستتحرك لإنقاذ البيت؟؟
وأين بوناصر ؟؟

شارك واربح قناة فضائية مع شلة ردح

الخميس، 14 أكتوبر 2010

جنة أم نار صرتي يا كويت؟

طرق باب مكتبي شخص أعرفة من زمن من البدون اللي صج بدون .. هو ضحيه والده اللي من الخمسينات وهو في بادية الكويت ورفض او تكاسل عن اخذ الجنسية في ذلك الوقت..

ويعمل في شركة استغلت انة بدون فداست اب بطنة بالشغل مقابل 300 شهريا يروح نصهم على اجار بيتة والنص الباقي لزوجتة وبناته الثلاثة..

دخل المكتب وهو يقول عندي طلب وارجوك ما تردني... قلتلة آمر إذا اقدر ماراح اردك..

قال : ابي تمشيلي معاش صوري قيمتة 2000 دينار.. بس جذي للحسابي بالبنك... وهذا الكرت اسحب منة المعاش على فترات من الشهر .. وانا ما راح اخذ شي منه

قلتله ليش؟؟

قال أنا خلاص ابي اهاجر إلى استراليا بعيش هناك ولازم اطلع فيزا والفيزا عشان تطلع لازم السفارة تعرف إني عايش بالكويت مرتاح ومافي داعي اهاجر وعشان اكون مرتاح لازم معاشي بالبنك يكون عالي..

قلت له ومرت وبناتك الثلاثة بتاخذهم معاك؟

قالي وهو يعتصر الم ... زوجتي وبناتي بيوني بعد سنتين !!

قلت ليش؟

قال الشروط جذي ... عشان يعطوني اللجوء يبيلة سته اشهر وبعدا آخذ اللجوء وعقب اقدم على الجنسية الاسترالية وبعدين سنة ونص يععوني الجنسيه ويصير لي الحق بان ايب زوجتي وبناتي !!

قلت ليش ما تاخذهم من الحين؟ ويمشون المشوار معاك

قال ما عندهم جوازات الحكومة طلعتلي جواز حق الحج بس اهم لا

قلت الحين ماحلا هالحكومة ما تبيكم هالدور حتى غذا بغيتوا تقبون من الديرة هم ما تخليكم ؟؟!!

قال هذا اللي صاير ..



أنا ما اعرف شنو هالغباء والظلم اللي في حكومتنا !!

ناس ما تبونهم بالديرة يا تعاملونهم زين يا تعطونهم جوازات مؤقتة وتقولون لهم سيحوا بالارض لكم فيها مستقر ومتاع

حرام هذا اللي قاعد اتسوونة فيهم.. نعم في بعضهم مو كفو ولكن الظلم حرام

هم يعيشون في نار ليل نهار وقودها قوانينكم الغبية

ولا اعلم سر منظمة هيومن رايتس اللي كل سنه تصرح وتقول (الكويت بلد معادي للحريات) وتتكلم عن الخدم والبدون

ومجرد ما يسافر للمؤتمر الوزير المعني تخرج هذي المنظمة بتصريح معاكس ويقول الوزير لقد عالجنا الامر

حرام اللي قاعد يصير والله

لا شهادة ميلاد للبنات ولا توثيق للزواج والمدارس والتعليم بالحسرة

اما أمهات الدقات بحنوجهم وعيالهم لا إنفجرة قنبلة فيهم قلتوا عالجوهم في مستشفياتنا !!

فتأتي ام الدقات وأعيالها الاشاوس فياخذون سرير الكويتي وسرير البدون وقد يكون في نفس السرير منذ عشرون عام مات شهيد كويتي على يد اللي قاعد يتعالج الان !!

سحقا لهذه العدالة وهذة الإدارة



أما القصة الثانية فهي لسيدة سورية الجنسية .. عاشت اكثر من ثلاثين سنة بالكويت وهي تعمل .. ترملت وهي بنت الأربع وعشرون عام .. ووهبت حياتها ومالها لابنائها اللي تخرجوا من الجامعات وعاشوا في كندا والارجنتين

تقول السيدة اللي اتصلت تيليفون علي من سوريا وهي تصيح

انها سافرت من الكويت منذ عام لوفاة والدتها وكانت إقامتها على وشك الإنتهاء... وبعد العزاء بإسبوع إنتهت الإقامة وما تقدر ترد واللي كافلها كان قايل لها هذي آخر مرة اكفلج ودوريلج احد ثاني

وهي تقول لي حاولت اتاقلم مع سوريا واهلي هناك بس ماني قادرة انا خسرتهم عشان عيالي وتربيتهم

والحين خسرت عيالي والكويت

وتصيح وتقول والله إني تركت ثلاجتي وليتاتي بالشقة مفتوحين وذهبي واغراضي وطرت حق والدتي مامداني اضبط امور إقامتي

قلت لها: يا أم تامر خلاص وفيتي وكفيتي .. شلج بالكويت ؟ حنا مالنا رزق فيها

فردت : انا ما اشتغل إعيالي يصرفون علي .. بس أنا تعودت على بيتي وحياتي .. انا مو قاعد اضر احد بالكويت .. انا كل اللي اعرفهم بالكويت.. انا ابي اموت بالكويت .. انت يا ابني تعرف شنو البلد البلد مو بالجنسية البلد بالولاء والحب والعطاء



سكت شوي وتنهدت وقلت لها : يا أم تامر .. مادري والله شسويلج .. الجنة وهي الجنة ببيوتها وقصورها وحورعينها وانهارها نعرف شلون ندخلها..
صل.. صوم.. زك.. حج.. وبرحمتة تدخلها...
أما الكويت فوالله لا لج فيها منزل ولا قصور ولا مزارع ولا حتى تعرفين شلون تدخلينها

الله المستعان يا أم تامر... بحاول اساعدج

وأخيرا اللهم أصلح أمور بلادي يا رب .... الشكوة لله ..

الأحد، 3 أكتوبر 2010