الخبر: طالب يعتدي على زميلة جنسيا في أحد حمامات مدرسة بالجهراء
ردة الفعل من قبل الوزارة: فصل وشطب اربع طلبة خليجين من مدارس الكويت نهائيا بأقل من 24 ساعة!
الوزيرة سوت اللي عليها وما قصرت بس اللي خبركم ما يسكتون وكل ما صارت مصيبة قالوا أستقيلي يا نورية
معتوة يدخل لروضة أطفال وتفصخ سلط ملط ........ استقيلي يا نورية
مراهق يعتدي على زميلة جنسيا في حمامات مدرسة بالجهراء.....استقيلي يا نورية
حارس مدرسة يعتدي على طالب بالهدة!! ......استقيلي يا نورية
بنجرت سيارة امينة مخزن مدرسة (أعذار بالهبل).....استقيلي يا نورية
براية طالب مفقودة والسارق غير معروف....استقيلي يا نورية
تكييف صف ثانية /اول في إبتدائية (ديودرنت منعش) تتعطل....استقيلي يا نورية
مكتب وكيل مدرسة (بغير اثاثي) صارلة 10 سنين ما تغير....استقيلي يا نورية
البذرة اللي زرعوها فريق الزراعة في مدرسة (زرع الميانين يطلعة رب العالمين) ما طلعت.....استقيلي يا نورية
ابلة نوال أمس طاقها ريلها وما داومت اليوم....استقيلي يا نورية
أربع من طالبات مدرسة (أهل القز) مو قاصين اظافرهم....استقيلي يا نورية
الوكيله المحترمة في مدرسة (أعطني حريتي) هادة دوامها ورايحه المستشفى جنتها بتولد....استقيلي يا نورية
الطالب أحمد في نهائي دوري المدارس بكرة القدم ضيع بنلتي ......استقيلي يا نورية
ولي أمر طالب عيز يدق هرنات حق ولده بالهدّة وولدة رايح يشتري برّد ....استقيلي يا نورية
مدرسة (أيام العز راحت) سوت حفلة بمناسبه تخرج كوكبة من بناتها...استقيلي يا نورية
دكتور بغل كبر اليهد يتحرش بطالبة بالجامعة....استقيلي يا نورية
ولدي ليش ساقط بالتربة الإسلامية مع إنة يشوفني اصلي بالمسيد...استقيلي يا نورية
طالبة في مدرسة (تكفون بنجح)تعيد السنة لأن عندها مشاكل بالبيت بين أمها وابوها....استقيلي يا نورية
فهيد النزقة مرقم وحدة بالسالمية وبما إنة يداوم الصبح بثانوية (اشترلي كرت إيزي) عيل....استقيلي يا نورية
ولدي قام يشرب زقاير وبنتي عندها موبايل ما أدري عنة.. كلة من ربع السوء في مدرسة (هوي هوي يا ناقتي)....استقيلي يا نورية
مرتي مو مجابلة شغل البيت ولاهيا تصلح الإمتحانات..... استقيلي يا نورية
جسوم تعرجب بخيوط جوتية وطاح بالمدرسة ....استقيلي يا نورية
فطيم ما حلت الواجب لأن أمها أمس ودتها ترززها حق رفيجاتها جود يقوم حظها....استقيلي يا نورية
نادية ما شربت الشوربة كلها في روضه (أطفال التبلتع)...استقيلي يا نورية
عفية نورية الداااااااد شتبونها تصير وزيرة البيوت وتمر بيت بيت تعلم إعيالكم الأدب وشلون ما يعتدون جنسيا ؟؟
ولا تبونها تمر بيت بيت عندهم مينون وتاخذة تقطة بالطب النفسي علشان ما يتفصخ جدام مدارس البنات
شكو ... أنا ما أعرف المرة للامانة ..بس اللي اعرفة إن جميع المشاكل اللي تصير بعيدة عن التربية والتعليم ..
وهذي حوادث تصير في كل مكان وواردة سواء بالسوق ولا بالمدرسة او بالجامعة او بالجمعية
لو إنة وزير التربية حدسي او تلفي إن جان قلتوا هذا تصرف فردي وشتبونا نسوي لكن ليش إنها مرة قمتوا أتخانقون مع ذبان وييهكم
اسفخص عليكم رجالة ... اللي يبي يصلح.. الإصلاح يبدي من البيت.. قلتوا تبون نورية تركب كاميرات وركبت (إف بي آي )مو مدرسة!!
شتبونها تسوي بعد؟؟ تركب كاميرات بالحمامات؟؟؟!!!!
بالله هاللي بالجهرا معتدي على زميلة جنسيا شكو نورية فية ؟؟ معطيتهم حصة بلاي بوي مثلا ؟؟
هناك 43 تعليقًا:
اييييييييييه
هزلت يا مبيوق حتى سامها كل مفلس
مودك قلب سياسة again
اخترب الويك اند
فطيم ما حلت الواجب لأن أمها أمس ودتها ترززها حق رفيجاتها جود يقوم حظها....استقيلي يا نورية
هاهاهاهاها
المشكله اكو وزراء بلاوي وزاراتهم اشنع محد تحجى عنهم اشوف
?
بس تبي الصج
انا ودي لو كل وزير في نهايه كل سنه على الاقل
يسطر لنا انجازاته اللي سواها في سبيل النهوض بوزارته
كلللهم بدون استثناء
حزتها بتشوف يا حسافتج انه مو مهم بس انه الامور تمشي
مثل ما اهيه ماشيه بالبركه
صارها سنين وبنين
بتشوف انه الغالبيه العظمى منهم مالهم اي انجازات تستاهل الذكر
هذول المفروض ينشلعون
من اماكنهم
وينحط بدالهم ناس تبني تغير
تصلح تطور
تنهض بالوزاره
مو بس يمشوووون الامور
!
لي متى واحنا مكانا ما نتحرك
??
هذي ويها عريض و منجب ما نفتك منها!! :P
المقوع
هزلت هزلت
إحنا عشقناها
والله ماني قادر اوقف بس اوعدج يرد الموود نص الويك إند
فانكوفر
وينج يا القاطعة
ههههههه ضحكتيني بإنجازات الوزراء
اهم خل يكملون سنة في وزاراتهم
اللي شايلينة واللي مستجوبينة واللي غصبن عليه طلع والسبة إستقالة الحكومة؟؟
وين الإنجاز؟؟
مومينتو
أتمنى يكون التعليق من باب الغشمرة
ماصار هالنورية
ما اقول الا محشومة يا ام عادل
ابو الدستور
اي والله محشومة عن هالاشكال
ما نقول إلا الشكوي لله !
يعني إذا إستقالت ما راح تصير حوادث بالمدارس ؟؟؟
يطالبون بكاميرات في المدارس ويم حطوا لهم كسروها !!!
خل يصير فيه وعي للمال العام وبعدي يطالبون ؟
حسافتج
شوف عزيزي >>>> حلوة عزيزي
بتكلم من منطلق كوني تربوية أولا ووليةأمر
ترى كلمن قعد على كرسي حط ريل على ريل ما يدرون شصاير بالديرة ولا بالتربية ولا بالتعليم
الوضة هالايام حتى تدريس ما يبونا ندرس
يبون أوراق مصفوفة
احنا سوينا المشروع الفلاني والمشروع العلاني ونجح
كله غصب ينجح بوزارة التربية
بعدين صج التربية تبدأمن البيت بس المدرسة هم تأثر
عيل الأم تتعب وتسنع بالبيت وتضبط
يروح مدرسة ماكو فيها نظام ولا قوانين ولا رقابة ينهدم الاساس ماكو دعم لتربية الاسرة
مابي يستجوبون نورية
بس على الأقل تحاسب الادارات وتقعد تشوف شغلها
فمن أمن العقوبة اساء الأدب
نيكون8
شفتي شلون؟؟
بدال لا يهتمون بالتربية والتعليم قاعدين يتكلمون في جرايم المسؤول عن العقاب فيها وزارة الداخلية
اتيت متاخرة
كلامج عدل 100%
فليحاسبوا نورية إذا قصرت بالمناهج او في امور المدارس او في اي موضوع ولكن ليكن في صلب التربية والتعليم
أما حالة إعتداء جنسي في حمام مدرسة فما عساها ان تفعل؟؟
تدخل حمام حمام اتجيك على الطلبة مثلا؟؟
نواب التخلف يبون راس نورية لانها إمراة فقط
نعم هناك قصور بالتربية وفي مناهجها وانا هنا لست بصدد الدفاع عن نورية او غيرها ولكن حدث العاقل بما يعقل
ما علاقة الوزير بإعتداء جنسي من طلبة
وبخصوص أن البيت يربي والمدرسة تخرب فإسمحيلي
بيتي وبيتح يربي وودي العيال للمدرسة وبيتهم يهيت الابناء بلا تربية ويبعث ابناؤهم ايضا للمدرسة وهنا تحصل المشكلة
إذا المشكلة بالبيوت وليست بالمدارس
وشكرا
بغض النظر عن شنو قدمت الوزيره وشنو انجازاتها بس شي غريب انه كل ماصار شي طالبو باستقاله الوزيره الوزير ماله ذنب في تصرفات اشخاص غير اسوياء
نورية مالها شغل
المفروض يستجوبون ناصر المحمد
نحاسة مدير جامعة الكويت بو قولة ما تنصك (عساه ينقال قوووول فيها)
استقيلي يا نورية
للامانة "بو قولة ما تنصك مالت فريج سعود"
البوست طالع من قلب
شنسوي هذا اختيار الشعب للاعضاء
المشكلة هذول بيسوون من انفسهم ابطال
و مواقفهم كلها لا تهش ولا تنش من دخلوا المجلس و احنا معفوسين
حسافتج
تصدق استوعبت شغله
اللي قاعدين يطالبون باستقالة نوريه حدهم
NEW COMERS
على الكويت...هذولا لو لاحقين على أيام العز جان أشسووا
هاهاهاهاهاها
هاهاهاهاهاها
أيام يوسف بين عيسى و الشباب كلهم قاعدين بالسكه
لا و أيام ثانوية كيفان و القز مال شارع الحب يبتدي من ثانوية المنصوريه و بعدين العصما و يمرون جمانه بس عشان ما يطوفهم شي..و آخر شي الجزائر
لو أنا من أم عادل...جان أقدم أستقالتي..و عقبها أقط ٧ حيرات على وزارة التربيه و الحكومه كلها..اللي خلت هالأشكال يتجرئون لها الدرجه
أذا أنـبـاق بـيـت لـيـش مـا يـحـمـلـون وزيـر الـداخـلـيـة الـمـسـؤولـيـة ؟!
أذا أنـبـاق مـحـل ذهـب لـيـش مـا يـحـمـلـون وزيـر الـتـجـارة الـمـسـؤولـيـة ؟!
و الله مـسـخـرة !!
مـسـيـجـنـيـة هـالـنـوريـة
الـحـل أنـك تـخـلـي بـوديـقـارد مـع كـل طـالـب :)
تدري يامبيوق ان اللي هتكوا عرض الطالب هم من الجنسيه الخليجيه
واللي نزع سرواله بالروضه ايضا من الجنسيه الخليجيه
يعني انا اعتقد ان بدال ما ندعو الوزيره للأستقاله, ليش مانحط مدارس خاصة للأجانب عشان نحمي عيالنا من هؤلاء وثقافتهم المنحله.
تدري شالمشكلة ..
انك تعطي من لا يفقه أدوات كبيرة عليه، يحاسب بها الناس كيفما شاء ..
صار الاستجواب اليوم والتهديد بالمساءلة على اللي يسوة والي ما يسوة ..
على قولتك .. خدامتنا اليوم ما قعدت حمود حق المدرسة الصبح .. هم استقيلي يا نورية :)
الله المستعان ..
جديد المدونة :
وين بتروح يا سمو الرئيس ؟!
alsoorst.blogspot.com
ma3eni thid ena el-wa7ed eqdim estiqalta eb sibat tahdeed "ma3souma embarak" as long as ohwa shayef nafsa yegdar ya36i o kamil e7tirami 7ag "ablah nouriya" bas kan wedi asma3 a7ad egoul "besabab ta6beeq qanoun man3 likhtela6 el-mokhalif lidistour estiqeelay ya nouriya"
لا حول و لا قوة الا بالله
يعني كل شي يصير بالمدارس خلوه من الوزير..
انزين انا اشوف عندكم وايد ناس يتحجون عن نورية جنها مسوية شي مو عدل نورية و نورية و نورية و كله ع سالفه الموحد ليش عاد اهيا ما سوت شي و بعدين حتى احنا بالبحرين عندنا نظام الموحد و من زمان محد احتج و لا شي و الحمدلله مافي قصور الكل حامد ربه و شاكره و نظام ماشي و زين بعد بس الشاطر شاطر لو شنو مسوين له و الكسلان كسلان و الي ما يفهم ما يفهم مو ع الوزير و المناهج
و الحين الناس يبون تطور و مادري شنو بالتعليم مثل الدول المتقدمة شلون بالله و اهما من يسوون لهم شي خلوه ع الوزير و بلاويه و بعدين الوزير مو مسؤول عن كل هاي الشي لان التربية تبتدي من البيت و بعدين المدرسة تكملها كونها وزارة تربية بس الاساس هو البيت يعني ع حسب تربية الاباء لابناءهم فشي طبيعي الي مو مربى لا بيخاف الله و لا رسوله
مسكينه بس خل يحمدون ربهم ع هالنعمه و ع فكرة التعليم في الكويت وايد سهل بالنسبة للبحرين تخيل الحين اول ابتدائي يمعطينهم النواة و الخلية و البناء الضوئي و كلها كتب معربة بس شنسوي صابرين و الحمدلله ع كل حال..
علشان ننهي هالازمة يانت يا ام عادل احد فيكم يستقيل
ليش الكل ناسي سوء المناهج
ليش الكل ناسي الدروس الخصوصية وتفشيها
ليش الكل ناسي تراجع مستوى التعليم عندنا ومخرجات التعليم العام صارت هوااا
نسوا انها مو بس وزيرة التربية
والأهم التعليم
التربية تيي من البيت وهذا ما نحاسبها عليه
لكن التعليم مصيبته العن
خلنا من اللعب بالسياسه
شصار على تعليم عيالنا
ليش صار التعليم بالبيت
اكثر من المدرسه
ليش صرنا نيي من دواماتنا عشان نداوم في بيوتنا كمدرسين
ليش المناهج ما ينعرف راسها من كرياسها
ليش منع الإختلاط طبق في الجامعات الخاصه وما طبق عدل بجامعة الكويت
هذي شنو يسمونها مو مزايدة
تبون تغطون السما بمنخل وتنسون ان نورية بعد قاعده تلعبها سياسيا عشان تمسك كرسيها
ونست انها وزيرة تعليم قبل التربية
سئلوا المدرسات في المدارس الإبتدائية النموذجية واللي يسمونها مدارس المستقبل شنو قاعد يصير
اهم نفسهم مو عارفين المناهج شلون تدرس
وقاصين
لعب لعب لعب بمستقبل عيالنا وتقول نورية لا تستقيل!!!!!
ايه صح لا تستقيل خلوها تكمل
بس تعالوا حاسبوها بعد عشر سنين انتي شسويتي
عاااادي
الربعي كان مو خوش وزير لما كان وزير التربية
الحين عرفوا ان كان واعي وعارف شيقول
المشكله ان الوضع هني معكوس
باجر تقولون ما سوت خير لما ايي ولدك ولا بنتك ما تعرف التاء المربوطه من التاء المفتوحة
والألف المقصور من من المد رالألف
اقول
خل اروح اقرا سورة البقرة آجر لي
جمعة مباركه للكل مثل ما يقولون
سلام
لوووول اعجبتني أخر فقرة هاهاهاهاما الله يستر على الأجيال القادمة
جووج
أنجل
عدل كلامج والله
نبي الإنجاز
مطقوق
المفروض يستجوبوني أنا وافتك
جندل
مو نحاستة بس
بما أن القولة ما تصك فلازم تستقيل نورية
دكتور معرفي
يبتها عالجرح
بس البلى فينا حنا اللي ما نحاسب النواب
نانوو
أيييييييييي
اوووول يا زمان ارجع يا زمان
البيرق
الشكوى لله
رحمتك يا رب على الكويت
غير معروف
القصة مو قصة خليجين ترى عادي في كويتين
القصةقصة تربية
وبيئة
والله يحفض اعيالنا
السور
فعلا الكلام اللي قلتة صحيح
وموضوعك وايد واقعي وصح
فشلنا وودرنا الله يسامحة
زويز
والله عدل كل اللي قلتة
فعلا ماكو نا س فاهمة
باريس
المشكلة بالكويت شائكة
والعلة مو في نورية
العلة إن موضوع التعليم بالكويت واقف صارلة مدة
وإذا راح يصير نمو في هذا المجال يجب أن يتوافر للوزير إستقرار ووقت كافي لا يقل عن 5 سنين
وعمر وزاراتنا لا يتجاوز السنة ونصف
وخلالها ماكوا استقرار
نتر
هههههههههههههههه
يمكن حنا الأثنين
الزين
والله كلامج كلة عدل
وما نقدر نزيد علية شي
بس حنا مو ناسين سوء المناهج
حنا نقول عطوا اي وزير تربية فرصة لا تقل عن 5 سنين وخلال هذي الفترة ما يخرعون الوزير ببعبع الإستجواب
ساعتها بتشوفين الشغل
وطبعا لازم ينقفون الوكلاء المساعدين اللي معششين بالوزارة
أنا لا امندح نورية ولا اذمها
انا اعتب على اللي لا صارت جريمة بالمدرسة قالوا نورية!!
اهيا شكو؟؟
تبون راسها حاسبوها على مواضيع في صلب التربة والتعليم
جووج
فعلا الله يستر على اعيالنا يا رب
اللي قاعد يصير هالايام شي يخرع
هههههه عجيييييييييييييييب بردت جبدي والله تسلم.. هالنوعيه من النواب اللي معروفين ان ياك بو حذفه والا الهايف والا حبربش وانت رايح تييهم حساسيه من الحريم خاصه اذا كانو ارقى منهم اخلاقيا واسلوبا.. المشكله بعض هالعوايل تلقى تعدد الزوجات والعيال بالدرازن والاهل آخر همهم يربونهم بس يبون الخمسين الزياده مالت الحكومه ويبون الوزيره تربي اعيالهم!! ويذمون التعليم وفي المقابل يبون الوزيره تخفف الحمل على حريمهم المدرسات واتزيد اجازاتهم والافضل يمشي معاشهم واهم بالبيت!! واللي يحر ان التعليم عندنا بالمجاااااااااااااااااان وهم مو عاجب!!
يعني بالله حريمهم هالمنقبات النقاب وينه وين الامن؟ سواء بمدارس بسيايير بصالونات .. الخ
فرضا ريال لبس نقاب ودرعم المدرسه! يعني لو الوزيره تطالب بكشف النقاب اعلووووم اشبيصير ردحه ما بعدها ردحه!!
انا اقول استقيلو يا الاهالي اللي تلومون نوريه لانكم ما تعرفون تربون اعيالكم وتبون من يربيهم لكم..
وللوزيره اقول عساج على القوه ويا جبل ما يهزك ريح
ليش وزارة التربية مر عليها احد احسن من نوريه؟؟ مسألة استقيلي هاذي مارة على الكل .. ناس ماعندها سالفه ولا شغلة .. حابين يتسلون ويطولون رقبتهم ( شوفونا) ترانا لنا وجود .. بصراحه نورية المرأة الحديدية بنظري .. ومن وجهة نظري كمدرسة ترى اللي تشيلة عبء كبير .. والله لو زادت عليها الضغوط بتقلب لكم نوري مو نوريه ر" ياليت يخلون المره بحالها .. ومشاكل التربية تكفيها .. والناس خليتعبون شوي على عيالهم ولا يقطون بلاهم عالمدرسة ... يعطيك العافية عالبوست الحلو .. والله صاج على كسرت العود .. ( استقيلي يانورية)
بصراحه نورية الصبيح من لما كنا احنا بالمدارس كنا نعاني من الكثير من قراراتها وسياستها ماكانت تعجبني لكن هناك فرق بين انك لا تعجب بقرارات انسان وانك تحمله وزر كل امر يحدث
انا ضد الاستجواب الاول اللي تم تقديمه وحضرت الجلسه وسلمت عليها وحييتها على شجاعتها وقوتها وعدم تقديمها لاستقالتها على الرغم مما قلته مسبقا
وهذا لان في شي بالدنيا اسمه عداله واحقاق الحق
ما اقط على المره كل شارده ووارده تصير بالوزارة واهيه اصلا لاعلاقه لها فيه يعني ليس من المتصور انك تقط عيالك على ميري وجاندرا وكومار ولما يروحون المدرسه ويسوون بلاوي تقول وين الوزارة عنهم هاذي وزارة تربيه لازم تربيهم ؟؟
من قال الوزارة لازم تربي اذا انت ولدك فلذة كبدك حشاشه يوفك قطعه من روحك قاطه ع الخدم وماتدري عنه تبي هيئة حكومية تربيه بدالك ؟؟ عيل قطه بالشؤون ..
نوريه الصبيح شجاعه قوية وصلبه ولكل سياسي اخطاءه وهي تحاول ان تغير من التعليم للافضل حتى لو لم نتفق معها في بعض الامور لان لكل شخص وجهة نظر في رؤيته للامور قد نرى شيء لا تراه والعكس صحيح وفي النهاية اختلاف امتي رحمه كما قال المصطفى ( ص)
ويعطيك العافيه
واسفه ع الاطاله
وقعدي يانوريه ع الاقل احسن من غيرج
إرسال تعليق