حرف العين

قصتي مع حرف العين

مع الأسف بالكويت عاداتنا وتقاليدنا جزء منها يبط الجبد والمصيبة كل ما سالت أحد قالك إي والله تبط الجبد او يبيلها تعديل

طيب إذا الأغلبية طاقة جبدها من هالروتين وهالسستم ليش ما نحاول نغير ..

الجواب..

نخاف الناس تنقد علينا!!

وشلون ينقدون عليك إذا اهم اساسا ينقدون على هذا السستم؟؟

يعني بالسفر تنتشر سالفة الخز بين الكويتين والخاز يخز المخزوز وقول .. يا قثة أشحقة يخزني... (مو يا حبيبي إنت قاعد تخزة) والمصيبة إن المخزوز هم يقول هذا شيبي يخز ومع هذا تلاقية يخز الخاز!!

والاثنين يتحلطمون!! وماكو فايدة

الموضوع اليوم موضوع عن علاقتي بحرف العين وتاثيرة على حياتي اليومية

العزاء... العرس... العيد... الثلاثة هذيلة واجبات إجتماعية ولكن مع الاسف بديت أكرهم والسبب التكليف بهذي المناسبات

فالعزاء واجب ولكن اوقاتة غلط يعني حلاتة العزا يومين و من بعد صلاة المغرب إلى الساعة التاسعة او الثامنة مساءا أي وقت خروجك اساسا من بيتك لكن تقولي روح العزا وأنا الصبح بالدوام وارد الظهر تافل العافية مامداني اتغدا وأخدر إلا صايرة الساعة 4:30 وحدي خدران اقوم البس واروح العزا... أبو العسارة ..

أما بالنسبة للعروس فماعادت بسيطة وحلوة مثل اول فانت تروح العرس في فندق تسوف المعرس عازم نص الكويت والشوارع مسكرة وذاك من ذاك اللي لا حصلتلك موقف يعني هم تروح العرس وأنت مستعسر

ليش تعزمون وايد ناس؟؟ العرس حلاتة حلو وخفيف حتى الواحد يستمتع فية ويقعد مدة وسولف مع ناس ما التقى فيهم من زمان ونفرح للمرعس وليس اداء واجب

ساعات توصلني بطايق من ناس ما اعرفهم وما اروح لاني ادري هذا عازمني مجاملة علشان ابوي وهذاك عازمني لان إسمي موجود في دليل المعازيم اللي قاموا الشركات تبيعة لاهل المعرس ويطبعون الاسم ووالله لا اهل المعرس ولا اهل العروس يعرفونك بس لمجرد وجاهه وإن عرسنا عامر وناس وايد يولة

مرة إنعزمت على عرس المعزومين فية فوق الست آلاف !! شدعوة طبعا من الزحمة على طوووول طقيت فوق حدر ورحت الديوانية

لان عرفت إن المعرس ماراح يهمة وجودي او عدمة

وعموما لاني كنت معرس في يوم من الأيام فأحب اقول للي ما عرسوا ( المعرس يوم عرسة يسلم على الناس ويطالع الساعة متى يفتك وروح حق عروستة) فماله داعي كثرة الناس لانك تبي الفكة منهم في هذا اليوم

أما العيد فأصبح مثل الماء.. نحن بحاجة له ..ولكنة بلا طعم ولا رائحة.. والواحد قام ينحاش منة لفتور الفرحة والبهجة ويبحث عنها خارج الكويت

يا جماعة إن الله لا يغير ما بقوم حتى يغيروا ما في أنفسهم

إذا كل واحد بقول شلون نغير وفشلة ومو حلوة وعيب.. ماراح نغير شي

والغريب أن كلنا نتحلطم على الاشياء وكلنا نسويها خوفا من المجتمع مع العلم ان المجتمع ايضا طاقة جبدة منها فليش الخوف؟؟

ثلاثي العين (عرس. عزاء. عيد) خنقتونا