فدوة لج !!

نحتفل هذي الايام بعيد الإستقلال وعيد التحرير لدولتنا الغالية الكويت

إستيديو حسافتج يا كويت إنتقل إلى منزل السيدة " دولة الكويت" ليجري معها هذا الحوار على الهواء مباشرة



أنا: نرحب فيج يا كويت ونهنيج بعيد إستقلالج وتحريرج

الكويت: ياهلا بولدي .. اشكرك واشكر أهل الكويت على هذا الإحتفال

أنا: بالبداية تسمحيلي أناديج يمّه... لان هذا إحساسي إتجاهج

الكويت: ايييييي هاو يا حافظ انت ولدي قول يمه قول

انا: يمة ابيج توصفيلي شعورج اليوم ..شتحسين فيه عقب مرور 48 سنة على الإستقلال؟؟

الكويت: شوف يا يمه.. رحمة الله علية ابوكم عبدالله السالم خدمني وعزني ورفع راسي فووووووق يوم إنة انهى المعاهدة ويوم إنة توج راسي بالدستور والديمقراطية و وأنا من ذيج السنة وأنا فخورة بهذا الحدث وسعيدة فيكم يا عيالي وبتجربتكم الديمقراطية وتعاطيكم معاي وتفاعلكم وصدقني اني استانس لاشفتكم تفرحون في هذا اليوم اللي يدل على حبكم لي .. بس في شي إضايقني يا وليدي

انا: قولي يمه لاتخلين شي بخاطرج

الكويت:اليوم في ناس تفرح بيومي هذا لأنها تبي تفرح وبس ولو تسألهم شعلية فرحان وشسويتلي والله ما يدرون.. وفرحتهم بأساليب اتضيق خلقي وانا أمك.. ولكن مو الكل طبعا...

أنا : ايييه يا يمه الله يهديهم بعض المراهقين يحولون الفرحة لأحزان

الكويت: انا والله خايفة عليهم لا اكثر ولا اقل .. ولاّخل يستانسون ويفرحون هذا يومهم بس اوصي اهلهم يفتحون عيونهم هذيلة عيالي وأحبهم

انا: انشالة يا يمة الكل يسمعج ويلبي ندائج... أنزين يمة كلمينا عن التجربة الديمقراطية؟

الكويت: شوف يا وليدي.. بالاول كنت صج مثل العروس اللي فرحتها دايمة .. بس عقب مادري شفيهم بعض اعيالي قاموا يستخدمون الحرية بطريقة تجرحني .. ويأذوني وتعبوني وكبروني عشرين سنة.. وأنا عتبانة عليهم وماخذة بخاطري منهم

أنا: من منو بالضبط؟

الكويت: من النواب والحكومة.. عيل يا وليدي انا امهم يهملوني وشوهون سمعتي وبوقوني ويمسحون تاريخي الإقتصادي والرياضي والسياسي؟؟ أنا يتاجرون فيني بالإقامات وايبون خلق الله يعربدون بديرتي؟؟ أنا يخلوني ويشتغلون برة وياخذون معاشات من والوزارات وهم مايداومون؟؟ أنا اللي عمري ما بخلت عليهم بشي.. جذي يسوون فيني؟؟ ليش أنا ماني أمهم؟؟ ما ربيت وتعبت ودرّست وعالجت وزوجت وصرفت؟؟ شوف يا وليدي يزا الوالدين على الله .بس انا بعد ماني صغيرة وابي ارتاح باجي عمري

انا: والله كلامج عدل يا يمه.. طيب وشتقولين بعيد التحرير؟؟

الكويت: ايييه يا وليدي الحمد لله على كل حال.. انا صج إني تحررت من صدام وجنوده لكن تحريري هذا كان تحرير جسدي وجسمي.. لكن قلبي مازال بالغزو وماتحرر!!
أنا : أشلون يمه؟؟ فسريلي أكثر!! منو اللي غازي قلبج؟
الكويت: شوف يمه.. بعض إعيالي الله يهداهم ليلحين محتليني ويضايقوني بتصرفاتهم ويبوقوني وينهبوني وعاملوني جني مؤقتة وياخذون مني مااتخذ ولا يعطون وبخيلين حتى بحبهم لي.. يشوهون صورتي وما يعمرون فيني كثر ما يهدمون اللي سويتا لهم.. ويعاملوني بجفا .. هذا وانا اللي عطيتهم وربيتهم وكبرتهم وداويتهم ودرستهم وما خليت شي بخاطرهم إلا وسويته.. انا ربيت يا وليدي ولغيري صفيت!!
(تخنقها العبره وتنزل دموع الكويت)

إعزائي المشاهدين.... فاصل ونعود إليكم



أنا: يا يمة إحنا الخطاوي الأكيدة على دروب الأمل .. مثل الرياح العنيدة ماقط عرفنا الملل .. وصدقيني فينا الخير.. عموما كنا أنتكلم عن سبب عدم تحرير قلبج .. كمليلي لو سمحتي
الكويت: أكيد فيكم الأمل أنا من لي غيركم ....شوف يا وليدي بالأول أعيالي كانوا يحبوني وكانوا ايد وحدة واليوم الكل ينهش فيني تحت راية (من صادها عشى عيالة) عيل يرضيك واحد من إعيالي يبوقني وأنا في عز أزمتي ؟؟ يرضيك مستشفياتي ليلحين من أيام صباح السالم وعبدالله السالم؟؟ يرضيك يا وليدي إني أنباق كل يوم من المسؤولين؟؟ يرضيك يشوفوني بغرق وهم يتكلمون بأتفة الأمور؟؟ ليش؟؟ ماني أمهم؟؟ مالي حق عليهم؟؟
ماجني ضحيت وصبرت ايام الفقر والشقى عليهم ويوم إن ربي عطاني الخير يبوقونة؟؟
يرضيك ولا يرضي ربي اللي قاعد يصير فيني هالأيام؟؟ أتهقى أنا استاهل اللي قاعد يسوونة فيني؟؟ شتتوا عمرهم ما بين حدس وسلف ودستوريون وشعبي و و و و .. أنا يوم إني ربيتكم ربيتكم كويتين .. شولة تفرقون عمركم وتسوون جذي؟؟ يرضيك يا وليدي؟
أنا : لا حشى ما يرضيني
الكويت: عيل انا عقب العز والخير اللي ما بخلت علية عليهم اليوم قاعد يبربسون فيني وبالجنسية يعطونها عوير وزوير؟؟ انا اعطيهم الخير يا وليدي يروحون يبطلون جرايد وسبون بعضعم بعض ويضروني فيها؟؟ يفتحون لهم قنوات بالتلفزيون يقولون كلمه حق يراد بها باطل؟؟
اعيالي تعبوني بس شسوي أحبهم وقلب الأم ما يكره .بس الرحمة واجبة ابيهم يرحموني حرام عليهم!!
أنا : انشاء الله يا يمة إعيالج بيسمعون ونفذون واليوم إحنا نبيج تستانسين لأن حنا بعد بنفرح في عيدج ونبيج تفرحين معانا
الكويت : وين الفرح يا وليدي ؟؟ شخبار الفرح؟؟ هذا نسيتة من زمان من يوم طلعولنا هاللي يدعون الإسلام وجنة حنا مانعرف الدين؟؟ ومنعونا من الوناسة والحفلات والفرحة
أنا : لكن حنا نبيج تفرحين وتفتخرين فينا
الكويت: شوف يا وليدي .. مامن فرحه إلا إذا تركتوا حسدكم مع بعض وصرتوا إيد وحدة ونبذتوا الحقد والكرة بينكم وابتعدتوا عن الفتن
تبيني أفرح؟؟ افرح إذا ديمقراطيتكم صارت مثل الاول وحكومتكم اقضبوها ناس تفهم وتقدر يعني شنو الكويت
تبيني أفرح ؟؟ افرح إذا كل واحد بهالديره كبيرها قبل صغيرها عرف إنة ما يسوى بيزة بدون امان وإزهار هالبلد
ما افرح إلا إذا حبيتوني مثل ما احبكم
إذا سموا شارع بالرميثية بإسم يزيد بن معاوية
إذا سموا شارع في كيفان بإسم الحسين بن علي
إذا غلوم بنى مسجد وسماة مسجد ابو بكر الصديق
إذا صالح بني مسجد وسماه مسجد على بن ابي طالب
إذا نجح عمر في صف ابلة معصومة
إذا نجحت زهرة في محاضرة الدكتور عبدالرحمن
إذا دشتي ناسبوا بورسلي
إذا الهاجري خذوا من بهبهاني
إذا الديّن تزوج سفور
إذا المتنقبة خذت واحد حسابة بالوطني
إذا البدوي سكن النزهة
إذا الحضري سكن الجهرا
إذا الشيعي سكن بالروضة
إذا السني سكن بالمنصورية
إذا حيدر شجع القادسية
إذا مناور شجع العربي
إذا عبدالمحسن سمى بنتة خديجة
إذا جعفر سمى بنتة عايشة
إذا ولد الساير شرى له مرسيدس البشر
إذا ولد البشر فتح له بي إم الغانم
إذا ولد الغانم اخذلة باترول البابطين
إذا بنت بهبهاني خذت لكزس الساير
إذا ولد الكاظمي فتحلة فولفو المطوع
إذا بنت المطوع شرت بورش بهبهاني
إذا النيدي باع عمارتة على العيمي
إذا العيمي باع اسهم شركتة على البدوي
إذا البدوي باع ياخورة على الحضري
إذا السني شرب فيمتو السيد
إذا الشيعي اكل كنار من سدرة مسيد العثمان
إذا البدوي فزع للحضري
إذاالحضري توسط للشيعي
إذا الشيعي جدّم السني
أنا يا وليدي مابي فتن تصير بينكم شوفوا الامم اللي قبلكم ما تفككوا إلا من الفتن والأحزاب والجماعات كلٍ يبي مصلحتة..أنا ابيكم تذوبون فيني مثل ما أنا ذايبة فيكم..
أنا ياوليدي يوم إن ربي عطاني من خيرة ؟؟ ماقلت هذا سني وهذا شيعي ولا قلت هذا بدوي وهذا حضري ولا قلت هذا اصيل وهذا بيسري؟؟
أنا اقول هذول إعيالي وياالله إرزقني وإرزق مني ... وعطيتهم كلهم نعمة الأمان والخير وإن جان من قصور تراهو مو مني من ضعفاء النفوس اللي يوزعون الحلال .. انتوا يا وليدي امانة برقبتي
أنا : ما قصرتي يا يمة وبيض الله ويهج وسامحينا إحنا مقصرين بحقج
الكويت: لا يا يمة أنا ترى ما ازعل على عمري.. أنا أزعل عليكم .. انا وانا امك يوم القيامة ربي ما راح يحاسبني .. يوم القيامة ربي يناديني وقولي يا أرض شهدي على أفعالهم ..وراح اشهد عليها .. وأنا ما يهون عليّ أشهد على عيالي وافعالهم الشينة.. أنا يا وليدي هذا اللي امعور قلبي
أنا: والله ما قصرتي يا يمة يا الغالية واسمحيلي ابوس إيدج وراسج... في كلمة اخيرة تحبين تقولينها لعيالج اليوم؟
الكويت: انا أحبكم بس في نفس الوقت زعلانة عليكم




وفي الختام يمة إسمحيلي أهديج هذي الاغنية بمناسبه عيدج يا الزينة..

فدوة لج عمري.. وكل اللي تبينه
عين خلّج ما تشوف.. إلا إنتي زينة
لا يازينة لا يازينة.. الزعل جايد علينا




ومع السلامة.........