ما تصبرنيش.. ما خلاص.. أنا فاض بيه ومليت .... بينلي إنت الإخلاص وانا اضحي مهما قسيت

إنما للصبر حدود
للصبر حدووووووود



الاثنين، 16 فبراير 2009

مقارنة بين الرجل والمرأة (ج)1

تحديث
العزيزة جندل/دنجل فتحت مدونتها
بالمبارك منج السوالف ومنا خبق الزبيل
التدخين آفة الله يفكنا منة

فهو مضيعة للمال والصحة ويجلب الرائحة الكريهة للملابس

وعلاوة على ذلك فأنا استخدم البخور والعود والكلونيات بشكل جنوني حتى تبقى ملابسى ريحتها طيبة وهم ما الحق

قبل لا سافرنا وحنا صغار انبقق اعيونها لا شفنا وحدة بالمطار ادّخن ولا بالسوق

شلون وليش حرمة تدخن؟؟ وعييب و و و و و ...

كبرنا وعرفنا ان السالفة بالنسبة لهم مافيها عيب.. مثل ما هي للريال .هي للحرمة وما قمنا انبقق اعيونا

ولكن مازلنا انبقق أعيونا لا شفنا كويتية تدخن!!

طبعا بحكم العادات والتقاليد وإن هذا الشي يدل على (يراعة)المرأة

أنا شخصيا ألعن اليوم اللي دخنت فية وكل يوم اقول اليوم ببطل وودي و جان زين اقدر ابطل هالملعونة وأفتك

وأنتقد المرأة اللي تدخن صراحة ولا تعجبني مو لأنها تدخن بس.. لان الفكرة نفسها فيها جرأة وتحدي وتقليد للرجل التافة اللي أنا منهم

وبعدين حلاتها المرأة ريحتها خنّة ونظيفة

وبعدين ما تقبلنا شكل المرأة بالكويت تدخن ولا ربينا وشفنا اهلنا وحريمنا يدخنون ... نعم اليوم قاموا بعض (الفصّع) يجاهرون في هالشي علني لا وعادي لا صادفتها بالمطار تقولك ممكن ولاعة!!؟؟

أنا في مكة واشوف حريم كويتيات يدخنون .. حرية ... كيفهم .. بس يا ربي أحس فيها شي غلط .... مو؟؟؟

شراكم أنتوا؟؟

عادي ولا مو عادي بغض النظر إنها مضرة ولا لأ

أنا اقصد الحريم الكويتيات فقط وليس الأجانب

وإذا اكتشفتوا ان عيالكم يدخنون بتعاملونهم مثل بعض ولا الصبي بتحن علية وبتهدة ..والبنت بتجبرها على ترك التدخين بالغصب؟؟

وشنو نظرتكم للمرأة المدخنة هل هي مثل الرجل ولا لأ

هناك 57 تعليقًا:

غير معرف يقول...

بتغير المود ؟

الديرة كلها مدخنه من اللي يصير

وقفت على الحريم

خلها على الله

حسافتج يا كويت يقول...

غير معروف

إن غيرنا المود واويلاه
وإن ما غيرنا المود وضلينا على السياسة هم واويلاه

شسوي؟؟

شور علي؟؟

أسوي مثل ما سوى سليمان بو الريش في آخر حلقة؟؟

غير معرف يقول...

العزيز حسافتج

التدخين آفة ... الله يهديك ويكفيك شرها وتتركها


من وجهة نظري الشخصية

ان لا يدخن الرجل ولا المرأة ...


التدخين بحد ذاته بالنسبة لي شي مقرف ... شيء كريه .. لا من صحة ولا من رائحة

وبالنسبة للمرأة ... سواءا كانت تلك المرأة بنت بلدي الكويتية ام كانت اجنبية فهن على حد سواء عندي ... رفض تام للتدخين ...

فهو مرفوض ليس فقط عرفا و دينا بل حتى جماليا .. فمثل ما قلت المرأة بطبيعتها هي مخلوق ناعم رقيق وتشويه لها ان تدخن ... ناهيك عن نظرة المجتمع لها و لو ان اصبح في الوقت الراهن مشهد طبيعي جدا انك تشوف كل يوم وحدة تدخن عادي عيني عينك !!!



انا من اشد رافضي التدخين سواءا كان رجلا ام انثى

ودمت بخير وسلام

غير معرف يقول...

ما اقصد لا تغير

اقصد كل الطرق تؤدي الى الخراب ( قصدي السياسة )

الله يعينا

ما اعرف سليمان ولا اعرف اشسوى

بس ما اظن يفرق شي بهالوقت

الضبابي او الاغبر

في كل الاحوال الرؤية معدومة

شفت شلون يصير الحجي كله سياسية


خلك على اللي انت عليه

وطنشني
ما واري الا الغثا

enter-q8 يقول...

تبي الصج ما ادري لأني ادخن
بس من داخلي ارفض المرأه اللي تدخن

الدســتور يقول...

تعال القهوة وشوفهم مع الشيشة

chandal/danchal!! يقول...

جدة غيــــــــــــــر




نظرتي ما قامت تفرق... لتنين مالهمشي لازمة... بالزمانات كانت المرة اللي تلبس النظارة الشمسية شيقولون عنها... انا اقول دع الخلق للخالق... خو مو منكر!!!
بس لي عيالي و STOP... على قولة واحد كويتي قتشة و يبي يرطن مصري مع التاكسي يقوله
(كيــور ورد من قديد)

ساره النومس يقول...

مممممممممممم



هذي الدنيا بعد شتسوي؟

أتيت متاخرة يقول...

رايي كحرمة ترى خليجية أولا وبحرينية ثانيا

موحلوة كلش المرة تدخن
لعدة اسباب نفسيةوصحيةوجمالية واجتماعية
خلنا من هذا كله وأمسك الجمالية
لأن أهم شي عند المرةتتم حلوة وشابة علىطووووووووول
ترى التدخين يأثر على البشرة ويخلي التجاعيد فيها تزيد والاسنان وعووووووووو تخليهم لوعة
بالله شلون بتجابلين ريلج وريحة الزقاير فايحة
ولا تقولون لي معسل ولا غيرة
ترى العن وادمر

حسافتج
ابي وحدة تخاف على بشرتها واسنانها وريحتها تقول آآآآآآآآآآآبي آدخن
يبة خلي التدخين عنج وخليها للرياييل
كيفهم خلهم يموتون ناقصين عمر
وصيري أنتي والزقاير عليهم

مو هي أنثى مثلج !!!!!

أتيت متاخرة يقول...

يبه لا تسوي مثل سليمان
أبو الريش
خلك هني ابرك

ANGEL HEART يقول...

انا من كارهين التدخين للرجل والمراه

بس فعلا ماحب منظر الوحده ادخن او تستخدم شيشه مو لايق احسه ياثر على انوثتها ..

و تبقى حريه شخصيه

تحياتي:)

كبرياء وردة يقول...

اكره التدخن بالنسبة للجنسين

بس منظر البنت اللي تدخن صج صج ينرفزني احسه يتناقض مع رقتها وانوثتها

bof-10 يقول...

في نظري ..... انه هذي حريه شخصيه دام انها مالها شغل في احد وتدخن في اماكن المخصصه .. ف انا اقول خلهم على التدخين لا يبلشون فينا

esTeKaNa يقول...

الحقيقه :
ان التدخين شي كريه بالنسبه لي بالنسبه للرجل والمرأه!!
عافاك الله من ما ابتلاك فيه
وعافي اخواني الله يهديهم وياك:(
اما بالنسبه للمرأه:
فالعرف والتقاليد هي التي جعلتنا نستنكر هذا الشي بقوة ما شفنا باهلنا ولا بأمهاتنا فشي طبيعي نستغربه
:(
واذكر قبل فتره انا بالمطار معاي ولد عمتي عمره اربع سنين
شاف واحده تدخن فضحني
وقف جبالها عيييييييب
عيييييييييييب
يا حبيبي تعال مالنا شغل
تصدق ضحكني فضحنا على كبر المطار
وهو ياهل
بس الفطرة
:))

Super Woman يقول...

لاااااااااااااااااا للمرأه المدخنه



والريال خلني ساكته
ما اقدر اتكلم وعندي احد بالبيت يدخن
:(


والله يقدرك عليها

حسافتج يا كويت يقول...

الموت يعشق

عدل كلامج والله

ويا رب افتك منها

دعواتك

حسافتج يا كويت يقول...

غير معروف


هههههههههه
ما اقدر اقول شي لان كلامك عدل والله

ومحشوم ما اطنش احد انا

حسافتج يا كويت يقول...

انتر


عطيتني المفيد المختصر

ههههههههه

حسافتج يا كويت يقول...

ابو الدستور


مابي اضيق خلقي زيادة

nanonano يقول...

الصج
الصج
الصج

أنا بالنسبه لي نفس الشي

أهيه عاده مضره..و روائحها بايخه..فاللي ينطبق على الرجل ينطبق على المرأه

و الله أنا عندي عادي

بس لي الحين أخترع لما أشوف وحده بمكان عام تدخن..و اللي يخرعني زياده لما أعرف أعمارهم بعد

تصدّق الغريب أن عندنا بس أحنا بالكويت اللي وايد مستنكر موضوع المرأه تدخن...ترا دول الخليج أغلبها عندهم عادي

Love Moments يقول...

مممممم
انا باليالله قاعده ابلع اللي عندي والسبه هالزقاير !!
شلون المره .. اصلا الزقاره تجرد المره من أنوثتها اتصير انوثتها قاسيه وهي المرفروض تكون ناعمه

وبعدين انا اشوف عوايل عادي راضيين على حريمهم انهم يدخنون .. بس تلقاهم جدام الناس يستحون ويعارضون

واللله مااادري يا حسافتج احنا لي الحين نشوفها عيب ومايصير بس اغلب الناس يشوفونها عادي الحين !!

حسافتج يا كويت يقول...

جندل


ههههههههه

عجبتني لي اعيالي وستوب

وعموما انا شفتج اليوم تحوسين بالضجيج تلقطين أثاث المدونة اليديدة

بالبركة مقدما

حسافتج يا كويت يقول...

طموحة


مانسوي شي

شبيدنا نسوي

حسافتج يا كويت يقول...

اتيت متأخرة

اوافقج الراي تماما

حسافتج يا كويت يقول...

اتيت متأخرة

لوووووووووووووووووول

حسافتج يا كويت يقول...

آنجل

فعلا بس حرية مقززة صراحة

حسافتج يا كويت يقول...

كبرياء وردة

صدقتي عزيزتي

حسافتج يا كويت يقول...

بو فتين

وجهه نظر

مركبنا يقول...

اليوم في شئ مو طبيعي جنوب السرة منزل قصة
وانت منزل موضوع اجتماعي
لالالا
اكيد صاير شئ
حرب الغبراء خلصت ولا شنوا السالفه
حدس اسحبت استجوابها ،،
والمليفي قال خلاص اخر مرة واتوب
ولا شنوا !!!!!

=====
موضوعك حلو يا خوي
اولا : مجتمعنا يعتبر ان التدخين صفة رجوليه بحته !!!
تعود الرجال قبل انه يشرب تتن ولا جقاير ،،،
وتاصل فينا هل الشئ
فلما دخن مرة تصير جنها لابسه مكسر رغم ان المكسر بنطرون قطن !!!

حسافتج يا كويت يقول...

إستكانة

اوافقج الراي يا القاطعة

انا وما فيني خير اساسا بس اتني فيج خير وانا ادري

خلج احسن مني

وادري والله مقصر

والياهل هذا يبيلنا منه 50 واحد ماشاء الله نحطهم اعضاء بالمجلس بالمستقبل

حسافتج يا كويت يقول...

شلالات

هههههههههههههههه

لونج تايم فقدناج

حسافتج يا كويت يقول...

نانو
اعتقد ان الدول الخليجية نسبة حرية المرأة قليلة

كانت

وممكن اخذا الزقارة تسلية

يمكن مو اكيد
وبعدين تركيبه الدول الخليجية غير عن تركيبة الكويت

مادري مابي اخوره بس اعتقد جذي

حسافتج يا كويت يقول...

فيوليتا

انا معاج انها عيب وما ارضاها لو شنو

بس انا اتكلم من منظور الحرية ومنظور واقعنا اليوم

حسافتج يا كويت يقول...

مركبنا


شسوي شبيتوا على شبة

الكل قام يقول مدونتك اتضيق الخلق

شسوي؟؟

ويمكن المدون العزيز جنوب السرة حاشة اللي حاشني

أما بخصوص موضوعنا اليوم

اوافقج الراي مليون بالمية

Miznah يقول...

السلام

كلنا نتفق انه التدخين مضر و عاده سيئه..
و لكن ممكن تفهموني كيف ربطتم التدخين بالانوثه او الرجوله؟

و شكرا

Kuwait يقول...

@@
تقول اتدخن ؟؟
الحين البنات يسابقون الشباب على القهاوي وانت للحين واقف على التدخين !!
اقصد بالقهاوي هذول الي تروحون لهم انتوا يالرياييل وتقعدون جنكم دوانيه وتجابلون المباريات ماعرف شتسمونها :)

حسافتج يا كويت يقول...

مزنه

العادات والتقاليد اربطتها مو انا والله العظيم

حسافتج يا كويت يقول...

كويت

انا ما اروح قهاوي ولا اواطنها

Mohammad Al-Yousifi يقول...

أوصخ عادة

سواء من مرأة او رجل

حسافتج يا كويت يقول...

مطقوق


مشكوور

صبا يقول...

جبدي تقلب من ريحة الزقاير
الله يعين المدخنين المدمنين على الزقاير...

بالنسبه لي انا ما حبها كلش
ولا يمكن استطعمها ...

يكفي انه مضر وريحته تييب اليهد

bo shnan يقول...

يا جماعة ما صارت عادات و تقاليد سوت الديرة سجن كبير و كلكم السجانين
الحين جميلات هوليود الي حاطينهم خلفيات و سكرين سيفر بلابتوباتكم يدخنون عادي لا و سكسي عليهم بس الكويتيات اذا دخنوا يفقدون انوثتهم
مو قبل كانوا يقولون عيب المرة تتعلم و مو لايق عليها
و كانوا يقولون عيب الريال يلبس مكسر

يا بنات يا حلوين نصيحة لا تدخنون .. بس الي تدخن بالخشاشي .. اقولكم لا تردون على احد و دخنوا بالسوق .. حلاة التمرد عليكم . بسنا قيووووود .. والي تشوفونه يخزكم يعني يكون مستنكر .. نفخوا بويهه

a7ibich yl KWT يقول...

تصدق

أنا مادري شلون انتشرت هالعادة بالديرة

ووين كنت لمن صار كل هذا

قمت أسمع ان سالفة تدخين البنات صار عادي عيني عينك.

واللي تبي تدخن تروح المطار

بس أنا ما اتقبل البنت اللي تدخن لووووو شنو
وتطيح من عيني
منظر مو كلاس كلش

غير معرف يقول...

ياكرهها الزقارة ما احبها

بس انا ضد التمييز بالجنس
التدخين بحد ذاته عادة شخصية الناس احرار فيها، رجال ونساء، دام انهم ماضروا احد هم احرار


اما التدخين في الاماكن العامة فهو قليل ادب .. سواء كان مدخن او كانت مدخنة .. عيب انهم يلوثون الهواء اللي احنا قاعدين فيه عيب عيب عيب

Miznah يقول...

مبيوق,

انا في اعتقادي البسيط انها مسأله شخصيه بحته. الرجال ام النساء, ان اقبلوا عليها بدافع التقليد ام الفراغ ام التسليه فهي بالتالي مجرد اداة يستخدمها المدخن للتعبير او التنفيه..
انا كثيرا ما ارى السيجاره(طريقة حملها بين الأصابع و المز والنفث للدخان) على بعض الرجال او النساء مثيره!
لا ادري كيف أصبحت السيجاره هي التي تقرر رجولة الرجل و استرجال المرأه؟
و ليس فقط "التشبه" بالرجال و لكن نعت بعض الناس للمرأه المدخنه بالساقطه والغير متربيه؟

هذا منطق؟
يا للعجب..

فالعادات والتقاليد تختلف من بيت لبيت بعض الشيء.. والتقاليد دائما في تجدد و تغيير.. هذا اذا كان الشخص يريد ذلك..

و دمتم

كويــتي لايــعه كبــده يقول...

عادة كريهة للجنسين

لكن المرأه اللي تدخن بركبها العيب أكثر من الرجل فوق انها تسد النفس

Eng_Q8 يقول...

ما اتقبل وحده ادخن بس مو كويتيه عادي :q

واذا شفت ولدي بينطق واذا بنت بتنذبح انشالله

فريج سعود يقول...

اثارة

`~MnO YeNSa! ~` يقول...

كلش ولا سليمان بوالريش

انا استنكرها على الشباب
الحين الحريم لا لا ..اصلا مو حلوة

دمت بخير يا حسافتج

lawyer يقول...

صباحك خير انشاء الله


واي توا فاجني راسي عقب القهوه ..

اولا ابي اناقش الموضوع من السؤال الاخير عن الابن و البنت

ككوني لي الحين ما صرت ام الا لولد فقط
فاقدر اقولك انه ( اخوي الصغير)
انت تحطه في الظروف الزينه و تغرس فيه كره الزقاير و تعلمه مضارها و الي عليك تسويه


انا اول يوم شميت ريحه فيه بغييييييت انجلط

لا تضحك علي بس فعلا كنت افكر هل ازفه و اعاقبه و ماراح استفيد شي طبعا

او اني اسوي نفسي ما ادري

فاخترت الحل الوسط و استخدمت كل وساااااائل التمثيل و المحايله و قمت اصييييييح عنده و اقوله شفت فلااااااان يتم مرته و عمرها 30 سنه عشان الزقاره

و فلان توفى عمره كذا وكذا من الكانسر و السبه الزقاره


انا ماعندي في هالدنيا الا انت اشوووووفك تذبح نفسك ما اقدر


و فعلا من داخلي محترقه و مت قهر و شاف قهري ويدري اشكثر احبه و اموت عليه و من خوفي عليه

بطل اسبوعين و رد بس عمره ما يدخن في البيت ولا جدامي و واذا دش سبح على طول و بعدها قلت له فلان اذا انت تحافظ على مشاعرنا من تدخينك فمن باب اولى تحافظ على صحتك هذي امااااانه


ويبقى دوري في الدعاء له بتركها و بنصحه بين فتره و فتره الريال مو صغير عمره 18 وعلى قناعتي انه مايعرف مصلحته و لكن لازم اعزز فيه انك ريال و ابخض و انك صاحب قرار و من هالامور الي تزيد من تقديره لنفسه حتى يتخذ القرار الصحيح وهو ترك الزقاره





نرجع لموضوع تدخين المرأه الكويتيه و شنو رايكم فيه


انا مع الايه الكريمه اذا بليتم فاستتروا وماله داعي ابدا البنت اتحط الزقاره في الاماكن العامه لانه فقط شكلها مبتذل و لا راح يحترمها رجل

وما اعتقد في بنت ترضى على نفسها بان يستحقرها رجل و ماكو ريال كفو ان يتجرأ على بنت في نظره او نقد



اما من باب الفرق انا ماشوف فرق بين تدخين المرأه و الرجل لسبب منطقي

اذا المرأه دخنت صحتها بتروح و الريال اذا دخن هم صحته بتروح






وعلى طاري جرأه البنت في طلب ولاعه يااااااااااا اخي افهم قاعد اتحرش و هذي الوسيله الي تبيك تنتبه لهاااااا

;)

another day يقول...

المرأه المدخنه أكبر مشكله
لأنها وصلت لأعلى مراحل الجرأه
مايردعها شي
لا عادات لا تقاليد
وممكن أتسوي أي شي
لأن المتحكم الأول فيها مزاجها
المزاج المتقلب

وياليت كل المدخنين والكلام لج يا جاره

يبطلون التدخين لأن ريحتها ذبحتني ضيعت ريحة البخور اللي فيني

JooJ o MaJooJ يقول...

ويه يا حسافتج ألحين صارت الشيشة عند البنات جنها خطة الكحلة لا او بعد إتشيش مع أمها و خوانها او 3/4 الكويتياات جذي حتاً الحريم لا او على كبر بعد دخنوا...بس اناإهية اةلا مظرة او ثانيا منظر البنت إكون حقير وهي إتدخن+ ماتعودنا على جذي و لي يومك أنا أبقق عيوني بس مو إذا شفت إذا شميت من مرة او بنت ريحة التتن تغيروا والله بنات الكويت لا حيا و لا مستحى...
جوووج

I7na 3shagnaha يقول...

i think ليما الحين شكل البنت الكويتيه مو حلو و مستنكر وهي تدخن أو تأرجل بعد ..و إنشاء الله عمره هالشيء ما يصير عادي. مو كافي اللي إحنا فيه

ZooZ "3grbgr" يقول...

ببساطه واختصار

أكره التدخين

والمدخنين

من الجنسين

ما أتقبل فكرة إن الانسان يكون ضعيف جدام شي طول صبعه

شلون أعتمد عليه بشي جايد

!!

chandal/danchal!! يقول...

لول

الله يبارك فيك

حست حوسة بعلي عبد الوهاب

تم الارسال يمكنكم زيارة المدونة

ياااااااااالللهههه بالستر

chandal/danchal!! يقول...

زايدة تحديثاتك بسبتي

عسى على سنع!

شكرا على خبق الزبيل

:)

mo3ath يقول...

لم ولن اقبل

وبالنسبه حق :
وإذا اكتشفتوا ان عيالكم يدخنون بتعاملونهم مثل بعض ولا الصبي بتحن علية وبتهدة ..والبنت بتجبرها على ترك التدخين بالغصب؟؟

على الاقل الصبي تعرف ليش يدخن ومن شنو ، البنت شنو حادها ؟