ما تصبرنيش.. ما خلاص.. أنا فاض بيه ومليت .... بينلي إنت الإخلاص وانا اضحي مهما قسيت

إنما للصبر حدود
للصبر حدووووووود



الجمعة، 20 فبراير 2009

شسم أمك؟؟

منذ ثلاث سنين تقريبا إنعزمت في مزرعة بالزلفي ورحت أزورهم وكنا شابين النار وجاي على النار والقعدة حلوة والبراد عجيب

وفجأة يانا واحد ما اعرفة هم عازمينة لكنة تأخر .. وأول ما وصل قال حق صاحب العزيمة (( إسمحلي يا سعود بس تكرم العجوز وديناها المستشفى وتأخرت))

أنا طبعا ما فهمت شقال ولا لقطت إلا تكرم والمستشفى!!

فملت لصاحبي وقلتلة شقال؟؟

جان يقول انة ودى العجوز للمستشفى..

وقلتلة أي عجوز ؟

قال : أمة

قلت: يقول عن أمة تكرم؟؟ وقول عنها العجوز؟؟

انا عصبت هني وبط جبدي بس انطميت لأني ضيف ومابي ارد علية ..

موقف ثاني حصل لي وأنا بالطيارة متوجة لإحدى الدول الخليجية.. ويقعد يمي واحد وطقها سالفة معاي .وكل دقيقة الأهل والأهل.. جان آخذ الأهل ووديهم ...وبعدين قالولي الأهل.. وانا رايح وياة حسبالي انة يسولف عن أهلة .. لين قالي ويالله بالغصب لقيتلي تذكرتين لأسبانيا أنا والأهل!!

جان اقولة شلون والباجي وينهم؟؟ اثاري الريال اتكلم عن زوجتة ومسميها الأهل؟؟

ليش ما أدري



موقف ثالث..

أذكر يوم إني ياهل عمري 6 سنين واحد معانا بالمدرسة سأله واحد من ربعي انت شسم أمك؟؟

تدرون شقال له ؟؟

قاله وأنت شكوووو ما تستحي؟؟ وهدنا وراح وبعد شوي نادتهم الاخصائية الإجتماعية ومادري أشصار عقب نسيت بس الولد راح يشتكي على صاحبنا والسبه سأل عن اسم أمة .....وأحنا يهال!!



الغريب بالأمر في ناس تستحي تقول أسم أمهم أو زوجاتهم وتلاقية يقول (إي واللة رحت أنا والمرة او أنا والأهل) او تلاقية يتحاشى يقولك إسم زوجتة!!

أو وهو يسولف من بين السوالف ما يحاول ايب طاري إسمها او إسم أمة أو إختة او إسم أي وحدة اساساً !!

طبعا أنا ما أقصد الريال يتعمد يقول أسم زوجتة أو أمة او اسماء الحريم عموما .أو أن يكون (كوكو)

أنا أقصد الناس اللي ما يقولون الإسم عمدا لسبب واحد أنة يحتقر المرأه او يحس ان ذكر إسم المرأة على لسانة هو إذلال وتنزيل من حقة وهيبتة(طيح الله هيبتة)



الإسلام وتاريخنا كانا يفتخرون بإسم المرأة فالرسول عليه الصلاه والسلام كان يسمي زوجاتة بأسمائهم فهذي عائشة وخديجة وغيرهم رضي الله عنهم
وكلنا نعرف اسم أم الرسول آمنة ومرضعتة حليمة و بنات الرسول فاطمة وزينب ورقية وأم كلثوم
وغيرهم من نساء التاريخ كبلقيس و سارّه وهاجر ومريم وغيرهم
الجميع ذكروا ولم يكن في ذكرهم أي حرج؟!؟!
وحتى بعد ذلك فهناك قبائل تفتخر بأنها اخوان نورة واخوان مريم واخوان سارة واخوان طيبة وووو؟؟
ليش هالعُقد؟؟
أرجع واقول أنا ما اقول امشوا وقولوا اسماء اهلكم في كل سالفة ؟؟
أنا قصدي من هالموضوع ليش بعض الناس يتحرجون إذا تداعت الأمور لذكر اسم زوجاتهم وامهاتهم ان يذكورهم؟؟
هل انتم افضل من الرسول؟؟ ام ان نساؤكم افضل من نسائة؟؟
هذي عقد وإستهزاء بالمرأة التي كرمها الإسلام ووصى عليها النبي بأخر لحظات حياتة
فالرجل اللي قال (تكرم العجوز) ويقصد أمة ... هذا شنو عقابة عن الله
لعن ابوك يا الثور هذي أمك تقوا عنها تكرم؟؟ هذي حلوة اللبن تقول عنها عجوز؟؟ اعجزك الله وكسر ريولك وقص لسانك بعد..
كرموا المراة وأعطوها حقها وعزوها ورزوها فوالله ما قامت هالأمم إلا من بين ايديهم وتربيتهم

هناك 51 تعليقًا:

enter-q8 يقول...

معليش مبيوق بس ابي افهم المثال اللي ضربته على اللي جنبك بالطيارة
شتبيه يقول بالله عليك
انا و سبيكة رحنا ملقا
اكيد بترد عليه بتقوله منو سبيكه
بيقولك اهلي
الاهل كلمة الأهل متدواله من زمان و يشار اليها كذلك الى البيت

ما ادري ليش ودي أسألك الجسار الله يرحمه شيصير لك

لأن اهو اللي بالكويت اللي يسأل هالسؤال

حسافتج يا كويت يقول...

أنتر


لوووووووووووووووووووول


صح صح هههههههههه

لا يا حبيبي يقولي زوجتي
يقول أم إعيالي مابي اسم زوجتة انا
القصد إنة ليش ما يوضح وقول زوجتي
الاهل تعني الأهل ولا تعني زوجتي

ليش إتحرج من أنة يقول زوجتي او مرتي او ام إعيالي او حتى المرة

enter-q8 يقول...

مبيوق بس ترى كلمة الاهل تكبير و تقدير للزوجة
و البيت كذلك تكبير ايضا

شكله الله يرحمه أسألك هالسؤال

من المواقف اللي تذكرني فيه لما كنت أشتغل بالاعلام حزتها
و كانوا حطوا الحرس الوطني بعد التحرير رحمة الله عليه عارف طبعه و كنت في طريقي الى البوابة و العسكري شكله ما يعرفه فعصب عليه و قعد يقوله انت من ولده أمك شسمه بدوي و تقوله امك شسمها و ربك لا يفرغ مخزن السلاح اللي بأيده فيك
فا غمزت للعسكري وسلمت على المرحوم و تم تدارك الامر
سألني العسكري قالي اهو شيبي باسم أمي قلت له لن الله يرحمه أذا ما عرف ابوك اكيد بيعرف خوالك

JooJ o MaJooJ يقول...

اسم الله عليك مايمديني توني إمعلقه على بوستك الوطني ولا نزلت واحد ...
ماني امعلقة زيييييييين :P
جووج

حسافتج يا كويت يقول...

إنتر

المقصد من كلامي مو شرط يقول اسم زوجتة ولكن يوضح أن المقصود هو الزوجة

والتقدير أن أسمي الأشياء بأسمائها

وإذا بقدر أمي بقول الغالية أم أفلان مو الاهل لان الأهل تعني الاسرة

والمرحوم لي معاة صولات وجولات ويامي احرجني وفشلني

ههههههههه
الله يرحمة

Mohammad Al-Yousifi يقول...

ثقافة الصحراء

a7ibich yl KWT يقول...

انا ما فكرت فيها تصغير للمرأة
بس فيه رياييل مايحبون أحد يعرف أسامي خواتهم أو زوجاتهم مو تصغير بس يمكن عندهم عيب يمكن على حسب البيئة اللي تربوا فيها

كا الحريم لي بغوا يسولفون عن ازواجهم مايقولون فلان ولا بو فلان يقولون ابونا

أما تكرم هذي فمادري شيقصد من وراها!

Love Moments يقول...

الشخص اللي قال عن امه "تكرم عجوز" وارث هالشي من ابوه اكيد
وفي ناس جذي عقليتهم احنا نحب نمدح ونييب طاري امهاتنا واهم لي طروها قالاو "تكرم" !!!!!!!!!!!!

هذا يفسر نظرتهم للمرأه اجمالا !

nanonano يقول...

صـــــــــــــــــــــــــاج والله

الأهل

البيت

ميخالف أذا الريال كان كبير بالسن متعودين على نعت زوجاتهم بهالألقاب

بس واحد من أسنانا و يقول الأهل أو البيت..ليش ما تقول زوجتي

يعني ما أظن كلمة زوجتي أو أم فلان كلمه تقل من مقدارك أو تضيع من هيبتك

بس هم على راحته


أنا تدري شنو اللي يبط جبدي صج..و ينرفزني..و يطلعني من طوري

اللي يقعد يتمسخر على زوجته على باله أن خفيف طينه

JooJ o MaJooJ يقول...

صح لسانك والله
اتصدق من جم يوم انسولف في هالموضوع... شنو هالتحقير حق المره
ما يستحون.. بس لا تلومهم وانا اختك ناس جهله ما تعلمت و ما شافت الدنيا صح
مثل صاحبنا اللي ما قام حق تحيه العلم وقعد يلعب بالموبايل.. يقول اقوم حق خرجه؟؟
و موسيقى؟؟؟
الله يستر من هالاشكال

ماجووج

غير معرف يقول...

أخوي اسمح لي اخالفك الرأي

اعتقد ان تسمية الزوجة بالأهل أو البيت حالها حال لما تسولف مع الربع عن واحد ما يعرفونه...بتقولهم مرة واحد من الربع سوى جذيه أو مرة رفيجي قال جذيه... بكل بساطة انت ما تقول اسمه لأنهم ما يعرفونه... وهذا الشي ينطبق على الزوجة

والمقصد بكلامي ان كل هذي التسميات من الكلام العامي الدارج ما لها علاقة باحتقار او تصغير المرأة

اما الشي اللي احتقره فعلا هو اللفظ الثاني اللي قطه صاحبكم... تكرم... هذا هو التصغير والتحقير

وترى على فكرة البدو يسمون الأبو اذا كبر الشايب... والأم العجوز... طريقتهم

Purplecious يقول...

المداااااااااااااااااام

شزينها و شحلاتها

أنا و المدام

حسافتج اكو حلقه طاش ما طاش بس عاد ما أذكر أي جزء تناولوا هالموضوع.. ذكرتها لأن نفس الشي كان يقول عن امه العجوز!!! حتى لما وداها الطبيب يبون اسمها عشان يفتحون ملف عصب و ما رضى يقولهم اسمها لووول

آخر شي طلع ما يدري شنو اسم امه
هههههههههههه

بس غلطان ليش سكتت.. جان استفسرت ليش يقولون جذي بطريقه ذربه

Eng_Q8 يقول...

تكرم العجوز ؟!؟

اتوقع منهم هالحجي

خلني ساكت بس

غير معرف يقول...

يمكن اسمها (( تكرم ))!!!!!!
ما اعتقد فيها شي لما ينقال للزوجة أهلي
ما زوجي أنا اهو أهلي وطوايفي كلهم

حسافتج يا كويت يقول...

جووج

البوست القديم صارلة اكثر من 24 ساعة

حسافتج يا كويت يقول...

مطقوق

ثقافة قلة ادب

حسافتج يا كويت يقول...

أحبج يا الكويت

اللي مايحب يقول زوجتي يقول الوالدة

يقول إختي مو تكرم العجوز او يدودهنا وقول الاهل والناس تفهم إن يقصد عايلتة

حسافتج يا كويت يقول...

فيوليتا

مع الأسف ما ورث خير

حسافتج يا كويت يقول...

نانو

المقصد مو بس سناينا او كبار وصغار المقصد إحترام المرأة بالدرجة الاولى اللي لو ما إهيا جان ما طلع وقال تكرم على أمة


اما اللي يستخف دمة على مرتة فهذا يعيب على نفسة وأختيارة

حسافتج يا كويت يقول...

جوج

صاحبنا اللي ما قام علشان النشيد الوطني هذا مرفوع عنة القلم اصلا

حسافتج يا كويت يقول...

دروازة

انا معاك بس المصيبة إن نيتهم أنهم يخجلون ان يقولون زوجتي او ام العيال فيقول الاهل

ولو إن هالشي يخجل لما رويت الاحاديث عن عائشة رضي الله عنها وما ذكرت النساء بأسمائها قديما

الموضوع ما يعيب صدقني
بس التخلف

حسافتج يا كويت يقول...

بيربل

المدام هم حلوة مافيها شي

و صاحبنا سكت عنة لاني كنت امعصب وإذا عصبت انا افلت وما اقضب نفسي وانا كنت ضيف

ويا غريب كون اديب

حسافتج يا كويت يقول...

مهندسنا


الشكوة لله

Eng_Q8 يقول...

وهم ياخي شنو تبينا انقول اسامي خواتنا واهلنا جذي انقطهم قط

اهلي وخلاص اتوقع مفهومه يعني ؟!؟

حسافتج يا كويت يقول...

غير معروف


ما فيها شي لمن اقول عن زوجتي انها طوايف اهلي بعد
لكن لمن يكون القصد مدح

اما هذيلة قصدهم إخفاء صفة الزوجة وذكرت انا بالموضوع إن زوجات الرسول عليه الصلاة والسلام ينادونهم بإسمهم

انا ما اقولج نادوا زوجاتكم بأساميهم لكن سموهم بصفاتهم
وزجتي ام إعيالي ام فلان

ما فيها شي

حسافتج يا كويت يقول...

مهندسنا


لا ياخوي انا ما قول امش وقول اسامي اهلك

عزيزي القصد

العملية نسبية

يعني انا ما اعرفك اقولك والله إختي قالت او زوجتي سوت أو ام العيال فعلت
او الوالدة قالتلي

لكن في ناس اكلمون اخوانهم وصدقني يقول الاهل او البيت او حتى يقول زوجتي

الحين انت قاعد تكلم اخوك تقولة زوجتي؟؟

قوله بإسمها او أم فلان

اهم ما يقولون لانهم يستحون
ولا لو اهم ما يقولون لاي سبب ثاني جان ما كتبت هالموضوع

Fair.chair يقول...

لا أعلم من المتخلف الذي نشر هذه الخرافات بين المجتمع ...

بس يقول...

صباح الخير


اتقارن الاسلام بعصرنا ياحظي احسبها عدل احنا الجهل و اهما التقدم ؟ الله يرحم الحال وين وصلنا


صباحك رضا مع هالمطره :)

JooJ o MaJooJ يقول...

7asaftj the second comment wasnt me...was majooj...
j00j :p

بنت الشاميه يقول...

شوف الاسم ينقال على حسب الموقف

اذا ناس قربين جدا قد يكون صديق او من الاهل ينقال
الاسم عادي و مباشره

اما اذا ناس بعاد شويه
ينقال ام فلان او ابو فلان


واذا ناس ما نعرفهم ينقال
زوجتى او زوجى

هذا اللى تربينا عليه وهذا اللى نعرفه

اما عاد اللى يقول تكرم هذي مراه
ابط عيونهالثنتين.....وهمن ما تيرد جبدي

حسافتج يا كويت يقول...

فير

هذا انت قلتها متخلف!!

حسافتج يا كويت يقول...

بس


صباحج نوير اللي مو راضي يطلع ولا نشوفة هالسنة

انا سلمج الله ما اقارن انا قاعد اقول خل يكونون قدوة لنا

ولا اول يا زمان ارجع يا زمان اشيابنا لهم

حسافتج يا كويت يقول...

جووج


ههههههه
دودهتوني والله

حسافتج يا كويت يقول...

بنت الشامية


ما بعد كلامج كلام


صدقتي

bo bader يقول...

اتفاق كامل معاك عزيزي

هذه ما هي من عادات الكويت ، أبدا

أنا ٩٠بالمية من أهلي وربعي وجيراني يعرفون اسم زوجتي ووظيفتها وأفتخر بذلك لأنها تستحق !!

يقول عن أمه تكرم ، شهالحقارة !!

الرسول صلى الله عليه وسلم يقول للصحابي اللي يبي يجاهد ويترك أمه : إلزم قدميها ، فعندها الجنة وهالثور يقول عنها تكرم !!

لا حول ولا قوة إلا بالله

واحد من أهلنا والله أن عمره تعدى ال ٧٠ الله يذكره بالخير ويطول عمره في كل عزيمة عرس بالعايلة إذا أكل شي حلو وعجبه ، والله يتنقص منه حق زوجته ويأخذه معاه بماعون قصدير جدام العايلة كلها ويقول : هذا باخذه حق زوجتي حبيبتي !!

والأهل كلهم يعرفون سالفته هذه وعايلتنا كبيرة مو صغيرة والكل يمدحه على هالطبع الحلو فيه .

عاد يقول تكرم ، صج حرني !!

مال تبط عينه مثل ما قالت بنت الشامية .

تحياتي

Paris يقول...

انا بعد استغرب من الناس الي جي يعني يتكلمون و يقولون عن امهم عيوز هاي اول مرة اسمعها عاد و لا بسمعها بس عاد الي راح يتكلم عن اهله عاد مفروض يقول منو امي ابوي اخوي اختي عاد مو جي الاهل و بس اشدراه الي قاعد يتحجى له منو يقصد انا مرة استغربت يعني تسالني وحده شنو اسم امج عادي اقول و لمه سالتها الا تقول لا ما بقول عيب شنو عيب اومتى صارت عيب عادي شفيها شبسوون الاوادم لي قلتي اسم امج و بعضهم يستعيب من اسم امه

غير معرف يقول...

العزيز مبيوق

الناس بالكويت وعلى حسب العادات والتقاليد ... تجتنب ان تنطق اسماء امهاتم و خواتهم ليش مو بس لان الشخص يحس انها غلط او شيء غريب لا اصبح الشخص اللي يسمع من الثاني اسم اخته او امه يقول عنه هذا ما يستحي و مو ريال ولا عنده غارية!!!!

هذا واقع

وبعدين من غلط يقول اهلي بل بالعكس زوجته هي اهله وناسه ... وشتبي اكثر من جذي

وفي ناس تقول ام فلان او زوجتي او المدام او حرمنا او الاهل ... وكلها مسميات تعتبر لقب للزوجة و مافيها عيب او تقصير او تقليل من شأنها !!!

هذا رأيي

دمت بخير وسلام

chandal/danchal!! يقول...

@@

tsk tsk tsk tsk tsk

جان زين في اوبشين

PAUSE

لين ارد

-----------------------

لو الزوجة والا الام اسمهم (هايدي) جان محد قال الاهل والا المرة والا العجوز

Coffee يقول...

كلامك عجيب!! واتفق معاك..
واللي يقولون تكرم البدو اللي ليلحين غرقانين بالبداوه.. يفترض يقول امي او ابوي او الوالد او الوالده ويتبعهااب الله يطول بعمارهم مو عجوز وشايب!
ومن منظوري كانثى فعلا فيها تقليل شان كبير للمراه.. وخاصه ان الاسم له مكانه كبيره لنا كعرب وهم بعض الشعوب الاخرى.. وسالفة الاهل والبيت وام العيال (جنه مو اعياله حشا مكينة تفريخ مو زوجه) احسها اهانه للمراه.. الحجاره ذابحتهم ! والا مستحي ان عنده زوجه وخوات! تخلف يالله لا تبلانا.. دامه وايد مستحي لا ايييب طاريهم خير شر ابرك.. ولا عاد اذا تكلم جدام ربعه بصيغة جمع "شلونكم " "فيكم شي" "اكلمكم بعدين" لول مادري صراحه مخوخ يبيلها اعادة تاهيل.. ويفترض يقول حق ربعه القراب اسمها واسامي خواته عادي وحق الغرب يقول ام اعيالي او زوجتي او اختي.. اما هالكلمات السخيفه اللي يعني بتخليه ريال وحجر حدها طماشه .. وهم الحريم هابين بكلمة ابونا! شكو ابونا مادري ريلج صار ابوج! هزلت..
يا حلو الغزل.. راس المال.. عين السيح.. حشاشة يوفي وغيرها من كلمات انقرضت بهالزمن

الشيباني يقول...

العلم نور والجهل جور
الأخ العزيز مبيوق تحية طيبة
زائرك في الزلفي ظلم نفسه عندما قال تكرم لأمه فقط، ولكنه عربي طليق اللسان،واهل الجزيرة حالهم
بالفطرة فصحاء، ولكن جهلك اللغوي أعياك (وهو بالمصادفة معنى كلمة بايج ومبيوق)،أنظرالباحث العربي
(لسان العرب)
www.baheth.info

(أهل)"أهل الرجل أخص الناس به ، أهل بيت النبي صلى الله عليه وسلم أزواجه"، "أهل الرجل وأهلته زوجه"،"وتأهل :تزوج ،وأهل فلان إمرأةيأهل إذا تزوجها"
أما كلمة (عجوز)"قال الأزهري:
والعرب تقول لإمرأةالرجل وإن كانت شابة:هي عجوز وللزوج وإن كان حدثا: هو شيخها.
أما أنت فتقول(ياي) و(ريا ل) وهي ليست صحيحة لغويا فأخطأت ولنا منك الإعتذار.
ولايجوز ان يكون من صاحبت متخلفا وإلا فتكون انت كذلك ، وأمور كثيرة في تعامل الرجال انت تراخيت فيها، ومنها سترك على مجلس من إستضافك ، فلا يجوز لك أن تنتقد ضيوفه للعامة وإلا فقد اهنته ، وإذا تبي تعرف أكثر ممكن انسق لك دورة مكثفة في المجمعة في إجازتك.
اخوك الشيباني

حسافتج يا كويت يقول...

أخي الشيباني

اشكر نصائحك وأقدرها

وأسمحلي ان اوضح لك

أنا اكتب باللهجة العامية الكويتية التي افتخر بها
لذلك اكتب الريال بدلا من الرجل

وبالنسبة لمجلسي في المزرعة فصاحبي محترم ولم اغلط علية ولكن غلطت على المعزوم اللي قال تكرم العجوز وللعلم لست اعرفة واسم سعود اسم مستعار فأنا حريص على الايعرف احد من هو صاحب المزرعة

اما بخصوص مبيوق فهذي واضحة شتبيني اقول مثلا؟؟ مسروق؟؟

وبخصوص الاهل
عزيزي أنا اتكلم عن اللي يخجل عن ذكر زوجتة او امة ويختزلها في الاهل تصغيرا لا تكريما

وبخصوص العجوز والشايب
اعتقد ان والدينا يستحقون كلمة اذرب واحسن من كلمة عجوز وشايب
ليس العيب بالكلمة ولكن هناك كلمات افضل نكرم بها اهلينا

وأخيرا بخصوص تعليمي وتدريسي امور الرجال فمازال الغنسان يتعلم حتى مماتة وليس بها عيب
ولكني افضل ان اتعلمها من الدنيا وليس بطريقة التلقين


وشاكرلك جهدك عزيزي وإن اخطات فأنا اعمل ومن لا يعمن لا يخطئ
وإن اطبت فمن الله


وفمان الله (بالكويتي)
أي

في أمان الله (باللغة العربية)

حسافتج يا كويت يقول...

بو بدر

والله كلامك عدل

وهذا اللي قال تكرم وما تحط الجوتي بحلجة صج بط جبدي

حسافتج يا كويت يقول...

باريس


فعلا ساعات الواحد يضيع بالحجي إذا اللي جدامة مايعرف يوضح الامور

الاهل يعني الاهل والام تعني الام

وشكرا

حسافتج يا كويت يقول...

الموت يعشق


إذا الواحد يقولها من باب المدح فهذا شي حلو بس الجماعة يقولونها من باب الخجل

أنا هذا قصدي في الموضوع ليش الواحد يخجل

حسافتج يا كويت يقول...

جندل


لا والله يا زين حصة ونورة ولولوه وطيبة ودانة

انا لو اسم امي هايدي وزوجني نانسي استحي
جان صج اقول الاهل

حسافتج يا كويت يقول...

كوفي


صح يبطون جبدي اللي يتكلمون بصيغة الجمع

على فكرة صيغة الجمع تعني تكبير وتعظيم ولكن بعضهم يقولونها إستيحاء

الشيباني يقول...

عزيزي مبيوق ، لا شك رسالتك تدل على تواضعك و صدقك وحسك الإجتماعي وموضوعك يدل على نصرتك للمراة في المجتمع وهذا دور نبيل وكلنا نقف معك ونحارب من يقلل من شانها ودورها ، ونحن الكويتيين محافظين بطبعنا خلاف سمات التمدن الزائف ، وعدم زج أسماء بناتنا وزوجاتنا في أي موضوع عابر هو تقديروإحترام لهم وهذا هوطبع أهل الكويت المحافظين ، ولايليق بالرجل ان يدلع زوجته امام الرجال فذلك خاص بهم ، وتظل المرأة هي امنا وأختنا وزوجاتنا وبناتنا ومن يحقرها فقد حقر نفسه وهذا من المسلمات،ولايجوز أيضا نقد فئة في المجتمع كونها محافظة، فالأسلم العكس، ولك تحياتي الخالصة.

حسافتج يا كويت يقول...

عزيزي الشيباني

انا ما قلت نقول اسماء اهلنا

أنا قصدي ما في حرج في قول اسمائهن ومثلي في ذلك الرسول عليه الصلاة والسلام
والاحاديث كانت تروى عن عائشة وعن وفاطمة
فالرسول قال لو ان فاطمة بنت محمد ولم يقل لو ان اهلي او ابنتي

وكذلك أقصد من يقولون الاهل او الجماعة او البيت انهم يقولونها تصغيرا وليس تقديرا

فانا اقول عن امي او زوجتي احيانا أهلي ولكن من منطلق التقدير والحب وليس من منطلق اني خجلان

وشكرا للمتابعة مرة اخرى

om comment kuwait يقول...

للاسف توني اقرى الموضوع

صج مهم جدا
--------------------------------
و عجبني المقطع الاخير اقتبسه
"فالرجل اللي قال (تكرم العجوز) ويقصد أمة ... هذا شنو عقابة عن الله
لعن ابوك يا الثور هذي أمك تقوا عنها تكرم؟؟ هذي حلوة اللبن تقول عنها عجوز؟؟ اعجزك الله وكسر ريولك وقص لسانك بعد..
كرموا المراة وأعطوها حقها وعزوها ورزوها فوالله ما قامت هالأمم إلا من بين ايديهم وتربيتهم "

----------------------------
شلون يقول حق امه تكرم اللي ربته و شالته و حطته و سهرت على راحته
و اذكر بكلام المصطفى صلى الله عليه و سلم
(( امك ثم امك ثم امك ثم ابوك ..))
الله يقدرنا على رضاهم يارب
--------------------------
و شكرا على الطرح المميز:)

I7na 3shagnaha يقول...

خوش بوست.. نقطة خلاف بيني و بين زوجي اللي يعتبر متحضر وايد.. لكن لا يمكن يقول إسمي حتى مع أصحابه المقربين, علما ان اسمي ما يفشل.. مثل ما قلت .. الأهل.. البيت.. و إذا كاشخ قال أم فلان :)) احب إسمي و احب الناس تناديني فيه..

Unknown يقول...

مبيــــوق ...


شوف أنا من أهل السعودية ، وأحنى نقول للأم = العجوز ، ونقول للأب = الشايب لأنها متداوله بين الشباب ، طبعاً مو كل الناس كذا (كل واحد طبايعه غير عن الثاني) ...

وأنا طبعاً ما أقول كذا دائماً ...

وما أقصد أن أنقص من مكانتهم ولكن كلها تسميات ... وعلى فكره أنه لما أقول الشايب أحس أني أعظم أبوي مو (أحتقره أو أنزله من مكانته)...

بس العادة طبعاً أقول أبوي لأني متعود على كذا من (أهلي) ...

وبعدين لما تقول أن النبي - صلى الله عليه وسلم - يقول أسماء زوجاته أو بناته ، هذا لأنه زوجاته أمهات المأمنين ...
وبعدين لأنهم يروون الأحاديث من بعده ، يعني تتوقع أنه بيقولون أنه وحده من زوجات الرسول _ صلى الله عليه وسلم - أو أهله تقول: أن النبي قال أو فعل ... الخ ، ما يصلح ...

ومن نظري أنه ما فيها شي لما يقول الأهل أو البيت وما أتوقع أنه كان يستحقر أنه يقول أسم زوجته ...

بس كلمة (تكــرم) هذي !! (لا) غلطه من الرجال أمه ماهي شي نجس (تكرمون) ولكن الله يسامحه ...

على العموم أشكرك على موضوعك الجميل وكل عام وأنت (وأهلك) بخير ...