ما تصبرنيش.. ما خلاص.. أنا فاض بيه ومليت .... بينلي إنت الإخلاص وانا اضحي مهما قسيت

إنما للصبر حدود
للصبر حدووووووود



الاثنين، 2 فبراير 2009

غيبوبة امل


أمان=الكويت


زواج=بالكويت


أم وابو=كويتين


انولدت=بمستشفى كويتي


طعموني=ابلاش بالكويت


روضة= بفلوس الكويت


ابتدائي=بلفوس الكويت


متوسط=بلفوس الكويت


ثانوي=بفلوس الكويت


جامعة=بفلوس الكويت


أشتغلت بالحكومة او خاص= اللي وفرتلك الفرصة هي الكويت


شفتها= بسوق الكويت


حبيتها=بوسط غبار الكويت


خطبتها= بنت الكويت


تزوجتها=بدعم من الكويت


يبت أعيال= بمستشفيات الكويت


درستهم=بالكويت


بنيت بيتي= من الكويت


طحت مريض= عالجتني الكويت


دعم العمالة=من الكويت


بدل إيجار=من الكويت


حرية=عطتني إياها الكويت


عزة= علمتني إياها الكويت


كبرت اشوي= بتراب الكويت


تقاعدت= عطتني فلوسي الكويت


احتاج مساعدة= ساعدتني الكويت


اليوم يومي= أندفنت بالكويت




ألا تستحق تلك التي أعطت كل هذا وأكثر أن نحبها من قلب قلبنا؟؟


ألا تستحق أن نعطي لها شيء واحد من اللي عطتنا إياة


لو كل واحد تكفل بشي واحد فقط


تبون تعرفون شلون نرد الجميل؟؟


سهلة ورب الكعبة ما هي صعبة


كل كويتي لازم يسوي شي واحد فقط للكويت


كل اللي عليك إنك توقف 10 ثواني قبل لا تصوت لنائب معين وتعطي صوتك لشخص يخدم الكويت


وواحد ثاني يفكر يوفر فلوس الرشوة اللي طلبها منه موظف نفسة دنية ويبلغ عنة


وواحد ثالث يحاول يعلن يتجنب وضع إعلان لشركتة او شخصة في جريدة يهمها هدم الكويت


وواحد رابع يفكر يدرس عدل ويخدم نفسة والكويت


وخامس يفكر 5 ثواني فقط قبل لا يقط الكلينكس في شوارع الكويت


وسادس يدوس على عمرة ومشي معاملات خلق الله بالوزارة


وسابع كل يوم يأجل بوقتة اللي ببوقها من الوزارة إلى أن يطلع تقاعد


وثامن يشوف بناتة وعيالة شلابسين ووين رايحين لا طلعوا


وتاسع قضبلة نائب وشرشحة وقالة الشرهه علي اللي وصلتك


وعاشر .... الله يا العاشر ماراح يسوي إلا شي بسيط.. كل اللي علية ايمع اليهال بالزوارة وقول لهم الكلام اللي كتبتة فوق وعلمهم شنو عطتهم الكويت




ما ابالغ إذا قلت لكم بتعدل الحال وبيحيا الأمل بعد ما دخل الغيبوبة

هناك 47 تعليقًا:

نون النساء يقول...

كل اللي عليك إنك توقف 10 ثواني قبل لا تصوت لنائب معين وتعطي صوتك لشخص يخدم الكويت



هالعشر ثواني تسوى مستقبل ديره بحالها
وياليت نتعلم ....




الأمل وان دش غيبوبة
بس ما يموت ان شاء الله

:)

الزين يقول...

ربي يحفظ ديرتنا

وكلامك يعور القلب

بس ياليتهم يحسون

ياليتهم يتذكرون قبل لا يختارون

nanonano يقول...

بالضبط

الكويتي يعاني من (((سلبيـــه)))) رهيبه


لو كل كويتي قرر أن يعطي من روحه نتفه
مقابل الأشياء اللي عطتها أياه الكويت
جان ما صار هذا وضع البلد

عثماني يقول...

صح السانك والله يا مبيوق

قد اسمعت لو ناديت حيا ...

nikon 8 يقول...

الله يعطيك العافية ... نحتاج من يذكرنا بمثل هذا الكلام وبالذات في شهر إحتفلاتنا بالعيد الوطني ويوم التحرير :)
قواك الله وقوانا على رد الجميل للكويت :))

Mohammad Al-Yousifi يقول...

توارد خواطر

حياتي هدف مو عبث يقول...

أه عليج يا كويت وعلى عيالج

charisma يقول...

عماار يا كوييت علج عمار

صح السااانك

أبو لطيف يقول...

آآآآآآآآآآآآآهـ

الله يحفظها ويحفظكـ

BlogLess يقول...

كللللللللللللللل اللي ذكرته جميييل ومطلوب تطبيقه
وحسيت قلبي يعورني ودمعة وقفت على عتبة عيني وأنا أقرى إشكثر الكويت تعطي للي يستاهل وللي ما يستاهل
وما تطلب شي

لكن عندي لك عتاب بسيط
على الثامن اللي يشوف بناته وعياله إشلابسين ووين رايحين لا طلعوا

كأنك تقول إن البنات هم سبب البلاوي
ترى هالأمر يدخل ضمن إطار الحريات الشخصية

والأصح إن نطالب الشخص الثامن بتوعية أبناءه وبناته وشغل أوقات فراغهم بالمساهمة بمشروع ينمي مواهبهم ويعلمهم ويثقفهم ويسليهم في نفس الوقت

لأن أسلوب التحقيق اليومي ووين رايح ووين ياي وليش لابسة وليش حاطة يولد الكبت يا مبيوق والكبت يولد الإنفجار

كويــتي لايــعه كبــده يقول...

بتراكم العمل البسيط يكون الانجاز عظيم

@alhaidar يقول...

صح لسانك ..

bof-10 يقول...

الله عليك الله عليك ! ! !

bo bader يقول...

كلامك ما بعده كلام ..

الله يسلمك ويحفظك لديرتك ..

الكويت محتاجة منا شوية وقفة مع أنفسنا

تحياتي

====

BlogLess

يسمحلي مبيوق / حسافتج أعلق على تعليقك

الفقرة الثامنة أظن المقصود منها وحسب سياق الكلام أن الواحد يتابع تربية عياله ويعرف وين رايحين ويايين لأن صلاحهم من صلاح البلد ، وخرابهم - الله لا يقولها - من خراب البلد .

شنو فايدة الكلام عن حب الوطن واعيالنا ما اهتمينا يتربيتهم ؟

آسف للإطالة ، بس هذا اللي أنا فهمته من سياق الموضوع

تحياتي الحارة

Kuwait يقول...

الكلام حلوووو ..
والفعـل أحلى ..
بس وين الي يسمع ويطبق :(

ولد الديرة يقول...

الله كريم


انت قصدك الواحد يلتزم مثل ما قال طلال، مو؟ :)

SKY يقول...

اييي والله عدل كلامك

الله يعز الكويت ويحفظها ويهدي عيالها انشاءالله ويبطلون هالسلبية ويفكرون فيها مثل مايفكرون ابعمرهم ومصلحتهم..

بس يقول...

حسافتج

صح لسانك

الله كريم ان شاء الله

JooJ o MaJooJ يقول...

لازم هل كلام ينكتب إب كل طوفة من إطوف الكويت عشان الكل يقراه...و الله عدل كلامك خنقتني العبرة :(
جووج

bakah يقول...

تحية لك اخي الكريم ..

بالنسبة للأولى ..

والله يا اخوي وقفنا عشرة ايام , وفكرنا , وصوتنا , وبعد التصويت اكتشفنا ان الي صوتنا له صار اكبر حرامي ..!!

المشكلة ان المال السايب يعلم على السرقة ..!!

دمت مواطنا صالحا ..

Kaadi يقول...

يا حلوك و ياحلو غيرتك على ديرتك تقطع القلب والله !!


ياليت منط بس اثنيين ! يخافون على الديرة !!


والله بوقف مو بس 5 و لا 10 و لا ألف ثانية عشان الكويت ... بوقف و بوقف يالله تعدلها حبيتنا الكويت :)

enter-q8 يقول...

يصير ليش لأ
يصير ان شاء الله

lawyer يقول...

حساافتج

بوستك و طلبك و التفكير عشر ثواني عند باب الاقتراع يعني شي واحد فقط


ان نرد بيووووتنا و مانعطي صوتنا حق احد

I7na 3shagnaha يقول...

al7een ya3ni ako amal wela makoo ???!!

حسافتج يا كويت يقول...

نون النساء

وماراح انتعلم يا عزيزتي

حسافتج يا كويت يقول...

الزين

الشكوة لله والله هالديرة حاميها ربي

حسافتج يا كويت يقول...

نانو


تصحيح

لو كل كويتي بالجنسية فقط وليس بالولاء
لان اللي ولاءه للكويت والكويتي الاصلي هذا ما علية خوف لكنة شوية

خوفج من اللي بس كويتي بالجنسية

حسافتج يا كويت يقول...

عثماني


ولكن لا حياة لمن تنادي

اتصدق الحين صارت لا حياء لمن تنادي

حسافتج يا كويت يقول...

نيكون

العفو وهالكلام لازم يصير من غير تذكير لان نعيشة بشكل يومي

حسافتج يا كويت يقول...

مطقوق

قلبي على قلبك

حسافتج يا كويت يقول...

حياتي هدف

صدقيني حياتج بالكويت معرضة انها تصير عبث ولا فيها اي هدف

حسافتج يا كويت يقول...

كاريزما


اوول يازمان ارجع يا زمان


وولهنا عليج

حسافتج يا كويت يقول...

بو لطيف

سلامتك من الآه

وامييييييين

حسافتج يا كويت يقول...

بلوقليس


القصد من كلامي ليس الحد من الحرية

القصد هو المتابعة

يعني يا ربي ما اقدر اشوف بنتي لابسة لبس غير لائق دينيا وإجتماعيا و تطلع ولا اسالها وين وليش لابسة جذي

ولا اقدر اشوف ولدي يطلع من الصبح لين بليل ولا اسالة وين كنت وليش

مابي اعيالي يتفرفرون بالسوق واذون خلق الله او خلق الله ياذونهم

الحرص واجب

حسافتج يا كويت يقول...

كويتي لايعة كبدة

عدل كلامك

بس وين الي ينفذ

حسافتج يا كويت يقول...

احمد


صح بدنك يا الغالي

حسافتج يا كويت يقول...

بو فتين


تسلم عنيك تسلم عنيك

حسافتج يا كويت يقول...

بو بدر


تسلم عزيزي

حسافتج يا كويت يقول...

كويت

انفخ يا شريم..... مامن برطم

حسافتج يا كويت يقول...

ولد الدييرة



عليييييك نوووور مثل ما قال طلال

شوفني انا شلون ملتزم

حسافتج يا كويت يقول...

سكاي


امييييييين يا ربي امييين

حسافتج يا كويت يقول...

بس الغالية


صح بدنج

واميين يا ربي

حسافتج يا كويت يقول...

جووج

الكلام هذا ماله داعي ينكتب هذا لازم يكزن محفور بكل قلب

حسافتج يا كويت يقول...

مطعم باكة


الشكوة لله

حسافتج يا كويت يقول...

كادي

انا اكتب وغيري احسن مني يسوي

ولو خليت خربت


ولو اني اشوفها هالايام خربت

حسافتج يا كويت يقول...

انتر


متى يصير؟؟

حسافتج يا كويت يقول...

لوير

اذا حنا صرنا سلبيين على الديرة السلام