ما تصبرنيش.. ما خلاص.. أنا فاض بيه ومليت .... بينلي إنت الإخلاص وانا اضحي مهما قسيت

إنما للصبر حدود
للصبر حدووووووود



الثلاثاء، 22 سبتمبر 2009

عندهم وعندنا

عندهم المرأة تخالط الرجال بالجامعة
عندنا افصلوهم وشككوا في تربية بناتنا وعيالنا
عندهم يبنون جامعات
عندنا جامعة وحدة اهلية وموقادرين يوسعونها
عندهم دكاترة من كل انحاء العالم
عندنا دكاترة محلين
عندم مناهج عالمية
عندنا يا ويله اللي مايشتري كتاب الدكتور مال المادة ويربحة
عندهم الجامعة من كبرها يسوقون فيها سيارات عشان يتنقلون فيها
عندنا جامعة مافيها مسافط كفاية
عندهم الجامعة شراكة مع كيمبرج وسنغفورا ومعهد العلوم الفرنسية وستانفورد الأمريكية
وعندنا شراكة مع مكتب بوهاني للطباعة وبو جاسم للتصوير
عندهم الجامعة باللغة الإنجليزية
عندنا الجامعة فيها مادة لغة إنجليزية
عندهم طلبة من ستين دولة
عندنا ستين دولة يبون فيزا علشان يدشون ديرتنا
عندهم إدارة صح للدولة
عندنا رئيس حكومتنا إهيهي من دولة لي دوله
عندهم المشروع هذا أخذ ثلاث سنين
عندنا مشروع الشدادية ليلحين حجر الاساس موجود ويمكن كلاه الدود


تدرون منو اللي عندهم كل هذا وخلوا الحريم يسوقون داخل الجامعة وخلوها مختلطة بعد؟؟
المملكة العربية السعودية !!
أما إحنا قاعد نرد لي ورى ..... من يهقى السعودية تخلي الحريم يسوقون ويدرسون جنبا لجنب مع الرجل وحنا ليلحين مكانك سر
للعلم فقط: الجامعة فيها 5 مدارس بمختلف المراحل ومساجد ومسابح ومستشفى يخدم المدينة الجامعية ومساكن للطلبة والدكاترة كما يوجد بها شاطئ ومسبح ومطاعم وملعب غولف وتنس ارضي وأخيرا وليس آخرا يوجد بها مرينا من الطراز الحديث
وفيها درجة للماجستير والدكتوراة
ومساحة الجامعة 36 مليون متر مربع

عسى ربي يوفقهم في ظل عهد بو متعب

هناك 21 تعليقًا:

YusuF.AsKR يقول...

عين ما صلت عالنبي ,, صابتنا

للحين أشك أنه اللي صاير عندنا شي متعمد و مخطط مدروس !!

أحس أن أكو ناس بره الديره يديرون ناس داخل الديره و يحثونهم على تعطيل التنميه و إثارة الفتن و المشاكل ! و كل مارجعت الديره خطوه للوراء ,, يعطونهم مكافأه

لكن

لابد ما يجي يوم و تشرق شمس الكويت من جديد بعد ضلام دام سنين علينا

Icarus يقول...

"عندنا يا ويله اللي مايشتري كتاب الدكتور مال المادة ويربحة"

من تجربة شخصية : د.نجمة الخرافي بقسم علم النفس

لازم تشتري الكتاب مالها الي ما ينباع الا في مكتبة الجامعة وبشرط جديد مو مستعمل ولازم تعطيها الوصل@@

تخيل لازم تعطيها الوصل!!! شنو هذا بالله؟؟؟


وياويله الي مايشتري!

EngineRaa يقول...

صبحك الله بالخير اخيي،،، تدري ان المملكة ما بدت أتطور إلا لما فلوا هيئة الامر بالمعروف والنهي عن المنكر واهم والعياذ بالله افكارهم كلها مناكر , ومن تصدروا هالنماين لديرتنا واحنا ما شفنا خير ، اقوول عسى ربي ييب لنا من يزحزهم علشان نقدر نلحق الركب

enter-q8 يقول...

عادي انت بالكويت يعني شنو تتوقع

نمووول يقول...

صباح الخير

اي انت قلتها عندهم وعندنا
وكل الي ذكرته عندنا يعتبر مميزات
شنو يعني خلو الجامعة مختلطة كل الجامعات مختلطة بس تيي تشوف الكويت غير لاننا مميزين

عندهم جامعات وعندنا جامعة وحدة ما نبي العلم يتطشر ويضيع بين الجامعات

اما كتاب الدكاترة فهاذي سالفة اذا تكلمت فيها ما راح اخلص بس اتوقع عشان نسوي اكتفاء ذاتي .. :)
عيل جاكو يقول لازم وصل
احنا عطتنا ورقة قالت امين المكتبة يوقعها خخخخخخخخ بس الصراحة كتابها وايد مفيد بدال لا تروح الجيم وتدق حديد شيل كتبها كل يوم :)

بس جنك نسيت عندهم شعب وايد وعندنا
3 شعبتين بس لا ومغلقة بعد ..
وعندنا السستم يعلق ..
كل شي عندنا ..

الله كريم يمهل ولا يهمل
شكراً ..

سرحان يقول...

آااااخ يا قلبي

ياخوي ترا ديرتنا يبيلها نفضة تزيح "الزفت" اللي مغطي عقول هالناس و عامي عيونهم... عسى الله يوفق أخواننا بالسعودية و اللهم لا حسد...

أما اللي عندنا وين بنتوفق و هذا مخوخهم؟ اللي حتى محطة مجاري مو عارفين يديرونها!

جبريت يقول...

انت يا تتغشمر يا تتغشمر

لانه بظل الحبيب ناصر المحمد احتمال نحفر الارض ونشتغل حفارين قبور ولا ندور الماي نفس الصومال اكو احسن من هالنعمه الي يفضلها علينا الحبيب ناصر المحمد؟؟؟

اما السعوديه اقولهم الله على الظالم الي عندنا مو عندكم

'lsdjgsk'eljr يقول...

معقول هذا بالكويت!!!

Mohammad Al-Yousifi يقول...

عليهم بالعافية

يستاهلون الخير

أتيت متاخرة يقول...

من صجك !!!

احلف !!!!

و آنه أقول بس ديرتنا اللي خراب

طلعنا كلنا بالهوى سوى

أتيت متاخرة يقول...

مع انها متأخرة
بس
كل عام وانت بخير ومن عواده يا رب

Safeed يقول...

عندهم شعور بدولة ..
عندنا شعور .. بفندق!

هذا الفارق بين الاثنين !!

اجار الدين كشمش يقول...

كما تكونون ....يولى عليكم

""""""""""""""

كنا غير ...وكان تحضرنا

منارة الخليج

والان نحن غير ...واصبحنا مكينة ديزل الخليج

اعتقد تعرف السسبب

ماكو داعي اكتب لك

فمالله

SHOOSH يقول...

ايـــه

فعلا .. حسافتج يا كويت !

ayo0oh يقول...

الله يرحم حال ديرتنا
والحمدلله علىكل حال

وبالنسبه حق موضوع الكتب في قانون بالجامعة يحمي الطالب ويجرم هالفعل

يعني بامكانك انته كطالب توصل هالموضوع حق المسؤولين
واذا العموم يخاف يشتكي يتحمل

وبس عاد تحلطم على ديرتنا ترا نحبها وملنا غيرها :)

DiLLi O MiLLi يقول...

آآآآمييييين
أنا أبي واحد من جماعة قانون الفصل عندنا ،،، اللي ما حجوتهم ألا السعودية والسعودية وأمثلتهم كله من السعودية ،،،، ويييينهم ألحييين ؟؟!! شرايهم في مثلهم الأعلى ،،،، كاهوووو ماشاء الله عليه أنشأ جامعة في غاية الجمال موو بس بالمبنى ،،، لااااا ،،،، جمال العقلية ،،، وجمال الثقافة ،،،، وجمال الفكر

أموووت أشووف ردة فعلهم ....



عجبتني فقرة
عندنا رئيس حكومتنا إهيهي من دولة لي دوله
هههههههههه ... مت عليها من الضحك
:)


أنا كاتبة بوست عن هالموضوع بعد ....

aziz يقول...

والقبس انقلت عن انهم راح يمنعون هيئه الامر بالمعروف من دخول الجامعه.

رورو الشخبوطه يقول...

السلام..

جاكو خخ حتى انا لما قريت هالجمله تذكرت د. نجمه انا كنت اخر كورس اللي ناخذ نوت مصور وماتبي نصوره بالجامعه ناخذه من مكتبة مشاركة بمعرض كتاب كلية الاداب @@

وفي دكتور خلنا نشتري 5 كتب من تاليفه واحنا بندرس كتاب واحد بس ولا مو كله بعد!!

انا بس ودي اعرف متى تخلص الشداديه او بالاحرى متى يبلشنو فيه !!

اغلب القوانين اليديده اللي بالجامعه فاشله ابتداء من كلية البنات اللي ماخذين مساحة ع الفاضي وانتهاء بالدراسات العليا اللي مافيها الا جم تخصص !!

والله يهنيهم يارب..<< اقصد السعوديه مو جامعتنا ..

مشكور..

المقوع الشرقي يقول...

مشروع بهالحجم الضخم خلصوه بثلاث سنين
لو تقولها لكويتى
يطيح غشيان
حسبى الله على من وصلنا لهالحالة

المقوع الشرقي يقول...

تصحيح
حجر الأساس فى 21 اكتوبر 2007
سنتين
لحد يطيح كوما
:)

Khaznat Al-Tayer يقول...

هذي الكويت صل على النبي ....!!
وهذي السعودية... قول "سبحان الله ولا إله إلا الله"....!!!!!

وأنا ما أقول الله " حسبي الله ونعم الوكيل..."..!!