لازم نغير عاداتنا وتقاليدنا

بالبداية عيدكم مبارك وقبل الله طاعتكم يارب
صارلي 8 سنين ما عيدت عيد الفطر بالكويت لأسباب كثيرة منها إني اساسا واصل مع الأهل جميعا فمايكون عندي أحد معيا ازورة بالعيد
وبعدين عيدنا اييب القامت صراحة العيد مدتة 3 ساعات فقط وثلاث ايام تتحول الكويت بقدرة قادر إلى مركز للهلاقة ... إهي شعور وسبايكي إهي إحجابات جنها عمارات .. إهي اشكال ..... مادري من وين يطلعون....
وبعدين ما عندنا شي يونس صراحة بالعيد غير اول ثلاث ساعات بالعيد...
أرجع لموضوعي اليوم وهو إني ودي ودي ودي نغير عاداتنا وتقاليدنا
ألحين صار لنا شهر نصلي الفير وننام.... شلون تبونا بعد صلاه الفير نصلي العيد وتالي نروح نعايد ... مايمدي .. ماكو وقت للنوم صراحة
نقتر على الأهل وروسنا مفترة معانا... افتح بوكي بعايد بدينار او خمسة اعطي عشرة !! والسبة إني ادور الفراش
...نبي فجّه شوي
ياليت تكون التباريج والزيارات في ثاني ايام العيد يكون الواحد ضبط النومة وتعدل الراس يروح يصلي العيد ويرجع ينام وتالي يقوم الظهر وينام بالليل الساعة وحدة او ثنتين ولا أدى الصبح الساعة 8 ولا 9 يبلش يبارك
لكن جذي الوضع مزري ما يأذن الظهر إلا وحنا حايشنا عقر بقر وراسنا اب ينفجر والنرفزة واصله حدها
الموضوع مجاملات في مجاملات ولا اكو احد مرتاح ونايم عدل.... شالله حادكم؟؟؟
باركوا ثاني يوم وفكونا....
والمصيبة إن أغلب سوالفنا بالعيد لا تلاقينا إهي
(ويييييييييييييييييييييييييي إتصدقين والله ما نمت البارحة) ( والله دايخ ما نمت) (أنا هذي قومتي من امس الصبح)
(شنسوي والله تأخرنا ليش اليهال كانوا نايمين واذونا على ما قاموا) ( لا لا روحوا انتوا حق خالتي انا تعذرولي منها بنام ما اقدر اسوق)

يا جماعة الدنيا بنعيشها مرة ليش نشق على عمرنا؟؟ والمصيبه الكل الكل مفتر راسة...

إنشاء الله لا صرت يد بقول حق اعيالي واحفادي خمدوا ورتاحوا ولا ادى ثاني يوم العيد حياكم

ولا شرايكم؟؟