رياييييل أوّل

فتح باب السيارة وركب معاي وهو يقول.... افففففففففففففف ليش جذي ؟؟
قلتلة..: شنهو اللي ليش جذي شالسالفة؟؟
قال ياخي مرتي مسافرة وعيالي في بيت يدتهم والبيت صاير يضيق الخلق .. وأنا نوعي فوضوي والبيت أعتفس علي اب هالاسبوع
وبدأنا نقاش طول درب الشالية بخصوص هذا الموضوع وشوي شوي وصلنا لموضوع فعلا يستحق الوقوف علية..
قالي : ياخي ربي لا يغير علي أنا مرتاح بزواجي ... لكن جان زين عندي (زوجة) ثانية جان قاعدة إتباريني الحين وامدلعتني
قلتلة: اشداراك يمكن جان امنكدة عليك عيشتك!!
قال: اتصدق؟؟ صح كلامك
وصفنا حنا الاثنين.. جان أقولة عقب فترة... أتصدق يا فلان... يا بخت ريايل اول..
قال شلون؟؟
قلت: انا حجي عن ريايل اول اول يعني ايام الأندلس والفتوحات .. تلاقي الريال عندة حرميتين ثلاث و وماملكت ايمانة عاد عد وخربط.. أهو ومدة ايدة .. جواري وعبيد وكلة بالحلاااااااااال.. ولا حرمة من حريمة اتفج حلجها.. كلهم ساكتين ... إتهقى كان عادي عندهم؟؟
قال: ماظنتي.. الحريم في كل مكان وزمان تفكيرهم واحد وغيرتهم وحدة .. وبعدين اشدراك أنهم صاكين حلوجهم يمكن امطلعين عين ريايلهم والسبة هالسالفة..
قالت: ما قريت بكتب التاريخ عن وحدة سودت عيشة ريلها وما مر عليى أن (النعماني) قد اشتكى من طلبات زوجتة . او (ابن المقفع) زعلت زوجتة وركض يراضيها بخاتم سوليتيرة من محلات ابي دردر الفارسي!!... ولا سمعت إن (هند ابنت السّفّاري) قد أشتكت من عدم سفرها بالصيف.. ولا (سُعيدة التي بكل عرسٍ قُعيدة) قد تخاصمت مع زوجها لأنه لم يشتري لها فستانا لعرس حماتها!!!
حنا كنا نسمع بكتب التاريخ أن الريال كان يقول (تالله لإن خرجت من البيت لتكونين مثل إختي) وكنا نسمع (أن ابو الطناقير رجع البيت ولم يجد زوجته فسأل الجارية ... أين أم فلان.. فقالت .. ذهبت لرؤية ابيها لأنه ينازع على فراش الموت... فيغضب ويرسل وراؤها ليبلغها أن تقعد في بيت اهلها لأنها لم تشاورة قبل خروجها)
كنا نسمع عن حريم يزوجون ريايلهم ويهدونهم الجواري مثلما حصل من سارّة وهاجر رضي الله عنهما..
وكان الرجل تيله فلوس أكثر مما يصرف.. لا معاشات خدم ولا بطيخ اشتر العبيد وخل يخدمونك ولا خلصت منهم بيعهم وأنت ربحان فيهم بعد
ومع تطور الزمن ومرور اكثر من الف وخمسمية سنة هم سمعنا عن قصيص اهل الكويت اول.. وعبيدهم وحريمهم قليل من كان يتزوج واحدة فقط..
ألحين ابذمتك تلاقي واحد عمرة 35 متزوج ثنتين؟؟؟
قالي والله كلامك عدل!!
قلت حنا مانبي نتزوج بس ريايل قبل كانوا عايشين بعز.... جواري على كيف كيفك وكل يوم حفلة (وبالحلااااال) وزوجات لك اربع..ولا أكو دوام من صباح الله خير ولا مصرف جايد مثل الحين ولا نفانيف ولا بدلات ..حدهم طاقة حرير (هذا يعني ابو الكشخة)
ولا الماسات بذيج الحجاية.. ولا جناط حدهم حلي ومجوهرات وذهب ورخص لا ماركة (ابو الشبارد) ولا (ابو الكراكيت) وماكو ساعات وإن بغت جنطة خذت لها بقشة..يعني عيشة رخص
ولا بغى يسفّر إعيالة وحريمة سياحة وداهم من الشام لين الاندلس على البعارين.. لا تذاكر ولا فنادق من يوصل كل من يكرمة او يطق خيمتة ويقعد هو واهلة في براد الأندلس.. وأنا أجزم يا أنهم بعد ما ابيبون طاري سفرة مرة ثانية لبوهم من كثر ما طلعت زبدتهم من الطريج
ثلاث اشهر روحة وثلاث اشهر ردة!! والله حريمة يقولون عووووع بعد مانبي سفر..
عدل كلامي ولا لأ؟؟
قال اي والله عدل شوقتني..
مخلص الحجي ريايل اول عايشين عيشة حلوة من هذي الناحية فقط
يقوم الصبح يشوف محلاتة وياخذ إيجاراتة ولا صار الضحى العود شربلة قهوة عند حدى ربعة وكل سوالفهم بعتلك هالجارية وشريت هالجارية.. قول تم؟؟؟
ولا صار الغدا يتنقى ايهما طبخها اشهى وألذ.. وقيّل عند أم عيالة والعصر يروح مجلس الأعيان يسولفون في جميع مجالات الحياة من صقور وحباري وصيد الغزلان والتجارة وعقد الصفقات ولا صار جريب المغرب قام صلى وقعد مع إعيالة شوي ولا اذن العشا صلى وقعد في مجلسة (ودأّي) يا مزيكة من الصبح لين جريب الفير وهالجواري يترقصون لة ولا داخ مايدري يبات عند منو منهم..
مو حنا لا قالتلك تحبني قلت إية والله .. قالت ماشوف هالحب!!!! وفيك خير خل تطلع وحدة بالتلفزيون وتقول هذي شحلوها جدامها!!!
رحم الله رجال الأمس... والله يخلف علينا
عسى بس ما ايي زمن حتى الزواج مايصير تقولك تبيني بس تشوفني من ابعيد لي بعيد!!