غترة وعقال

مع إعتزازي الكامل بلباسنا العربي الأصيل وخصوصا الكويتي والمتمثل بالدشداشة والغترة والعقال

إلا أنه مع التطور السريع في وتيرة الحياة قمت أحس إن الغترة والعقال تعت الواحد

يعني شنو الهدف منها.... بقولكم أصل هذا اللبس وتالي قارنوا معاي

الغترة وهي قطعة قماش كان العرب يلفونها على رأسهم بشكل عمامة ولان الوسيلة الوحيدة للتنقل هي الجمال فكانوا لا عزموا على السفر وحاشتهم الشمس والصنقرة يفلون هذي العمامة لتكون بشكل غترتنا اليوم ولكن من غير عقال لكي تضلل وجوههم من الاجناب

إنزين وسالفة العقال؟؟

العقال سلمكم الله .. بما أن الربع كانو يمشون بالبعارين وإذا خيموا في مكان او قعدوا يرتاحون كانو يعقلون البعير( يعني يربطون ريولة بحبل دائر مثل العقال اللي نشوفة ألحين) ويربطون ريول البعير مرتين يلفون العقال على ريولة عشان مايتحرك البعير وهم نايمين او ان يهرب منهم وهم مستريحين

وإذا قامو وحركوا من مكانهم يضعون هذا العقال على رؤوسهم عشان ما يطير الهوا غترتهم ويثبتها ..

وشوي شوي تلاقي واحد وصل المدينة وهو حاط العقال فوق راسة والناس تشوفة وحسبالهم هذا اللبس الرسمي

وأندثرت العمامة وبقيت في الإمارات وعمان فقط وضلينا حنا حاطين عقال البعير فوق روسنا

المشكلة ان الزمن اختلف وما عاد اكو هوا يطير الغترة لان في سيارات ولا عاد اكو بعارين نعقلها بالعقال

ليش ما نرجع للعمامة ونفتك او نخلي السالفة هدد لان الغترة بدأت تعتنا يعني تركب السيارة واتسند على غترتك

القحفية والغترة يخنفون الشعر وبالتالي تبلش الصلعة.. لان الغترة والعقال غير مثبتين بشكل قوي فوق الراس كالعمامة فتلاقيك كل شوي معدلها او العقال صار ميالي او زالقة الغترة لي ورى

نعم قد يكون شكلها جميل وجذاب لكنها غثيغة وتبط الجبد وخصوصا بالحر فلسنا بحاجة اليوم للإختفاء من اشعة الشمس والحر(يالله من فضلك)المكيف في كل عاير..

فإما أن نلبس العمامة وتكون ثابتة ونرتاح او نقط العمامة وندور لنا بديل..

وبعدين مالة داعي نغطي روسنا ... لاهي عورة ولا عيب...

الغترة سببتلي إحراج في كثير من المواقف فمن الممكن ان يكون هناك عزاء او عرس وانا توني اتذكرة ولكن لاني مو لابس رسمي ومايمديني ارد البيت والبس الغترة وعقال البعارين!! فبالتالي ما اقوم بواجب العزاء او العرس لأن عاداتنا وتقاليدنا الحلوة تمنع الواحد يروح مكان رسمي وهو امفرع او لابس لباس البنطلون

شالحل ؟؟ خسنا متنا لابنا لاب هاللي بعقّل بعيرة على حساب تراثنا ولبسنا

ملاحظة هامة... مابي أحد ينط وقول هذا لباسنا الرسمي ولا تعيب علية!! انا مو قاعد اعيب وقلت بالبداية مع إعتزازي باللبس الرسمي لكن هذي وجهه نظري في هذا اللبس وعلى فكرة انا من لبيسة الغترة والعقال يوميا...