حديث الكبتات !

يالله تصبحين على خير حبيبتي


وانت من أهل الخير


وتتسكر ليتات الأبجورة ويبقى ضوء التلفزيون ينير الغرفة وينام الرجل وتغفوا زوجتة وهي تشوف مسلسل الشهد والدموع في قناة آي ار تي زمان...

ويتسكر التلفزيون بروحة بعد ساعة...

ظلام دامس يلف الغرفة.. ويغرق الزوجان في سبات عميق!!


ويخرج صوت من داخل الغرفة ليقول:

بس بس ماني قادر أتحمل اكثر من جذي هذي وايد ظالمة..

ليرد على الصوت صوت آخر ويقول:

شدعوة عن التظهول لا تبالغين وايد كاني شوفيني مافيني إلا العافية



نعم هذة أصوات الكَبَتين اللي بالغرفة إحداهم كبت الزوجة والآخر كبت الزوج

كبت الزوجة: اشفيك انت ما تحس أنا بمبط بموت ماني قادرة .. ماكو مكان فيني إلا وترستة الهانم ملابس وبدل ونفانيف

كبت الزوج: غريبة والله انا فاضي كل اللي عندي 6 دشاديش و جينزين و 8 تيشيرتات بس!!

كبت الزوجة: يا بختك.. أنا صايرة مؤتمر عالمي من كل الدول فيني بدلات.. بمبط... إتصدق بمعدل كل إسبوع نفنوف او بدلة يديدة

هذا غير الجناط اللي تحت حاطتهم ما اقدر امد اريولي من كثرهم .. ولا إرقبتي اب تنقطع من العلاليق!!

كبت الزوج: الله يعينج.. أنا عندي بطالة في العلاليق ماني قادر اوظفهم كلهم فاظين وخايف عليهم من وقت الفراغ لا ينحرفون ويشتغلون تحذّف او اريل تلفزيون حق القناة الرابعة.. مادري شلون اشغلهم


كبت الزوجة: هاااااااااا؟؟ شتقول؟؟ صرخ ما اسمعك؟؟؟ اوص اوص يا بنات سكتوا خال اسمع الكبت شقول!!

كبت الزوج: من تحاجين اي بنات؟؟


كبت الزوجة : هذيلة البدلات بدوا يسولفون والله مادي شقولون كل واحد لغة الفرنسية والإنجليزية والإيطالية والإماراتية والكويتية والأمريكية و و و و و و ماني قادرة اسمعك .. عاد شسكتهم ؟؟ خلاص خلاص اكلمك الفير لا نامو النفانيف

كبت الزوج: اوكي ... وفجأة يميلون الدشاديش نحو جدار الكبت ليتصوخوا على النفانيف

نفنوف الدوام تخاطب نفنوف الدوام الثاني: إتهقين اليوم دوري ولا دورج؟؟
وترد علية: مادري بس شكلة انا.. مادري شفيها هالايام أمعردة عليّ..


وهناك بالطرف تسمع صوت (سحّاب) ينفتح : واااي افففف ابي هوى شوي إنقمت من هالغطى اللي عليّ.. متى إيي عرس واطلع منة وافتك


وصوت سحاب ثاني ينفتح وتقول من داخلة بدلة (من لبنان): شووووووووو؟؟؟ لا يا حياتي تأبريني إنتي .. انا جاييه من ليبانو مخصوص مشان هيدي العرس يالي جاي .. مالك أمل وبعدين تعي لإليك .. ليكي شوفي إنتي شو تخيني.. المدام عاملة رجيم مخصوص لإلي... سوو ميشان الله إنسي مودوع العرس هايدي .. مافي حدا بدو يروح العرس غيري..


وفي عز المعمعة تسمع صوت نفنوف يقول: بس بس خلاص قطنت ابي اروح المصبغة ابي اروح الغسالة أختنقت من هالغبار صارلي سنتين منسية .. ليش ما تلبسني اش ناقصني؟؟؟ الله يرحم ايام باريس لما كنت بالفترينة يوم تشوفتي .. ماتّي ذاك اليوم على ما شريتني وألحين قطيتني ونسيتني حالي حال نفانيف ماركسبنسر!!



نفنوف ماركسبنسر: هااااااااا عن الغلط اشفينا حنا؟؟؟ كد ومد دوام وجمعية ورخص يالله من فظلك

وفي مكان آخر من الكبت هناك مجموعة من الفساتين يسولفون.. وفي عز سوالفهم يظهر صوت من الكبت الثاني

أووووووووووه شالصييييحة شالصيحة ؟؟ خلونا ننام ... (كان هذا صوت بجامة الرجل من كبتة ) لأنة مصفوط بطرف الكبت وبينة وبين كبت الزوجة فاصل الخشب .. فما قدر ينام من صيحتهم.. وترد علية وحدة منهم ...(أووو مونديوووو بيجامة بعد صارلة لسان يحجي)

ويرد عليها... انتي يا البايرة ما تيوزين؟؟ عيب عليج بنصاص الليول تسولفين وصوتج عالي سكتي خل ننام..

وهناك بالطرف تسولف العباية مع الدراعة...

العباية: اييييييي راح زماني الله يعافي العزا اللي يخليني اطلع من هالسجن..

الدراعة: اي يا وخيتي صرتي بس للمناسبات الحزينة... انا ما اطلع إلا برمضان ولا حق التسيورات
العباية: على الأقل تطلعين مو انا محبوسة هني

ويقطعهم صوت بدلة العرس.. وهي تبكي.... أنا المظلومة فيكم... أنا أغلى وحدة فيكم وأتعس وحدة ... إهي ساعات بالعمر طلعت فيها وبس... أتصدقون ودي اشوف الشمس اللي يحجون عنها نفانيف الدوام ..بحياتي ما شفت شمس!! البستني لتفرح مرة واحدة ومن عقبها ما شفت الفرح.. انا محكوم علي بالسجن المؤبد!! من دون ذنب!!


يتجمعون كل الملابس حوالين بدلة العرس ويواسونها


وياذن الفجر وتجف دموع البدلة وتسكت باقي البدلات ويقوم كبت الرجل وكبت الزوجة يالله صباح خير ... ويكلم كبت الرجل كبت الزوجة


هاااا كيف اصبحتي؟؟


كبت الزوجة: مثل ما نمت ثقل وشقى.. تدري إن بداخلي اساوي آلاف الدنانير وهالبخيلة مي راضية تييب كبت ثاني يخفف علي الحمل..


كبت الزوج: ما ظنتي بخيلة لوهي بخيلة جان ما شرت كل هالنفانيف.... مالج إلا الصبر


ترن ساعة المنبة ويصحى الزوج ويفتح الكبت والدشاديش كل وحدة منهم ترز عمرها ودها تطلع وهو واقف ويطالع الزوجتة وقولها قومي قومي ويمد ايدة وياخذ اي دشداشة والسلام ومن غير لا يطالعها


تقوم الزوجه وتفتح الكبت وكالعادة تقف متسمرة خمس دقايق تفلي وتدور اشتلبس وهي في قمة الحيرة وبالنهاية تاخذ نفنوف وتقطة على السرير وتخرج عشان اتريق..


ويقول النفنوف للنفنوف الثاني... ما قلت لج امعردة عليّ وبتاخذني !!

-------------



يا حريمنا رحموا كبتاتكم وحللوا اللي تشترونة .. وتصدقوا باللي ما تبونة... وفكروا الف مرة قبل لا تشترون بدلة غالية ويكون مصيرها مصير هذي البدلات.. ورحموا بدلة العرس وواعدوها ان تلبسها بناتكم ترى حلو البنت تلبس بدلة امها