جمهورية كويتستان الديمخراطية

كويتستان
حمد جاسم سعود الكويتي . شاب كويتي عمرة 30 سنة
قرر إنة يهاجر بعد سنة 2006 وبالضبط بعد ما صرح رئيس الوزراء صباح الاحمد (آنا ذاك) إن الفساد ما تشيلة بعارين الولد فطيين قال إذا أهل الحكمه يقولون جذي انا شقعدني بالديرة .وفعلا حمد قرر يهاجر لديرة ممتازة وفيها تقريبا نفس مواصفات الكويت عشان مايحوشة هوم سيك . الولد دخل جوجل و قعد يدور على ديرة متشابه لصفات الكويت بس ما فيها فساد وفجأة لقى دولة نفس المناخ الكويتي وفيها بحر.. والولد يحب الزفرة والحداق .لا مو بس جذي الولد سمع إن هذي الديرة جناسيها بالمخبة كلها جم سنة يقلقس ورى أمير من أمرائهم ويسلمونة جنسية. واللي حمسة أكثر إن حكومتهم يعطون 70 الف حق اللي بيشتري بيت ويعطون الفين حق اللي بتزوج وفواتير الكهربا والماي ياخرطي يامالوة
الولد تحمس وقال هذي فرصتي . سلم على أهلة .وابوه كان معيّي ومايبي يسافر. والام عند الباب توقف وتقول يا بو حمد (هدة خلة يتحده)..الولد راح وتحدى ودخل جمهورية كويتستان ..اول ما وصل راح وأجر لة شقة في ضاحية الأمير سنتاني سنتون (خبركم كويتستان كلة يسمون المناطق بسم امرائهم إكرام لهم للخدمات الجليييييييييلة اللي سوها الامراء) وهذي منطقة متوسطة عندهم لاهي كشخة ولا جييب . وفعلا قدم على وظيفة وقالولة إنطر وزارة الوظايف توظفك و الولد نطر وعاش على مصروف ابوه سنة و 3 اشهر ..وليش إنة الولد كان مريض ذاك اليوم ما قرى الجريدة المقرود وكان إسمة معاهم و عيز وهو ينطر وبعد شهرين راجعهم وقالولة أنت إنقبلت بس ليش ما ييت خلاص إنطر الدور ..ونطر المقرود (يبي يتحدى المسكين) ..شهرين بعد .... وتالي لقى إسمة ولا موظفينة في وزارة البلدية ..الولد فرح ولمن راح بيستلم الوظيفة قالولة عطنا رقم حسابك وروح ...
الولد استغرب قال ليش؟
قالولة ماكو مكتب حقك روح واحنا بنمشيلك معاش ولا لقينا مكتب ناديناك ..الولد رجع ونطر نزل المعاش الاول والثاني محد دقلة راح لهم قال ياجماعة الخير طقة جبدي بشتغل موسالفة فلوس ضيقة خلق ديرتكم مافيها شي يونس وانا عايش بروحي ...قالولة ليش عايش بروحك تزوج وفعلا الولد قرر قبل لا يتزوج أنة يبي الجنسية الكويتستانية فتم يتعرف من واحد لي واحد لين وصل حق وحد عووود وهذا الامير العود كان شاطر في كرة القدم بس مو في اللعبة لا لا . كان شاطر في ان محد يقدر ياخذ منة الكرسي وخرب كرة قدم كويتستان و حاس الدنية حوسة وتم صاحبنا حمد يقلقس لين الامير صار فجاة وزير وزارة الذهب (خبركم كويتستان تشووول مافيها زراعة ولا صناعة بس عندهم مناجم ذهب) المراد ماطولها عليكم يوم صار وزير جان يعطي حمد الجنسية .
حمد ماصدق خبر سيييدة تزوج عشان يسد الفراغ والغلقة . جود صارلة من توظف ومايداوم بس ياخذ معاش 3 سنين حمد قرر يسويلة مطعم وراح يدور في وزارة التجارة مالتهم ..واوراق وشروط وطلعة عينة تالي راح وزارتة يبي ترخيص ويننووووة الفقير مع إنا صاحبة الامير واصل بس قوانين وفساد البلدية مالتهم كان أقوي من اميرهم . المهم فتح مطعم بالطق . وقدم على قرض الحكومة فعطووووة سبعييييييييييييييين ألف (رانيد) عملة ديرتهم ..
راح بيشتريلة بيت صغيير في منطقة (مورنينج فيكتوري) وهي منطقة بعيدة ويكتشف إنة الاسعار في هالمنطقة الدايخة نار وشرار وخذا قروض و تسلف و قلقس ..اييي قلقس وايد مسكين... المهم حمد كان قاعد بمزرعة الاميرة. تصير حق الامير رفيج حمد من بعيييييييييد بعييييد كلش ...وهو قاعد فجأة توصل سيارة ودبتها كلها أوراق . حميد من اللقافة قالها طال عمرج شنو هذا . قالتلة يا حمد شنسوي بعد نييب هالفقارة يترزقون اللة وهذي إقاماتهم أوقعهم . قالها عمتي تسوينهم أبلاش قالت اي واللة بس أخذ رسوم بسيطة عشان اسوي مساج حق صبعي عقب ما أوقع خبرك اتعب من كثرهم ..حمد الفطين طار حق الأمير صاحبة وقالة ابي اسوي خير عشان اللة يفتحها علي وابي اكفل ناس أترزق اللة وحقق مرادة حمد وسدد ديونة وصار غني وفجاة حمد صار إنسان ثاني .فاسد وصولي قلقوووووس بس البيزات حلوة نستة القيم والمبادئ وكون لة لوبي وحزب صغير وقرر يدش مجلس الأمة مالهم وطبعا الامير أياه رفيجة دعمة بالإنتخابات و شرى اصوات ووصل المجلس وصار من علية القوم ولأنة في كويتستان عندهم مثل اسمة ((لا حبتك عيني ما ظامك الدهر)) صار وزير ومسك وزارة البلدية اللي كان مقدم عليها قبل طبعا وقفوا معاشة الأولي لأنة لقولة مكتب (أشوة أن لقولة مكتب ولا جان فشلة)ودارت الدنيا وكان في إجتماع وزراء البلدية بالعالم و قعد يدور حمد وزير الكويت بسلم علية ويسألة عن وطنة الام وما لقاة.. تدرون ليش؟؟؟
ليش إنة ماعاد في ديرة اسمها الكويت
حمد دمعة عينة وقال ( حسافتج يا كويت)

----------------------

هذا أول بوست كتبتة