ما تصبرنيش.. ما خلاص.. أنا فاض بيه ومليت .... بينلي إنت الإخلاص وانا اضحي مهما قسيت

إنما للصبر حدود
للصبر حدووووووود



الخميس، 22 يناير 2009

شركات الكويت وجزاء سنمار

من الأمثلة العربية الشهيرة , والتي مازالت تستعمل حتى اليوم , يقولون ( جزاء سنمار)
وقصة سنمار بختصار هي ان النعمان ملك الحيرة أمر أن يبني قصراً ليس كمثله قصر , يفتخر به على العرب .ويفاخر به أمام الفرس
ووقع اختيار النعمان على" سنمار" لتصميم وبناء هذا القصر و سنمار هذا كان رجلاً رومياً مبدعاً في البناء .
استدعى النعمان هذا البناء أو المهندس وكلفه ببناء قصر ليس له مثيل , يليق بسيده النعمان , والذي سينزل فيه.

وما أن أنتهى سنمار من بناء القصر الفريد بعد عشرون سنة (كأقل الروايات)!! اطلق الملك النعمان على هذا القصر إسم الخورنق
وراح يتجول مع سنمار في اروقة القصر وهو يكلمة
ابدعت يا سنمار وراح يمدح بالقصر ودار حديث بينهما
وقال سنمار المقرود للملك النعمان
إني أعرف موضع حجرة لو زالت وشلتها لنقض وانهدم القصر من أساسه !
فقال له النعمان : أيعرفها أحد غيرك ؟
قال : لا .
قال النعمان : والله لن يعرفها احد اليوم ... فأمر به .وقذف به من أعلى القصر فقضى وخاس وماااااااات
فهذا هو جزاء المعروف عند الملك النعمان, ومن يومها ضربت مثلاً يقولون( جزاء سنمار ).

الشاهد .....

ما يحصل بالكويت اليوم هي مجزرة بطيئة لقتل الشباب العاملين بالقطاع الخاص..
الشركات بالكويت أساسها رأس مال وعقول نيرة وشباب يعمل بجهد
قامت بعض الشركات بالكويت بتفنيش موظفيها مع إعطائهم راتب شهرين وقالولهم روحوا دوروا شغل!!
يا سلام؟؟ ايام الرخا ماكو احد يوظف تبيهم اليوم يوظفون؟؟
واللي ما تقدر تستغني عنة الشركة اجبروة على تقديم إستقالة ورجعوا وظفوه براتب اقل من اللي كان ياخذة تحت شعار تبي ولا في ناس غيرك !!
طبعا هذا شي طبيعي في شركات الراس مالية ومتوقع ايضا ولكن بحثوا عن السبب الرئيسي
ليش صار جذي؟؟
كلة من الجشع والقروض
واليوم تصيحون تقولون يا حكومة بعد ما شرشحتوها ووصفتوها بالبيرقراطية ..
وين الكرامة !! امس تسبون الحكومة واليوم تقولون لحقونا؟؟
وأي حكومة اللي تبونها تساعدكم؟؟
الحكومة اصلا غرقانة وتبي اللي يساعدها,, (جيتك يا عبد المعين تعين.. لقيتك يا عبد المعين تنعان)
الشركات بربست سنين طويلة ولعبت وايد وغامرت بأسمها واسم أصحابها والموظفين .. بعد أن وصلت الحلقوم
بدأت تخرج فضايح الشركات فمنها من اخذ قروض قصيرة الأجل لكي تدخل بها بصفقات واسهم طويلة الأجل
وهناك شركات اقترضت فوق اموالها دبلات الدبلات ولم تتحرى الحذر
ويوم صحت الحكومة من سباتها قامت وفعلت القوانين اللي كانت نايمة
وما يخفى عليكم أن صحوة الحكومة وتوقيتها يمكن يكون مدروس وبالعماله.. خصوصا تخاذلها ويكفي وجود باقر .. اشك ان الحكومة تبي تطق ناس معينة..

عموما اللي صاير.. شبابنا ما يستاهلون والله اللي قاعد يصير فيهم وهذا الشي يزعزع الثقة في القطاع الخاص بعد ما تزعزعت الثقة بالحكومة.. يعني بعد هذي الازمة من يثق بالشركات ..

يعني بالكويتي.. لا حكومة ولا شركات خاصة... يعني عالبلاطة نبيع بنك بالدوار احسن لنا واشرف

وأحلى من الشرف مفيييييييييش

أعتقد ان التاريخ يعيد نفسة والشركات تلعب دور الملك النعمان وشباب الكويت بعد أن عمر تلك الشركات اخذ جزاء سنمار
أنا اقول خل الحكومة بمكانها وخلها تفجج عمرها احسن وخل الشركات هم اتفجج عمرها بعمرها .. وأنا من الناس المتضررة من جراء ما يحصل بالسوق ولكن ابي شركات تقوم بالمستقبل على اساس صحيح... والله يعوض اللي فات





ما شاء الله عليهم كامكو قاضبين ليلحين ما خقوا .. الله يديم عليهم..

بو راشد تلاقية ألحين صاك موبايلة!!
عسى ما عطوة جزاء سنمار

هناك 11 تعليقًا:

SKY يقول...

الوضع صج مزري ويضيق الخلق .. والثقة بدأت تنهز بالقطاع الخاص مثل ما انهزت من قبل ولا زالت منهزة بالحكومة ...

والشركات الله يستر عليها ويعيين الموظفين الي فيها

اما بالنسبة حق كامكو فماشاء الله عليهم و بوراشد مجابلهم ترى ما خلاهم لي الحين مو مقصر فلا تحاتونه ;)

مركبنا يقول...

الله يستر

مشكلة كبيرة وغريبة الموضوع مو قاعد يحرك النواب رغم ان اغلب النواب حريصين على فئة الشباب ،،،

واذا لم تكن هناك وقفه مع الشركات
ستتهاون اكثر ويصبح الموظف الكويتي ملطشة في بيدهم

Mohammad Al-Yousifi يقول...

المناخ 2

nanonano يقول...

أنا اللي أعرفه أن الحين في تحرك من شباب و شابات في القطاع الخاص و منهم من تضرر بالفعل أي تم تفنيشهم و منهم من هو مهدد بالتحرك والأعتصام و مطالبة الحكومه ضمان نهاية خدماتهم

المشكله يا حسافتج أحنا ما ندري وين رايحين؟

و أنا هذا الشي المزعج بالنسبه لي

ما عليه أنا وحده متزوجه و زوجي ماله علاقه بقطاع الأستثمار و العفيسه اللي قاعده تصير..فعلى الأقل ضامنين دخل واحد فينا الى حد ما.. ما راح يتغير..أنا أعرف شباب والله العظيم أن كانت تييهم عروض من بره الكويت للعمل من ذكائهم و فضلوا العمل بالكويت و الحين كونوا عوائل ما يدرون شنو راح يصير عليهم..في شركات قاعده تجبر الموظفين على الأستقاله عشان ما يندفع لهم نهاية خدمه و في شركات قاعده توقع موظفينها على كتب لأنهم راح يخفضون رواتبهم..بتخفضون رواتب..لازم تبتدون بتخفيض راتب المسئولين الكبار اللي قراراتهم كانت سبب رئيسي للوضع المزري للشركه..ما تيون على الشباب الصغار اللي طرق الراتب و تتفرعنون عليه بحجة خفض المصاريف

و يقولون لنا تفائلوا

على أيش نتفائل..و حبل الموده بيننا مقطوع
على أيش نتفائل

enter-q8 يقول...

السؤال اللحين
هل تدعم الحكومة تلك الشركات



و مازلت علشان اقرر مصير خدمة عشرين سنه بالحكومة ، انني ارى قانون العمل الجديد
لأن باقي على التقاعد 16 سنه قانون الخدمة المدنية المينون ما ادري اشلون يرهم

Corpse Bride يقول...

يبتها على الجرح..

كل يوم انداوم على كف عفريت..

ثنتين من البنات الي اعرفهم بشركات الاستثمار قالولهم لج اجازه شهرين مدفوعه وطلعي..

شركتنا الموقره قررت تخفيض النفقات عن طريق الماي والكلينكس.. شدعوووووووه؟؟؟

مو لي هالدرجه..

متوقعين التفنيش باي لحظه بسبب معاشاتنا الي محسودين عليهااا سابقا.. ما تقدر الشركه عليها بالوقت الحالي..

بس هم ما يصير يخلونا انتحدى ويقطونا على صخر تالي..

مخلينها على الله والله كريم..

nanonano يقول...

Enter-Q8:

بو وليد أنا ضد أن الحكومه تدعم هالشركات

دقّه تدق ضلوعهم

المطلوب من الحكومه أنها تكون حازمه مع أدارات الشركات اللي كانت سبب رئيسي في تهاوي الأقتصاد الكويتي

و هم المطلوب من المساهمين بالشركات أنهم يكونون حازمين مع هالأدارات و يحاسبونهم محاسبه حقيقيه..لأن هالأدارات و قراراتها كانت سبب في تبخر مدخراتهم

بس شبعنا مجاملات و نفاق أجتماعي..هالأدارات غلطت..و أغلاطها شنيعه..لازم يتخذ الأجراء اللازم بغض النظر عن منو هالأشخاص و منو ظهورهم بالبلد..أذا الحكومه كانت جاده في تصحيح المسار الأقتصادي

هذي فرصتهم

KQ8 يقول...

تدري شالمشكله...المشكله انه قد يكون هذا بدايه النهايه ز..يعني البدايه القطاع الخاص والموظفين اللي قاعدين يتفنشون او اللي انخفض راتبهم والوهقه ان هالفايرس يمتد الى القطاع الحكومي وباجر اتيك الحكومه وتقولك والله مانقدر ندفع رواتب الموظفين وهلم جرا

غير معرف يقول...

العمل الحكومي مضمون حتى آخر نقطة بترول

واليكم بعض الأسماء لمسئولين حكوميين تجاوزت خدماتهم المدة القانونية لبقائهم بوظائفهم حسب قانون الخدمة المدنية !

عبدالعزيز الزبن رئيس ديوان الخدمة المدنية !

عبدالكريم جعفر الوكيل المساعد للشئون القانونية بوزارة الصحة !

عبدالعزيز بشير صلبوخ الوكيل المساعد لبنك الدم بوزارة الصحة !

ولا عزاء للشباب الكويتي بالقطاع الخاص

رزقهم على الله وكفى بالله وكيلا

Unknown يقول...

عمركم سمعتوا بأن الحكومة حاسبت أي مسئول يتسبب بأي خسارة مالية في أي جهة حكومية أو حتى أي جهة تساهم بها الحكومة ؟

من أمن العقوبة أساء الأدب .

ZooZ "3grbgr" يقول...

كل من بالقطاع الخاص الحين على كف عفريت

ما من احد سالم اميه بالاميه دام انه بشركة استثمار

الله يستر علينا بس :/