حدث في مثل هذا اليوم

الساعة الرابعة عصرا:

يتصل فيني شيخ دين صديق قديم لي وإمام مسجد ... وبعد السلام والشرهه لعدم رؤيتي منذ زمن .. دخل بالموضوع وقال:

يا حسافتج إذا ما عليك أمر عندي وافد يصلي معانا ما شاء الله كل الفروض وخوش ريال وهو يعيل اسرة وكانت حياتة ماشية زينة

لكن الريال طلعوة من وظيفتة.. والريال مسكين ألحين من غير شغل... إذا تشوفلة شغلة عندكم مندوب , مراسل , سكرتير , أي شي بس المهم يشتغل ..

قلت له يا غالي والطلب رخيص ... عطة رقمي وخل يدقلي باجر وأنا ادورله شغلى أنشاء الله ولا يصير خاطرك إلا طيب



وصكيت التيليفون وأنا افكر ما أدري وين أشغلة لكني وعدت الريال اشغله يعني اشغلة لو مراسل ..

رحت الديوانية ورديت البيت تسحرت ونمت
وقبل اذان الفجر بربع ساعة قمت أنا وزوجتي و شربنا ماي وصلينا ونمنا وتونا غاطين بالنومة ..ومن القرادة بذاك اليوم نسيت احط تيليفوني سايلنت

وبالتحديد بعد الأذان بنص ساعة وفي عز الهدوء والسكينة وبنتي العسرة بالنومة نايمه نومة الغزلان بالبرية يرن تيليفوني رنه فزيت انا ومرتي وبنتي فزة ذكرتني بالعراقيين يوم ادخلوا علينا البيت وأنا نايم وقعدوني !!

من التدودة مديت ايدي ابسرعة بشيلة ولا اصكة ولا اقمتة ومن السرعة دزيتة وطاح على الارض وكمل رناتة وانا ادورة بنص عين ونص وعي والدار ظلمة.. جان اشيلة وأقول الوووو؟؟
وإذا بصوت غريب
جان يقولي : الوووو الأستاذ حسافتج؟؟

قلت ايي (وانا مخترع)

قال : الاستاذ حسافتج يا كويت( وقال إسمي واسم عايلتي) !!


أنا اهني تعومست ما اري شالسالفة وبراطمي انشفوا وصاروا بيض وريولي اتصافق جان اطلع برة الدار لان بنتي في هالوقت بدت تصيح

قلت مصيبة صايرة منو هذا اللي يعرفني وداقلي بالليل وانا نا أعرفة؟؟؟ ومو كويتي؟؟ هذا أكيد دكتور داقلي من المستشفى فية مصيبة صايرة ( وبثواني قعد اقول بقلبي الحين بقولي خبر مو زين بس في منو يا ساتر استر يا رب)

جان اقوله اي اي انا معاك منو معاي؟؟

جان يقول بكل برود... أنا اتصلت عليك هالحزة بالذات لأن الله يبسط الرزق بالفجر ويوزع الارزاق بعد صلاه الفجر

جان اقوله ومنو انت ؟؟

جان يرد ويقولي انا فلان اللي دازني عليك إمام المسيد علشان الوظيفة

إهني انا حاشني شعور مزدوج بين الفرحة إن ماكو مصيبة والحمد لله وبين اني اكسر تيليفوني وارد انام !!

طبعا بسرعة تذكرت إني صايم ومابي اخرب اصيامي علية فقلتلة يا اخي المسلم.. الله يبسط الرزق في كل حزة !! مالقيت إلا الفجر؟؟

وبعدين تعال الحين هالكفار الله رازقهم وهم مايعرفون الجبلة وين .. شهالكلام

الريال تأسف وقال اتصل عليك الظهر....



انا حسيت وقتها إن عندي عذر اشرب ماي بعد الاذان لاني فعلا تهظم سحوري ونشف دمي من إتصاله..

بالله هالناس شلون تفكر؟؟ ما ادري

لعنبوك روعتني وقعدت بنتي وخبصت قلبي وقلب زوجتي و نشفت ريجي ودمي ووراي صيام .. المهم كملت صيامي وانا من الصبح عطشان ويوم صارت الساعة 12:30 دق بعد صلاه الظهر و وقلت له تعالي وآخر شي قلتله عندي وظيفة مراقب مخازن .. براتب 200 دينار...


قالي اوكي

واليوم الاول من سبتمير دارت سنة على هذي الحادثة وهذا ويه الضيف لاياني ولا دق ولا شفتة.. وتذكرت هالسالفة لأنة كان اول يوم رمضان من العام المنصرم الله لا يعودة من عام

يعني المحتاج يقبل بأي وظيفة وانا فعلا ماكنت محتاج موظف ولكن لعيون إمام مسيدنا

لكن هذا طلع جمبازي وما اعجبتة الوظيفة ولا الراتب ودق خبص قلبي وقعد ابنيتي وطس