ولد إبليس

اللي قاعد يصير بالكويت شي مو طبيعي

بحكم عملي يمر على وايد ناس فقارة يبون يترزقون الله

العامل بنغلاديشي يأتي من بلدة دافع مايقارب 400 دينار لتاجر الإقامات الخسيس... اللي بدورة ياخذ البيزات ويهيّت البنغلاديشي بالشارع
البنغلاديشي يعتقد أنة بدخول الكويت قد دخل الجنة.. فيتفاجأ بدرجة حرارة تقارب الخمسين وبرد قارس يداعب الثلاث درجات...
فيبدا المسكين يحوس في ضواحي المدينة بحثا عن عمل..
وكان لي لقاء مع أحدهم...

رايح دوامي الصبح... عند باب البناية اشوفة يفاقق من الحر....
بابا أنا يبي ماي!!
تعال إلحقني فوق..
أعطية ماي ودينار وأقولة روح..
يرد على ويقول .. بابا أنا أكو باتشا ويبي يشتغل ... في شغل..؟؟
ارد وأقولة أنت على كفالة منو؟؟منو كافيل مال إنت؟؟
بابا أنا كافيل إسمة ابو فهد... أنا يدفع 400 دينار يجي يشتغل كويت.. هو يقول ماكو شغل .. انا شنو يسوي؟؟
أرد علية وأقولة أنزين شوف عندنا مكان وسكن علينا بعد ونعطيك 50 دينار بالشهر...
يطير من الفرحة ويقول بس في مشكلة صغير بابا..
شمشكلتة ؟؟
انا إقامة يخلص بعد شهر واحد.. كفيل يقول تبي أجدد لك أدفع 400
اقولة خلاص انا أحطك على كفالتنا..
يهز راسة وقول بابا فية مشكلة!!
اقولة شمشكلتة بعد ؟؟ ماخلصنا؟؟
يقول هذا كفيل يقول إذا يبي تحوبل إقامة إدفع 200!!!
أنا بقلبي.... أيا ابن الكلب... يعني لا أرحمك ولا أخلي رحمة ربي تنزل... هالمسكين عندة ثلاث إتجاهات
1- يا يدفع 400 ويقعد يشتغل قطّاعي يوم بناي ويوم مزارع ويوم يلقط علب البيبسي ويبيعها .ويلقط لة جم دينار بالعيدين عند الإشارات وآخر السنة مجموع اللي يمعة 400 وهو اللي قطة على ولد إبليس

2- يحول إقامتة من ولد إبليس إلى أي شركة ويعيش محترم بوظيفة ومعاش ولأن ولد ابليس يدري أنة بتحك هالفقير الدنيا وبدوّر على وظيفة وبغيّر إقامتة فإذا طلب تنازل بيدفع لة 200 زيادة وطبعا هالفقير لو عندة 200 ما قعد بالكويت

3- يرجع بلدة وعلى حسابة بعد وكون يا الكويت علية دين 400 ورجع ديرتة علية دين 800 ولا شتغل ولا سوى شي اللي اييلة بهالإيد يروح من الإيد الثانية

يعني بالثلاث حالات ماكل تبن وضيع عمرة على ماميش...

وفي نوع ثاني من تجارة الإقامات... وهي بشكل قانوني... ويكون الشخص عندة شركة ويحتاج عمالة وياخذ على كل عامل مبلغ وقدرة ويشغلة ويعطية معاش وبعد العمل لمدة سنة يكون العامل يادوب سد اللي تسلفة ودفعة لصاحب العمل...
والله حرام اللي قاعد تسوونة يا ارباب العمل ربي ما يبارك في هالفلوس ابد

مع الأسف تجار الإقامات ما يخافون الله وتلاقية ياخذ هالفلوس ويروح العمرة ويحج فيهم (هذا إذا راح) ويوكل إعيالة من هالفلوس الحرام
ومع الأسف مافي نائب تحرك بصورة جدية على هذا الموضوع ولا فية جهه بالكويت قاعدة تتحرك بصورة جدية
تدرون ليش؟؟
لأن اللي ورى تجار الإقامات ناس إما حساسة أو ذات مراكز حساسة أو كلاب الناس الحساسة او أقارب الناس الحساسة
المصيبة هذيلة الناس معروفين بالاسماء ومع الاسف المفروض بعضهم يكون قدوة لكن النفس دنيّة

حبيت أطرح هذي القضية لأني شايف الخمسين خايب ماعندهم سالفة هالايام وقاموا يخورونة بسالفة مناهج الدراسة والسنة والشعية وجنهم ودهم يفتتون الديرة إلى خمسين حزب فقلت أدور لهم على قضية ... تشوووود يحسون!!
بالله شتبون يعني بتغيرون الدين؟؟؟ بتعلمون عيالنا يفطرون على النيمة ولا يفطرون مع الأذان؟؟
بتقولون لهم إن حبوا علي وكرهوا معاوية؟؟؟ ولا بتقولون لهم كلهم صحابة ؟؟
بتقولون لهم إن اللي يحول من سني إلى شيعي ربي بيرضا علية وبيدخل مجلس الأمة؟؟
بتقولون لهم تزوجوا مسيار أحسن من متعة ولا متعة اونس من مسيار؟؟
خلوا المناهج مثل ما إهي سنين أكثر من خمسين سنة على التعليم بالكويت وكانا سنة وشيعة ما ضرنا شي ولا بضرنا إن شاء الله
يوزوا يـــــــــــــــــــزوا

لعنة الله على الجهل ..
ولعنة الله على من خلى البلد جذي...
ولعنة الله عليك ياللي في بالي..