خل البنت تتيسر

مع الأسف مفهومنا بالكويت للزواج نوعا ما غلط وخصوصا للبنت

وقبل لا ابدي موضوعي احب اقول ان كلامي ليس على كل الناس ولكن الأغلبية بالكويت

اكتب كلامي هذا وقلبي يعتصر الم على بنات ديرتي اللي اعتبرهم ضحية مجتمع غبي ببعض افكارة
اشرح لكم حوار يكاد يدور في بيوت كثيرة بالكويت يقل فيها الوعي وإن كان الظاهر عكس ذلك

الام تخاطب الاب وتقولة: يابو فلان هااا سألت عن فلان اللي ياي يخطب بنتك...
يرد الاب وقول: اي والله بس جنة محد عرفة يقولون انة طول عمرة بأمريكة واثنين ثلاثة بس اللي يعرفونة ويمدحونة
الأم: يمدحونة؟؟ خلاص توكل على الله البنت اكبرت
الاب: كبرت!!! توها البنت عمرها 27 شفيج كبرتيها
الام: اشعرفك انت والله انا قلبي حاس انة ماراح ايها غيرة وافق وخل البنت اتيسر وتروح
انتهى الحوار
وكأن البنت عالة على الام او الاب ويبون يتخلصون منها... ادري مو قصدهم ولكن الام والاب يعتقدون أن الزواج للبنت سيكون نهاية المسؤولية او بداية فرحة للبنت ولهم
الأخ: يمة انا سألت عن الولد رفيجي فهيد يقول الولد لعوبي وراعي بنات
الام: وييية واللي عافيك كل الشباب جذي ولا تزوجوا الله يهديهم
الاخ: يا يمة الولد يشرب بعد
الام: كل من يشرب بهالديرة ربي يهدية انشاء الله
الاخ: انا ماني راضي يا يمة
الام: يا وليدي انت تزوجت وكبرت وعيلت واخيتك مسكينة ما ياها نصيبها خلها اتيسر وربي يسهل امرها
الاخ: ربي يسهل امرها !!!!! شدعوة البنت بدش حرب؟؟ يبا هذا زواج ولازم البنت تكون راضية وتعرف كل شي عن الولد وبعدين انا ماني راضي حتى لو اهي تقول اي
الام: ناد اختك خل ننشدها
البنت: انا موافقة
الاخ: يا غبية يقولون يشرب
البنت: ادري نص رفيجاتي ريايلهم يشربون كاهم عايشين شحلاتهم!!
الاخ: شدراج عايشة معاهم
الام: خلاص انا وابوك والبنت راضين
الاخ: انتي اشتبين فية ؟؟ تحبينة؟؟؟ يا حيل الله ... بس ماتعرفينة ليش تربطين عمرج بواحد جذي . باجر ايج اللي احسن منة
البنت : تسكت وما ترد
الام: تعال الدار ابيك.... انت ماتشوف اختك كبرت وهي مو من النوع اللي تهتم بنفسها .. ولا تطلع.. من بيشوفها؟؟ من بياخذها؟؟ تبيها تعنس؟؟
الاخ: اي خل تعنس ولا تعيش مقرودة طول العمر.. ولا عيزانين عنها؟؟
الام: لابالله محنا عيزانين بس البنت تكسر الخاطر رفيجاتها واللي حواليها كلهم تزوجوا .. خلها تتيسر
الاخ: لا بالله خوش عذر يعني تقطين بنتج للتهلكة علشان اللي حواليها تزوجوا وهي لأ؟؟ يا يمة شفيج؟؟
الام: يا وليدي أنت ما تشوف عيونها شلون تغورق لا شافت اختك وريلها ياين الزوارة ومستانسين وعيالهم معاهم.. ترى انا احس فيها انت ما تحس
الاخ: انا احس واقول خل عيونها تغورق احسن من لا عيونها تنبط من البجي والقهر وتيج مع عيالها تعيش معاج بالبيت.. خليها مو ناقصها شي ومعززة مكرمة ولا هذا ايها ايتيطوطح تالي الليل وياعالم شسوي فيها

يدخل الاب : شعندكم اتساسرون
الام: تعال شوف ولدك مو راضي اختة اتزوج!!
الاب: ليش ليش؟
الاخ: يبا الولد يشرب وراعي بنات
الاب: هههههههههه انا كنت راعي بنات قبل .. بلاك ماشفتني شسوي بحمدون قبل لكن تزوجت امك وتكنت وكاني مافيني إلا البخت
الام تخز الابو ومو عاجبها المثال
الاب: شوف يا وليدي انت بعدك اصغير انا مابقى بعمري شي وابي افرح فيكم واموت وانا مطمن عليكم
الاخ: اتطمن وبنتك عند سكران وما اتطمن وبنت امعززة تحت عينك!!

يخرج الاخ من المنزل وهو مطنقر


ويتم الزواج وبعد اربع اسنين وصلت بالزوج الوقاحة انة يطلب منها فلوس وهي تطلب من امها والام تلفز بيدها خمسمية دينار كل اول شهر وتقول بالج اخوج ولا ابوج يدري
ثم تاتي البنت مع اعيالها لتعيش في بيت ابوها بعد ما توفى الابو وتجلس هي وامها بالبيت امعززة ولكنها مو امكرمة لأن زوجها مسح في كرامتها الارض من بلاوي شافتها

انتهى
هذي القصة من وحي الخيال ولكنها تحصل بشكل نسبي من بيت لأخر
ليش مفهومنا ان السعادة بالزواج فقط؟؟
ليش ما نامن لبناتنا العيش الكريم الدائم وليس المؤقت على اساس انها بتزوج وريلها بتكفل فيها
ليش نزرع في بناتنا انها انشاء الله ماتوصل 24 بالكثير إلا ويجب عليها ان تتزوج؟؟
بناتنا ينوا من هالسالفة
غلط غلط غلط
البنات يجب ان يبحثن عن العيش الكريم إما بالزواج او من غير الزواج
البنت لازم تاخذ شهادتها وتالي إن ياها الرجل الصح تاخذة وإلا خلها تعيش بكرامة وهي عزباء ولا تعيش بمهانة واسمها متزوجة
ولا تخافون من كلمة عانس
فوالله عانس سعيدة ولها حريتها ومالها افضل من متزوجة ملعون خيرها الخير او مطلقة وتجر اولادها معاها ويمكن حتى الصرف تصرف عليهم
ولا احد يقولي الزواج ستر للمرأة؟؟
شكو هي قبل لا تتزوج امفصخة؟؟؟
والله يا ان بعض البنات كانو مستورين في جميع المجالات قبل الزواج وبعد ما خذوا على اساس (خل البنت تتيسر) و(مابي اعنس) و(ظل راجل ولا ظل حيطة) لعنوا هذا الستر اللي خرب حياتهم

أنا ما اقول لا تتزوجون ولا اقول تزمتوا ولكن اقول غيروا تفكيركم مال اول وان الزواج ستر للمراة و نبي نفرح فيها و و و و
والله يا ان بعض الحريم هم اللي صايرين ستر على ريايلهم وليس العكس
-------------


خارج الموضوع...
أحلى شي ان الحكومة ليلحين ما اقسمت... واليمعة عطلة رسمية... والسبت راحة ... والاحد افتتاح مجلسنا الموقر...يا حبك للضيج يا سمو الرئيس