ما تصبرنيش.. ما خلاص.. أنا فاض بيه ومليت .... بينلي إنت الإخلاص وانا اضحي مهما قسيت

إنما للصبر حدود
للصبر حدووووووود



الأحد، 3 مايو 2009

متى بتفهمين القصة يا حصة؟؟

من قديم المدونه .......

مبرووووووووك ياتك بنت...

ربي لك الحمد على ما أعطيتني .. خلاص بسميها حصة على أسم أمي
وتكبر حصة ويصير عمرها سنتين وخلال هالسنتين الأبو ماعنده في هالدنيا ولا بلسانه غير حصة
الالعاب والكاكاو والعنوة بعز الظهر للجمعية واللعب واحلى واغلى اللبس لعيون حصونة.. ياي من الدوام تافل العافية بس يشوف حصيصة ينسى الدنية ومافيها ،وكل شي الا حصه اللي يزعلها يا ويله.. وحصة تتعلق في ابوها بشكل غير طبيعي وتحبة وتموت علية

بعد جم سنة....
مبروووووك ياك ولد....
ويذبح الذبايح والعزايم ويسفّر المدام نقاهة عشان يابتلة عبدالله .. ايييه ..وأخيرا صرت بوعبدالله
ويقل الدلال والعنوة واللعب من حصونة إلى عبّادي

يبة ابي موبايل..
حصة؟؟ ماكو لا صرتي بالجامعة عطيتج واحد

يبة كا عبدالله عندة
عبدالله غير هذا ريال

بعد ما غازل الاب إبنتة ودلعها ووصلها السما ووعدها بكل امالها...
تركها لمجرد وصول الهدف وهو الولد..
وتنصدم حصة اول صدمة في حياتها من الرجل!!


تكبر حصة وتدخل الجامعة وتتعرف على أحمد
احمد يغازل حصة بكلمات ويلاطفها كزميلة له وهي تستصيغة كشاب دمه خفيف وقصده شريف
يحاول احمد تقوية العلاقه بينهما ويطلب رقمها بعد مغازله وملاطفه دامت ستة اشهر

وبعد فتره....

احمد: شوفي حصة احنا نكون أصدقاء احسن ..!! ترى انا مو مال زواج!!!

حصة تنصدم في احمد انه يبي يلعب وبس وقصده مو شريف وهذي ثاني صدمة


تكبر حصة وتنخطب والخطيب يسويلها يادهينة لا تنكتين ويلاطفها ويدلعها وبعد الزواج بسنة وبعد ما تعود عليها و وتغير جسمها بفعل الحمل والولاده وقل الاهتمام وقام يكلمها جنها واحد من الربع!!


وتجلس حصة تصيح وهي تتذكر ايام الغزل وشهر العسل
وتنصدم حصة بالرجل مرة ثالثة!!


تقر حقوق المرأة السياسية

وتروح حصة ندوات للمرشحين وتسمع الغزل السياسي بالحريم وأن هذا المرشح يدعم المراة ويقول أن المرأة بالكويت حقها مهضوم وأنة هو الفارس اللي برد حقوقها المسلوبة ويلعب على أوتار الغزل السياسي والامور التي تفقدها المرأة عندنا بالكويت
فيرق قلبها وتروح وتتعنى وتعطي المرشح صوتها وتنجحه وبعد ما ينجح تشوفة في مجلس الامة يقول (لا لتوزير المراة) (يجب على المرأة داخل قبة البرلمان ان تتقيد باللباس الشرعي)( المراة تصوت على عيني وراسي بس ترشح نفسها لا !! فهذه ولاية ولا يجوز لها)( اسف ما حضرت جلسه انصلف المراه المطلقه والارمله)

وتنصدم حصة بالرجل للمرة الرابعة!!

نصيحة لكل من ترى نفسها في حصة أو تعرف وحدة مثل حصة ..
حان الوقت أن تكشفون كذب بعض المرشحين ومغازلتهم السياسية للنساء.. أنتم الأغلبية وانتم القادرين على تغيير وضع الكويت..
أرجوكم انتبهوا ولا تقعون في الفخ هذة المرة

لي متى بتصيرين جذي يا حصة؟؟

متى بتفهمين القصة؟؟

هناك 23 تعليقًا:

chandal/danchal!! يقول...

مقروودة هالحصة!

وعبيــــد ياخذ القلب

:)


ولكم باك مستر حسافتج

U-Turn يقول...

@@

مسكينه هالحصه ما سوت عليها انولدت :d

لا ان شاء الله ما نصير نفس حصه ولا نمر بلي مرت فيه

ولا يقصون علينا هالمرشحين
عشان جذي انا ما راح اصوت :d خير شر



يعطيك العافيه اخوي
وعساك على القوه:]

لا للإخوان لا لحدس يقول...

http://no7adas.blogspot.com/

المقوع الشرقي يقول...

وللللللللكم باك
أسفرت وأنورت
:)
صح السانك
وكلماتك تعور

may يقول...

ومن لا يعرف حصة..
الله المستعان..
خليها على الله..

ميمة السبيت يقول...

welcome back

ايه هذي الكتابات والله اشتقنالها

** ايه والله صاج كلنا حصه بس اشوه انه للحين امدلعيني بالبيت ماراحت علي

الزين يقول...

حصه خبلة

كلمة توديها وكلمة تييبها




ولكم باك

:)

أتيت متاخرة يقول...

وااااااايا على حصة
ترى عورت قلبي هالحصة .... ما دورت الا احب اسم لقلبي

حسافتج ترى الحريم واعليه متعودين على الصدمات من زمان
لأن قلبهم طيب >>>> ابتدى التشيش
بس هذا كان اول
الحين اللي يقولهاكلمةتعطيه عشر
واللي يكسر قلبها تشلع عينه

فهمت حصة القصة


حمدالله على السلامة

nanonano يقول...

يا هـــــــــــــــلا و مسهــــــــــــــلا


وايــــــــــد لك فريه
=======

حصّه مسكينه
بس هم ما أحط اللوم كله على الرياييل

لأنها أسمح لي عبيطه

كل ريّال بحياتها يعطيها بمبه..و هم مو راضيه تفهم الدرس

اللي يحر أن في وايد حصّات

و هالحصّات أهمه سبب فوز نواب ما يرون المرأه

بس الصج هالحصّات من تدري شلون ممكن تقنعهم..و تفهمهم

نون النساء يقول...

وعسى هالحصووه محد قالها كلمة طيبة ساحت وماحت
شدعوه يا حافظ ما ينقرص قلبها ويتعلم ..؟؟

قلعتها



وولكم باااك

I7na 3shagnaha يقول...

ماظن اكو حصة هالايام

ماشاءالله عليهم يصفطونك و يحطونك بالمخباة


كل وحدة منة عن 10 :)


WB

:)

lawyer يقول...

حصه جزء من واقع في كل بيت و كل بلد

وحصه هني مو تجسيد لفتاه وشخصيه بنت

حصه اهني كل ام طيبه قاعده في البيت ايي ولدها يقنعها بواحد من المرشحين واتيي جارتها تقنعها بالثاني واتيي بنتها بواحد و الريال بواحد


حصه هني كل وحده لي الحين ما قررت منو بتعطي و تحسم فتخلي الصوت الاخير عشان تبادل فيه او تهديه حق احد بس عشان خاطر اي احد


حصه هني تجسد طيبه المرأه وليس غبائها
فطره المرأه وهي الطيبه والحنان و الصدق


حصه هني تمثل كل مرأه انصدمت من رجل مو بس في ظل ظروف سياسيه .. لألأ صدمه من رجل في اي مرحله بالحياه و ما اعتقد ان ماكو مرأه فينا ما نطقت بدال المره الف من الرجل




آن الاوان لحصه ان تصحوا من غفلتهاا
وماتصدق اي احد



شكرا لك على القصه الي قدرت بمعناها توصل شي جدا كبير رغم بساطه الطرح وهذا الي احنا محتاجينه

شي يلمس القلب قبل اي شي اخر







++++

اهلا و سهلاااااا لك الف مليون مره
شكرا لك على الرغم من ان كان عندي انتقاد كبير و عتب اكبر لاستراحتك في هالفتره الي المفروض تبين فيها دورك الحقيقي مو تنسحب و ترتاح..
شكرا لك مره اخرى

Corpse Bride يقول...

wb

انشالله فهمت القصه..

اكيد تعلمت من الصدمات..

بنت الشاميه يقول...

اسفرت وانورت ...وهلا النور عليناااا

:))))
===
حصه والله ياحسافتج قويه وتتجمل كل لاصدمات والصعاب....بس كل ما رفعت راسها كسروه وقطموا رقبتها ...طبعا
بالمجتمع ...الناس شتقول عليج..؟؟
وبالعادات والتقاليد...هذا مو من عرفنا...؟؟؟؟؟؟
واخير بالفتااااااوى....ياثم من يصوت لها...؟؟؟؟
شيعنى توقف بوجه فتاااويهم
والله ابتلشت حصه بلشت العالمين
العيب موووو في حصه
العيب فى عبدالله وابو عبدالله
يبون حصه كله تحت ريولهم ووراهم
مااااا يبونها بجانبهم ولا اماااامهم
واذا تحررت من سطوتهم
قالوا فيها اللى ما ينقال
شتسوي هالمغروده...صج شتسوي..؟؟؟؟
اللى اقوله
الله يعين كل الحصات اللى مثلهااااا
وهم وااااااايد...... للاسف

Super Woman يقول...

ولكم باك


كلنا حصه
حريم ورياييل



يالله يا بنات
حيلكم بالرياييل

ومالنا غير الحريم



:)


بو الزين
انا جدا جدا جدا احترم عقليتك

KQ8 يقول...

الحمدالله على السلامه

وحياك الله اخووي :)

الدســتور يقول...

من ردى حصة اللي تمشى ورى عواطفها


سياسة يبيلها عقل و انا اخوك

مَـــــعْــــمَــــعَـــــه يقول...

والله مسكينه حصه بكل مرحله من عمرها صدمه

ويا هنياله عبدالله لاعب بايده وريوله

بس يقول...

عودا حميدااا


ويه يا كثر حصة ؟؟


الله كريم

Purplecious يقول...

أنا ماني حصة

















أنا سبيجه

:))

welcome back 7asaftich

ولد الديرة يقول...

عط حصة جنطة وشوف العجايب بس

joy يقول...

اي والله حصيص ذبحتينا موراضية تفتهمين!!!

q80_1969 يقول...

هههههههه لا يبا حصه تغيرت للاحسن ويا رب للاحسن
يعني حصه القديمه اللي اهي والدتي
قلت لها يمه من صوتي له قالت حق فلان , انزين ليش يمه عطيتيه قالت مسكين هذا جارنا وكل رمضان يمر ابوك ومرته اتطرش لنا ماعون هريس عشان جذيه عطيته , انما حصه اللي عندي بالبيت اللي زوجتي لا يبا بعد ما صوتت اختارت الصح بدون مواعين هريس وجيران ولا قلت لها عطي فلان او علان واختارت الصح
بالنهايه حصه القديمه واليديده كلهم عسل واساسنا . اللهم زيد حصاحصنا يا رب (: