بيني وبين نفسي

ها قبييينا؟؟
نقب؟؟ وين؟
ما أدري أي مكان .. بس أنخنقت ماني قادر أقعد
حتى أنا مخنوقة بس بصبر شسوي
شلون يعني ؟؟
شنو شلون يعني .. يعني إذا بتقب الله وياك انا بقعد إهني ماني متحركة!!
وأنا.؟؟
أنت.. أنت اللي تبي تهدني وأنا مربوطة بهالبلد ما اقدر أخليها
أي وأنا بعد مربوط بس مابي أموت أبي أعيش وأعيشج معاي عيشة كريمة
ربي لك الحمد راضية
لكن الياي اصعب.. مالنا والي في هالديرة لا إقتصاد لا سياسة لا رياضة .. انتي ما تبين بيت؟؟
اي ابي
يالله إيدج على نص مليون
إشدعوة نص مليون
خلاص عطيني 400 الف ونأثث تحت لا يو يخطبون بنتي
ممكن اسألك سؤال
سألي يا كثر ما تسالين
وين وطنيتك وحماسك وكلامك وين كل هذا
تبين الإجابة مو جذي؟؟
طبعا
إذا تسأليني عن وطنيتي فيجب أن يكون لي وطن بالاول .. واليوم اللي صاير عبارة عن سوق ماصلي مو وطن
عيب تقول على ديرتك جذي
ممكن تحددين تعريف الديرة شنو؟؟
الديرة يعني دولة والدولة عبارة عن ارض وشعب ونظام يحكمهم
يا سلام عليج .... ألحين ممكن تقوليلي وين أرضنا؟؟ البر وخربوة والبحر وسمموة والواحد لا زرع جدام بيتة يو الإزالة وإنقفوه...
إنزين والشعب؟؟
أي شعب فيهم؟؟ تبين السنة ولا الشيعة . الحضري ولا البدو. تبين إعيال بطنها ولا مو بطنها. تبين الهيلق ولا الجنقل تبين ربع طلال الفهد ولا مرزوق الغانم تبين ربع ناصر المحمد ولا أحمد الفهد.. تبين ربع دهداري ولا ربع الخرافي تبين ربع سكوب ولا الوطن اي شعب قاعد إتكلمين عنة؟؟
اوكي اوكي النظام والحكم؟؟
حكم؟؟ حكم إيــــــــه اللي انت جاي تقول عليـــــة... خليني ساكت إنتي عارفه البوم ومحملة اي حكم إذا رئيس الحكومة مو عارف يلم الوضع السايب بالديرة.. ومجلس نص جم وجنه صار حفر بعد. ومؤسسات ينخرها الفساد من كل مكان
وبعديـــــن؟ شنو هالتشاؤم؟؟ ليش إتقفلها يعني
أنا مقفلها؟؟؟ ونوابج مو مقفلينها؟؟ وحكومتج مو مقفلتها؟؟ وشعبج بكبره مو مقفلها؟؟ أنا عزمت بقب بهاجر ابي عيشة كريمة لزوجتي وعيالي
وأنا بتروح وتخليني؟؟
إنتي اللي ما تبين تيين معاي.. إنتي يا نفسي عنيدة .. وبعدين الرسول عليه الصلاة والسلام يقول النفس أمارة بالسوء . وهذا إنتي قاعد تامريني إني أقعد والوضع سيئ .. يعني قاعد تأمريني بالسوء
يا أخي لا تهتم بالسياسة
ومن قالج إني أتكلم بالسياسة... أنا اتكلم عن الحب.. حب الوطن... الحرامي في هالبلد إذا يبي يبوقها لازم يعمرها عشان يلاقي شي يبوقة
وإذا اللي يركض ورى منصب شلون بحصل عليه إذا هذا حال البلد ... انا ما أتكلم سياسة انا اتكلم عن حب وطن
الديرة صارت ديرتهم مو ديرتنا
منو أهم؟؟
لا تستهبلين !!