زماااان .... زماااان....
كنت أحس إن الكويت هي الجنة... كنت أحس أن الكويتيين كلهم مثل بعض... أطلع من بيت ادش بيت... نفس القعدة ونفس السوالف ونفس الرطنة ونفس القطات والضحكات...
زمااان لما كنت صغير.... زمااان... كنت احس ان كلنا نحب الكويت وفي نفس الطريقة والإسلوب...
زماااان ... لما كنت بالإبتدائي أبلة نورية طقت فهيد طراق ليش قط نكتة على الشيخ سعد رحمة الله علية .. وأنا حاربتة من حبي للشيخ سعد...
زمااان.... زمااااان.... استاذ جاسم لات أذون رفجي انور ليش قاله انوروة (استاذ انا شيعي مابي اصلي معاكم)
زمااان ... كنت احس الكويت عروس... ام شبابها متجدد... جدة حنونة تفوح منها ريحة الطيب والبخور والخنة...
علمتني أمي اصعد الصطح واركب علم الكويت في 25 فبراير...
كبرت وكبرت هذي المفاهيم معاي ... كبرت على اساس ربعي الشيعة طيبين والبدو اهل نخوة والحضر كلمتهم وحدة..
كبرت وانا افتخر بجوازي الازرق.. واستانس اقول لا سافرت انا ياي من الكويت... (تعرفون الكويت؟؟) واقعد اشرح وارطن بالإنجليزي حق سايق التكسي او الطبيب بالمستشفى شنو إهي الكويت.. واتكلم عنها وعن شعبها وعن ابراج الكويت..
أتكلم عن منتخبنا وعن سياستنا وعن اميرنا...
كبرت وتمكن فيني حب الكويت...
بس المصيبة إني الظاهر كبرت شوية زيادة عن اللزوم وعرفت اشياء وايدة واكتشفت اشياء خلتني اسال نفسي
هل كنت عايش في حلم الطفولة؟؟ ام أن المفاهيم تغيرت والكويتين تغيروا
كبرت ولا سألني احد بالسفر انت من وين؟؟ اضيع الصقلة او اضحك واقول (Guess) ؟؟ من عقب ما كنت انا اللي اقول ترى انا من الكويت..
كبرت وعرفت أن الكل يحب الكويت... نعم الكل يحب الكويت بطريقتة .... بس مع الاسف مو الكل طريقتة صح !!
كبرت زيادة عن اللزوم وشفت أن مو كل أهل الكويت هم أهل الكويت ... مو كل الأبلات نورية ولا كل الاساتذة جاسم ولا كل الأمهات امي ولا كل شيخ شيخ ولا كل بدوي بدوي ولا كل حضري حضري ولا كل شيعي شيعي ...
كبرت وعرف وفتحت البلوق هذا ومن حر ما فيني سميتة (حسافتج يا كويت) وبعد سنتين من الكتابة وخلوني محسوب على فلان وفلنتان ونسوى لا يقولون إني محسوب على الكويت...
كبرت وعرفت معناة جمله (حق يراد بة باطل) (والغاية تبرر الوسيله) (ومن صادها عشا عيالة ) ... إخ
وآخر كلامي اليوم وبعد ما شفت وين وصلت الديرة بأيدي امثال جماعة سكوب ومن هم على شاكلتهم... اليوم بالذات
كبرت وايد وااايد وعرفت إن مو كل كويتي كويتي !!
الاشتراك في:
تعليقات الرسالة (Atom)
هناك 30 تعليقًا:
هاي العهد الجديد يابا
مو عاجبك؟
ذكرتني بقصيدة المرحوم بإذن الله
الاستاذ الشاعر صالح النصرالله
http://www.youtube.com/watch?v=5bu4RRHkqME
= ياكويت =
يا كويت بالمرّه علي لا تعتبين
لاني بمنك ولا انت يا كويت مني
ماني ولدك اللى بالأول تخبرين
ولا أنت بأمي اللي علي تحني
من يوم فضّلتي علينا البعيدين
صرتي عذاري بان منك التجني
عيالك طردتينا واحنا المودين
وخذت عيال غيرنا بالتبني
ناس أرغدوا وأثروا وأهم مستريحين
والي اشتقوا ما حصلوا الا الهبني
يوم السفر والغوص وبيوتك الطين
روحي اسألي الهيرات يا كويت عني
تعطيك عنا العلم وتخبرك زين
وتذكر لك ايام لنا جد مضني
بين السفر والغوص راحت لنا سنين
يشتان منها القلب ويهبلني
نقطع غبيبٍ تدّهر كالبراكين
عقل الدليل ايكود منها يجني
ونصارع أمواج البحر مستميتين
ابدا فلا نرتاح أو نرجهني
كلها لعينك بس نبغيك ترضين
ندعي العمار الغالية يرخصني
ويوم صفا جمبك وزرعك غدا زين
والخضر هلّن والعجاف ادبرن
حنا غدينا من جناك محرومين
واللاش بأرضك دالهن ومتهني
ما ينفعك يا كويت بالعسر واللين
الا عيالك واخذ العلم مني
هم عزوتك واهما غناتك عن الدين
واهما الذرى لين الليالي اظلمني
والا الغريب لو جاد وياك الحين
عليك ما يبرح يدور التجني
يبدي البشاشة ويظهر العطف واللين
ومن تحت ثوبه خنجر لك يسني
بس ينتظر يبغيك يوم تطحين
حتى يغرسه واخذي العلم مني
مع كل أسف صدقت
تراك تجر المعاني من داخل قلبي
وتعبر فيه بطريقتك عن اللي فيني
الكل له اسلوبه
واسلوبك يخاطب اللي احساسه ليلحين ما مات
يمكن هذه دلالة على إنك ما كبرت كثر ما تظن لأن الكبير بمفهوم الناس مات إحساسة
ديرة ما يجوز لنا نستسلم ونخليها
وبس نتحلطم ونتسامح منها
لازم نصمد وبالفعل نداويها
واحد حسافتج يا كويت والثاني كويتي لايعه كبده... ودهداري بسكوب وأمثالها برضاهم يكسر فيها.
تصبح على خير يا صديقي العزيز
ولا أعلم أي خير أقصد
توني قاعد اقول ابي افكر ايجابيا
وخلنا شوي من السلبيه
قريت كلامك والله ضاق صدري
العاب قذره هذه اقل ما توصف به
هي ما تدمر الكويت
ناس نشروا بينا العنصريه والطائفيه لمصالحهم الشخصيه سواء بالانتخابات
او من اجل ان يكونوا هم من يحركوا هذه الفئه او تلك
زين ليش هالوصاخه من الناس هي اللي تطلع على السطح
نفس الزيت الوصخ واعذرني على اسلوبي بس والله من القهر
هم نفس الزيت الوصخ اللي عمره ما ينخلط مع الماي النقي
بس يطلع هو اللي على السطح
حتى اغلب الناس تفكر و تقول
الاناء كله من هالزيت
لا الكويت مليانه من الشرفاء
واللي يحبونها الحب الصحيح
ولكن المشكله مو مجتمعين
شوف اغلب المدونات
تعرف الخوف على الكويت و مستقبلها
تناقشت مع كثير من الشباب الكويتي الحر
اللي يحب الكويت حب خالص
حب صحيح
اللي نبيه هو اننا نجتمع
ما نبيها سياسيه بس
نبيها طلب منا للناس كلها
نقول الكويت بخير
واحنا كفو انا نكون في وجه كل هذا
ومع بعض نقدر نشيل هالسرطان
اذا صج نحب الكويت حب خالص وفي الاتجاه الصحيح
يا زميلنا مبيوق
الخوف انا وياك نطلع الكواوله باجر وهذول الي يقولون غير السباح ما نبي وبدنا نتجوز عالعيد مادري شيقولون هم الكويتيين الاصيلين
شي ينكس الرؤوس والله
اي والله صدقت بكل كلمه
عاد تصدق حاليا بالسفر ما أقول من الكويت فعلا
واقول من الخليج واكتفي
بس صج صج
عورت قلبي
وياحلو إسم مدونتك
حســــــــافتج يـا كـويـــــت
وكـل الحســـافه
أه يــا بـــلـــد
يقول مسفر الدوسري:
كان البحر أزرق
كان الشجر أخضر
وطبع الهوى حنيّن
من رقته ينباس
والحب كنا دوم
نلقاه وسط القلب
نلقاه في الشارع
نلقاه في الكراس
...حتى شوارعنا
كانت تعرف تحب
كانت حنان وقلب
كانت دفا وإحساس
يا حليوة قولي لي:
علام الديرة متغيرة؟
علام الناس غير الناس؟
يا حليوة شلي صار؟
كان البحر مالح
!!وإحنا نذوقه عذب
كان الشتا قاسي
!!وإحنا نحسه قلب
كانت سموم الصيف
..كلما هبت علينا
نستطرب السامر
ونموله ..نسناس
يا حليوة قولي لي :
علام الديرة متغيرة؟
علام الناس غير الناس؟
يا كويت يا حبيبة
قولي شللي صار؟
جرحك ماهو خافي
أنا أحسه نزفه
غنيته ياماسنين
وعيوني تعرفه
بس أنتي
كنتي دوم..أكبر من أحزانك
كان الربيع يذبل
وتخضر أغصانك
وكان الزمن يحلى
كله عشانك
ونطرزك في القلب
ونرددك أنفاس
ولو تجرحك نسمة
قلوبنا صاحت
وتقولك:لا باس
ولا تحزن الديرة
ولا تنكسر هالناس
حسافتج يا كويت
هالقصيده ارددها بقلبي كل يوم
وكثر ما اقرا نادر ما القى كلمة تعبر عن اللي احسه
ومع تدوينتك هذي انت فقت الشعر وعبرت عن احساسنا كلنا
علام الديرة يا حسافتج متغيره؟
وعلام الناس غير الناس؟
:(
كلمات ، تلامس القلب ..
مطقوق
لا مو عاجبني وخل يطقون راسهم بالطوفة
البوابة
قصيدة معبرة تتكلم بلسان حالنا اليوم
كويتي لايعة كبدة
انا من صجي تعبت خقييييت
مصيبتي ثورجي مو مسالم ما اعرف احارب بالقلم
فيلسوف
هذي فجييير وهذي سوالفها
اسلوووب صدامي وكذب
جبريت
فعلا بدأت اخجل من هويتي
واستسلمت للامر الواقع مع الاسف
الكثرة تغلب الشجاعة
انذر دي
الله كريم ويحيني انا وياج لين ايي اليوم اللي نفتخر فية امام العالم باننا كويتون
انتر
هل تعتقد خلاص؟؟
راحت علينا؟؟
إستكانة
تسلمين ويسلم مسفر الدوسري
انا فقد الامل في كويت الاول
وهذي المقاله من المقالات العفوية اللي ما رديت قريت انا اشطتبت ولا راجعتها
كتبتها وخلاص
لاني فعلا قلبي عورني وانا اكتبها
شيخة
انا اتعبتني هذي الكلمات وستظل تتعبني كلما رايت واقعنا المرير
اي والله حسافه ماكو كويتي اصيل يشيل هاللافتاه وقميضه عليج يا كويت ...صار المغترب هو اللي يشيلها.... قميضــــــــــه عليج يا كويت وقميضه علي اعيالج اللي اغسلوا مخوخهم بعناوين تظهر ما لا يبطنون من نواياااه سيئه للبلد باسم الدستور .....ولكن مايصح الا الصحيح والكويت لها الله حارسها
صدقت والله
مو كويتي كويتي
!!
كل يوم ارد من الدوام مصدومة
لما يضيع الاخلاص
وتضيع الامانة
وينعدم الاحساس بالمسولية
والكل يفكر شلون ياخذ من ديرته
ومحد يفكر شلون يعطيها
شلون مايوصل هذا الحال
:(
مو كل كويتي كويتي*
اليوم قريت بالجريدة تصريح وايد "جميل" للشيخة فريحة تقول للي يطالب ناصر المحمد بالرحيل فاليرحل هو و يترك الكويت و أهلها وشأنهم!! طبعا انا شكيت بنفسي بس بغيت أعرف رايك بالموضوع؟!
بجيت...
لما قريت كلامك.
وتذكرت أيام الغزو
لما كنت بعمر السبع اسنين..
ارسم علم الكويت
وألزق الأوراق الصغيره على بالب بيت يدتي..بالسرّه..ويحاوطون العراقيين البيت ويقولون هذي سفاره أمريكيه...
كنت أبجي ...مو لانهم محاوطينه!!!
لأنهم قالو سفارة أمريكية!!! مو كويتيه!!!
أبي يرجع إحساسي الأولي...
أبي أرجع أبجي كلما سمت إغنيه وطنيه...
بجيتني وانا اختك...
وماقول الا حسافتج ياكويت
هذيل بيتين كتبتهم سنة ٨٥ تقريبا وأنا ماني شاعر ولا عمري كتبت شعر غير هالبيتين
مالي أرى الزمان غير زماني ** وأرى هذا المكان غير مكاني
مالي أحس الغربة في وطني ** وهل تكون الغربة في الأوطان
=====
موضوعك ذكرني فيهم وعمري ما قلت شعر غيرهم ولا أظن إني بكتب غيرهم
لكن رغم الظلام والكآبة ، لازم تشرق الشمس
ورغم كل سلبيات جلسة أمس الكثيرة ، لا زلت متفائل بمستقبل أفضل لأنه بالأمس سقطت خطوطاً حمراء وهمية كانت من المحرمات سابقاً وكان لابد من سقوطها منذ مدة ، لكن الظروف تغيرت .
توقيع عدم التعاون ، رغم عدم نجاحه عددياً ، رسالة يجب أن تستوعب من كل من سيتقلد هذا المنصب مستقبلاً .
الكويت باقية والأشخاص زائلون ونحن نعمل لمستقبل أولادنا وأحفادنا وليس لنا بشخوصنا .
تحياتي
فعلا حسافة بس ترا الأرض هي نفس الأرض ولا عمرها تغيرت. اللي تغير أكيد الناس. الكل صاير مادي يشفط من دم هالمسكينة لما أذبحوها
صج حسافة عليج
السلام عليكم
أنا معاك يا أخوي بكل كلمه قلتها وبكل حرف قلته ألحين الشعب الكويتي مو مثل قبل والمشكله انه الجيل القادم بكون أردى من الموجود فالله يستر على الكويت ويحفظها وايد مدلعين ومدللين الجيل القادم .
هذا الي يسمونه العهد الجديد
والله احنا نتحمل جزء من المسؤلية
اكو احلى أكو أجمل
أكو اغلى أكو أبهى من الكويت
الله ياشعب الكويت
شوفوا وطنا من جديد
الغالي شع نوره
صار فى أحلى صوره
واكتمل اليوم فرحه وسروره
والعزيمه من حديد
أكو أحلى أكو أجمل
أكو أغلى أكو أبهى من الكويت ؟
الله يا شعب الكويت
أكو أجمل من شعب الكويت
الله ياشعب الكويت
إنتوا هلى وناسي
هذول ياسامعين الصوت
هم تاج راسي
أكو أحلى أكو اجمل أكو أغلي
ما نتوقف في عطانا
شوفوا بس منهو معانا
الأمير ويه ولي عهده معانا
الله يا شعب الكويت
أكو مثل الكويت
أكو أحلى من الكويت
أكو أجمل من الكويت
أكو أبهى من الكويت
أكو أغلى من الكويت
الله ياشعب الكويت
**********
دوام الحال من المحال
و
لو دامت لغيرك ...ما تصلت اليك
كلامك بعور القلب و زادتنا استكانة بكلمات مسفر الدوسري
و الله اني اذكر و احنا صغار "عيب" نذكر مذهب او طائفة ربينا و تربينا على هالشي ... بس نفوس الناس تغيرت و بدال ما نزداد ايمان و نكون على قلب واحد للأسف ازددنا تطرفا و كرها للآخر ...
شكرا لك لملامسة اوجاعنا بكل صدق ...
عل جرح والله ,جنك اتحجى بالنيابة عني , دمعت عيني و انا اقرى .
إرسال تعليق