رحت صلاة الجمعة وبعد سماع الخطبة وإقامة الصلاة ..صفينا كلنا للصلاة
ولأن إصطفافنا للصلاة مثل (الماكنتوش) كل الناس تختلط بكل الناس وإت وحظك عاد ... فكان حظي ان صف يمي واحد ريحتة بصل وحمسة وكان معرّق وريحت تخنق... فتدودهت وما عرفت أركز في صلاتي ...
لأ لأ فعلا إنخنقت ومع كل حركة ركوع أو سجود كانت تهف علي ريحة (أعوذ بالله منها)
فكنت أحط ايدي على خشمي وأخذ نفس وتالي اقمت نفسي بس علشان اقدر اركز
أنا مو قاعد ابالغ والدليل إن اللي يم (بو ريحة)الصوب الثاني اول ما خلصت الصلاة إلتفت علية وعطاة نظرة !!
السؤال... ليش جذي ؟؟
هذي صلاة الجمعة ... الواحد لازم يتسبح وتطيب .. لا يتسبح وخل يقوم من فراشة إلى المسيد على طول.. بس يتعطر
لا يتعطر كيفة... بس على الأقل يعرف إن وراة مسيد فلا يقعد في مكان فية حمسة وطباخ.. ولا يسوي مجهود ويعرق !!
أو إذا إنجبر على الجهد أو الطباخ يخصص 5 دقايق ياخذ شاور مع صابونة !!
الرسول الكريم قل خذوا زينتكم عند كل مسجد.... ومع الأسف مفهوم اغلب الناس للإسلام هو الزهد ولبس الشماطيط والبيجامة أو الملابس البالية... وتلاقية نفسة لا بغى يروح مطعم او مول او اي مكان يتزقرت وتعطرويتبخر
أنا مليت من هالأشكال اللي تخليك ما تركز بالصلاة أصلا ... بروحها صلاة كل إسبوع
لا وياينا الشتا ودلاقات وريحة خمرة ....
أرجوكم يا ناس راقبوا عيالكم.. إنتي يا أم حرصي على ولدج المراهق قبل لا يروح الصلاة أن يكون نظيف
وأنتي يا زوجة حرصي على ريلج أن يكون امبخر ومعطر ونظيف
أنتوا يا معشر النساء أصحاب البيوت... عطوا طبابيخكم وسواقينكم هدية (دهن عود ولا كلونيا ولا بخور) وييبوا السالفة جنها هدية ووصوهم إنهم يتعطرون قبل صلاة الجمعة خصوصا وباقي الصلاوات بالمسجد
يا جماعة الواحد لا بغى يصلي يعني يبي يقابل ربة... معقولة الواحد يقابل ربة بالملابس البالية والريحة الأرف!!!
ولا بغى يقابل أي شخصية راح حمام مغربي وتسبح وتعطر وحرقلة بخور بذيج الحجاية علشان إنسان حالة حالة !!
والله إني أحرص إني لا صليت أكون أفضل شي وساعات أصك القولة بعد علشان ابين النعمة والخير اللي ربي عطاني إياة .. ابينه لربي كنوع من الشكر...
الرحمة يا ناس الشتا ياي الدلاقات لبسوها يديدة مو أمخمرة من أمس
أشوه إن صلاة الجمعة بالضحى العود يعني أغلبنا توة طالع من البيت... ولا لوهي بالليل وآخر اليوم جان صار المسيد من خمرة دلاقاتكم وعرقكم عبارة عن مصنع كيماوي قاتل...
وأخيرا نطلب من النساء الإهتمام بالرجال قليلا وخصوصا المراهقين وأصحاب العمل اليدوي والطبابيخ والدريولية
يا أصحاب البيوت هالله هالله بخدمكم أهتموا بريحتهم لو سمحتوا
اليوم راحت صلاتي وما ركزت فيها والسبة بو ريحة خايسة.... باجر يمكن اقطع صلاتي واتلّة برة المسيد وأكمل
ويمعة سعيدة عليكم ويرزقنا المطر يا رب
الاشتراك في:
تعليقات الرسالة (Atom)
هناك 10 تعليقات:
اسمع هالسالفتين يالزميل
اول سالفة
انا مريض بالسكر و اخذ ابر و مرات يحوشني هبوط بالدوام لأن مثلا الجرعة تكون مخصصه بس حق نشاط معين و مرات يزيد النشاط و مرات يقل المهم
صلينا الظهر و الا واحد عربي مو هندي ريحة دلاغاته يا ساتر ما كملت الركعة الثانية و المشكله اني بالصف الثاني و وراي اربع صفوف ما قدرت لأني حسيت خلاص برجع انا طلعت من الصف و الا ربعي بويهي هدوا صلاتهم و الحقوني عبالهم حايشني هبوطو خصوصا اني فعلا اول ما طلعت رجعت
السالفة الثانية
عامل التنظيف البنغالي اللي بالدوام معاه كيس فيه ملابس تخيل يبدل ملابسه قبل الصلاة
اكره ما عندي احد يكورع بالصلاة لا و لحيته لسرته تقوله هذي ريحة ما في بطنك اشلون تخلي الناس تشمها يقولك انت متخلف لما قاله احد الحضور و هو مطوع و راعي دين قاله ترى الرسول نهى عن التجشئ
و توني ادري انك لما تتورع يعني تجشئ
و قيس على ذلك
سؤال يطرح نفسه
اذا الخالد استقال يعني الخمس ملايين بح
لوعت جبدي
ما عليه يا اخوي الله يغفرلك ان شاء الله, وفعلا كلامك صحيح وهذا الشيء انواجه بصلاة التراويح برمضان ايوونك الحريم ريحة ملابسهم طبخ وقلاي . يا جماعة الرحمه بالمصلين والمصليات مطلوبه.
ماكو الا انحط شخص اوشخصه شمام عند المداخل والي ما تعجبه ريحته يعطيه صابونه وفوطه ويكون في شورات عند الباب ياخذ شوره ويدخل عقبها المسيد.
جمعة مباركة "اكثروا من الصلاة على الرسول صلى الله عليه وسلم"
إنتر الغالي
ما ألومك والله اليوم لو في ركعة ثالثة جان زوعت
لوووووووووووووووووول
انت ذابحة قلبك الخمس ملايين
يبا الخمسة راحت وانصرفت وفي غيرها مليارات
يايين على هالفقير بو خمسة ملايين
يعين الله
وما تشوف شر توني ادريإن فيك سكر
بس خل اقولك معلومة
السكر ما إيي إلا للسكر
مطقوق
انا لاعت جبدي مرتين
مرة وأنا اصلي ومرة وأنا اكتب هالموضوع
مهندستنا
الله يعينكم على ريحة القلاي
يعني المفروض إن الحريم يكونون أكثر إهتمام من الرجل في هذي الامور
أنا ياي اشتكي لكم لقيتكم تعانون !!
بس يا معودة أهون أنتوا مرة بالسنة حنا كل يوم !!
أبي بندول ...
حتي انا طافت علي الصلاة تصدق متضايق والسبب السالفة السخيفة هذي انطر من الاسبوع الى الاسبوع وابي اصلي صلاة اليمعه وتروح علي النومه ..
الجمعة اللي طافت, كنت رايحة بيت اهلي قبل الصلاة... والا بطلعة السايق بيروح يصلي
تبارك الرحمن يرفرف من النظافة... القحفية المطرزة وريحة الدابر امله وين اللي ما يشمها!... والله اني تعززت مو بس حق اللي يصلي يمه... حق كل اللي يمرون من الطريج اللي يمشي فيه!
عمرك شفت دابر امله ينباع بتولة؟
** لووووول صراحة الله يعينكم انزين انا عندي لك خووش حل روح صل بشويخ السكنية ولا النزهه يمكن الوضع احسن شوي هناك كل شي غير حت المسايد
- انا كنت رايحه الجيام وكان فيه بنات بو 13 12 سنه قاعدين ورانا و يسولفون و اكو ياهل لابسه مضاعد بيدها بس تراكض و رانا والله صج صكت راسي طبعا ما سمعت من الصلاة ولا شي و بس انطر يسلم عشان ابطش فيهم
اهيي خلصت الصلاة و اروح لهم و ازفهم زفه قلتلهم احنا يايين نصلي انتوا ليش يايين ؟؟ جان افتر على ام الياهل و اقولها هذي بنتج جان تقول ايه و تيييييها زفه محترمة و بعدها الله وكيلك ماشفت ولا احد منهم
ناس ماييون إلا بالعين الحمرا
في عضو في منتدى المؤشر بايق بوستك اللي طاف
http://www.indexsignal.com/vb/showthread.php?t=203174
تحياتي
إرسال تعليق