اليوم قالوا صكوا المطاعم بعد 12 بالليل
باجر بيلزمونا نلبس بامبرز علشان نساهم في معالجة كارثة محطة مشرف!!
وعقبها بعينون لجنة عند كل فريج تجيك على لبس عيالنا وبناتنا
ومو بعيدة يركبون جرس ويرن كل يوم الساعة 8 بالليل علشان ننام
ويمكن يفتشون عند كل إشارة على اظافرنا وياويلة اللي مايقصهم !!
ولا استبعد من حكومة ناصر السادس ان يتدخلون ويغصبون كل أعزب على الزواج
وليش لأ ان ينزل جدول إسبوعي بقائمة الأكل لكل بيت فالسبت نشم حمسة والأحد نشم زفرة والأثنين مجبوس دياي والثلاثاء لحم والأربعاء باستا وسلطة والخميس نودلز وسوشي والجمعة بيتزا
وشي عادي ولا تستغربون إذا طقوا عليكم الباب وعطوكم جدول زيارات الأهل والاصدقاء والدواوين والتسيورات
بالله هذا قرار؟؟؟
تركتوا كـــــــــــــــــــــــــــــل مشاكلنا بالبلد ويطلع قرار من مجلس الوزراء بإغلاق المطاعم بعد منتصف الليل!!
بالله عليكم هذي حكومة تتطلع ان تجعل الكويت مركز مالي؟؟
اي مركز مالي اي بطيخ... يعني من اليوم ورايح إذا جزت عيني عن النوم واشتهيت اكل شي وين اروح يا مجلس الوزراء؟؟ ادخل بيوتكم بنص الليل آكل آش عند صفر و دولمة عند موضي و لحم عند العفاسي و ستريغانوف عند الهارون ولا آكل تبن وسم هاري عند أحمد الفهد؟؟ وأحلي بكاكاو سويسري عند سموه؟؟
يا بو صباح ... طفح الكيل من قراراتكم التي ستجعل الكويت مركز خالي... خالي من أي مظهر من مظاهر الحياة المدنية الحديثة
الاشتراك في:
تعليقات الرسالة (Atom)
هناك 15 تعليقًا:
القانون هذا مو أول مرة يحاولون تطبيقة
طبقوه فترة اواخر التسعينات او اوائل الألفين وسقط
ماهو علشان سواد عيوننا
بس جشع التجار بهالحالة كان لصالحنا وكفل لنا حرية القز لي تالي الليل
لا تحاتي ما راح يسكتون هالمرة مثل ما ما سكتوا المرة اللي طافت
السؤال اهو، شلون مر هالأمر واللجنة مو بإيدهم؟ عيل لو كانت اللجنه بإيدهم جان شصار؟
تهقى يفرضون علينا نلبس بنجابي مستقبلا؟
لييش يسكرون المطااعم ليييش بالله سهرانين بالويك اند ويعنا نقزرها خبز وجبن ؟؟؟؟
لا عاد صج مصخوها
بالله ما عندهم الا تسكر المطاعم والي بالمطار شيسوي اذا الشباب يبون ياكلون بنص الليل ؟؟؟
يالله حلوا مشكله وصنعوا منها مشكله ثانيه
لعنة الله عليهم و على قانونهم
امس نحوس بحولي من قهوة لي قهوة ما قدرنا نقعد الا خشاشي
هالمره انا معاك مو ضدك بالي قلته
يمكن انا بنت ومايهمني هالشي وايد ولا راح يأثر علي
القانون هذا سب لحرية المواطن الكويتي
انا كنت اتطلع انهم يفتحون المجمعات لي ١٢ بس للأسف :(
(( للخلف سرررررر ))
*ملاحظة:
مادري ليش احس وانت تكتب تكون معصب
هل فعلا انت لما تكتب تكون محتر و محترقه اعصابك والا عادي الوضع عندك؟
تعبنه والله ... زهقنه والله ... ملينه والله ... بس عاد رحمونا الناس تمشي جدام واحنا نركض ورا
من صجهم انا الي اعرفه كل ما زدت ساعات العمل الليلى اولا : تقل نسبة الجرائم لان راح يصير عندك حركة بالليل مثل النهار وبارتفاع نسبة الامن يأهلك لتكون بيئة جاذبة تجاريا اشلون بسوونها مركز مالي وقراراتهم ترجعهم ورا ، انا قبل يوم كنت فيرجن ميجا ستور وكنت اسال الكاشير اتسكرون بالويك اند الساعة كم فقالت لى الخميس والجمعة الساعة 11وبقية الاسبوع الساعة 10 , بس في قرار جديد احتمال انسكر الساعة 9 قلت انا معقوله احنا الموظفين نطالب ان الاسواق تتاخر صباحا فى بدا عملها مقابل علشان يطولون لساعه متاخره وهذا يساعدنا اننا ننزل بعد ما ينامون الاطفال فتلاقي مكان توسع صدرك فيه بس اشوف كل مالهم ويصكون علينا
الله يعيين .
ردد ياليل مطولك
لاااا........ ويبونها تصير دولة سياحية ....
أقول مالت على البامية ............!!!!!!!
هههههههه
انت تبي تضحك
شوف برجر كينج و هارديز
يصكرون اليتات بعد الساعة 12 و يشتغلون على الديلفري و خدمة السيارات
هههههههههههههههه
هذا فعلا اللي يقولون هم يضحك و هم يبكي
ماكو احلي من البر والبحر ...
المركز المالي كذبة
يعني شنو (ستريغانوف )
اللي بتاكلها عند الهارون
احلى من المموش مال سلوى الجسار والا لا ؟
أهم شي باب جونز لا يسكرونه
:)
عندك ربك... ادعي ويستجيبلك.
إرسال تعليق