فرّاش ومدير

نور الدين حق.... هذا إسم الصبي اللي يشتغل بالشركة عندنا .. جنسيتة بنغلاديشي وصارلة 8 سنين يشتغل بالشركة اليوم ياني يقولي انا خلاص بسافر وماني راد ... قلت له ليش يا نور ليش منت راد؟؟ عسى بس محد أمزعلك؟؟ قالي لا بابا انا واجد زين بس خلاص انا اكو بجّا صار كبير و انا يبي يروح سوي زواج ما بنتي ويبي يشتري بيت !!

قلت له ربي يوفقك يا نور الدين وبنفقدك... والله إن الجاي والقهوة ما يحلون إلا من إيدك.... بس تعال .. جنك قلتلي تبي تشتري بيت؟؟
قالي أييي بابا..
قالت ليش البيت بجم عندكم قالي وااااااجد رخيص مو مثل كويت... قالت ادري مو مثل كويت... (وعليك بألف عافية) وعساك اتهنى وتتهنى حكومتك اللي موفره لكم البيوت والاراضي برخص التراب... صحيح ان مستوى المعيشي بالكويت وايد افضل لكن البيت من أهم امور الحياة... فهو قبر الدنيا.. وهو امن وامان لكل اسرة ... وبالنهاية هو ظهر الاسرة جميعا..
نور الدين معاشة ما يتجاوز 120 دينار ويقولي انة اكتفى ودخل اعيالة المدارس وزوجهم وشرالة ارض وبناها والحين يبي يرتاح ويستمتع فيما بقي من حياتة.. مع إنة عمرة ما تجاوز ال38 على ما اظن...
أنا معاشي يشكل عشر اضعاف معاش نور الدين... ومع هذا نصة للإيجار و الباجي مابين سيارة ومأكل وملبس و اربع طلعات عشاء بالإسبوع ونثريات البيت وغيرها.. وماني قادر احصل او حتى ايمع ثمن شقة في الشعب تطل على عمارات وليس البحر !!
انا اهني مو بصدد أن احسد الفقير على موته الجمعة ولا بصدد أني اشوف الكعكة في يد اليتيم عجبة...
ولكني ابي افهم شي واحد البيت رقم واحد وهاجس كل رب اسرة ليش الواحد يقعد يفكر في هذا الهاجس اول عشر سنين من حياتة وباقي العشرين سنة يكون انتهى من القروض و ارباح البنوك و و و و؟؟؟ يعني إذا صار عمرة خمسين يبتدي ايمع فلوس !!
معقولة؟؟
ليش الاراضي سعرها نار وشرار مع إن مساحتها لا تزيد عن 400 متر وبشارع داخلي وماكو اي ارتداد ويادوب تقدر تسفط سيارتك ولازم على الاقل كل شهر مزلوقة سيارتك من جيرانك والسبة الضيج؟؟
دولة مثل الكويت لا جو حلو ولا حكومة سنعه ولا في نظرة إيجابية للمستقبل والارض فيها إذا كشخة جدامك محول !! وتلاقي سعرها تقدر تشتري فية قصر يطل على بحيرة في اجمل بقاع الارض!!
ليش تسوون فينا جذي ؟؟
علشان نلهى ورى البيت ونتركم تخنبقون على كيفكم؟؟
عيل معوزكم بنقعد لكم قعدة لين ناخذ حقوقنا ويا ناخذها يا نترك لكم البلد ونجعلكم ملوكا وامراء وحاكمين على اطلال !
ولن يبقى بالكويت شريفا ليس لأن الكويت اصبحت أطلالاً لا سمح الله فنحن لا نترك بلدنا لأن الخير قد ذهب منها ولكننا نتركها إن أصبحت الحكومة تذل شعبها ... فما نحن بأكرم من سيد الخلق محمد الذي ترك بلدة وحكامها يحكمون الاصنام
فهل تريدون أن يقال أن حكومة الكويت تدير شوية فداوية ومرتزقة وأصنام؟؟

وأخر كلامي لحكومتنا.... أن حسبي الله ونعم الوكيل جانكم خليتونا فقراء وأحنا اغنياء
عيل الصبي عندة بيت والمعزب مو لاقي بيت؟؟

لا وألحين النواب طالعين لنا طلعة يبون يزيدون القرض الإسكاني إلى 100 الف علشان اسعار الأراضي تزيد بعد !!
لا من حكومتنا ولا من نوابنا... يقول المثل طلقها وأخذ أختها ... قال الله يلعن الثنتين