لا تقتلوا الناس بالمساجد !

لاني شيخ دين ولاني إمام....
بس الله عطاني عقل أفكر....
رمضان ياي والمسايد بتنترس إنشاء الله من المصلين والمصليات وربي يتقبل منا جميعا....
يا جماعة الخير ...هالسنة غير.... هالسنة أكو شي أسمة إنفلونزا الخنازير... مرض معدي ومؤذي ويمكن يؤدي للوفاة لا سمح الله..
عشان جذي ... الناس اللي تحوشهم إنفلونزا الخنازير أو إنفلونزا السناسين... تكفون صلوا ببيوتكم آجر لكم... هذي نصيحة ماهي فتوة
والرسول يقول (لا ضرر ولا ضرار) يعني تروح وأنت تعبان تبي الأجر... وتقعد تعاطس وتكحكح وكلينكساتك ترس مخابيك وتعادي خلق الله علشان تاخذ حسنة وأنت تسببت بأذى أخوك او اختج المسلمة... علبو ابي أجر...
الأجر بالنية إنشاء الله بس لا تعادي خلق الله
ولا تقول أتلثم ولا لا شفت الصحة شوي قلت فيني شدة خل اروح المسيد... ولا عاديت خلق الله تقول والله مو قصدي..
خو هالايام دايرة بالبلد الناس تسوي مصايب وتقول والله مو قصدي...
ولا تقول فيني إنفلونزا السناسين وعادي .... لا مو عادي هم هذي اتعب الناس وتمرضهم وإن كان علاجها بسيط
لكن أنت ياي تاخذ أجر فلا تأخذ حسنة وتكسب سيئه... شالله حادك
وتذكر أن يمكن يكون يمك مريض كانسر او فشل كلوي او او او ولا يتحمل اي فيروس..
عشان جذي خل نيتك بأول رمضان أنك تصلي بالمسيد و لا حاشتك أي انفلونزا اربض بالبيت لين ربي يفرجها وتطيب
وتذكر إنك ممكن تقتل نفس بغير قصد إذا عاديتة

وأتمنى من وزارة الإعلام أن تأخذ كلامي هذا بعين الإعتبار وتسوي توعية بين الناس... مع أني أدري أن ماكوا فايدة فيهم يالله همهم يحطون إعلانات لمسلسلاتهم ..
بس الوضع خطير
وتقبل الله صيامكم وقيامكم وبلغكم رمضان مرات ومرات ومبارك عليكم الشهر...