ما تصبرنيش.. ما خلاص.. أنا فاض بيه ومليت .... بينلي إنت الإخلاص وانا اضحي مهما قسيت

إنما للصبر حدود
للصبر حدووووووود



الثلاثاء، 5 أبريل 2011

رساله لعيالي

أبنائي ॥ لا يغركم اللي تشوفونه اليوم بالديره... انا اعرف ان الجو اصبح غير صحي للعيشه بالكويت وأدري ممكن تلوموني اني مت وخليتكم عايشين بالكويت , لكن صدقوني ماكانت الكويت جذي لا يغركم المجتمع اللي تعيشون فيه اليوم ولا تحزنزن على نسيجه المتهالك ترى قبل كنا شحلاتنا ما فينا إلا العافيه... نحب بعضنا بعض ودمنا اختلط بالغزو ... إي على طاري الغزو (هذي غلطه صارت وتالي سامحناهم) والظاهر ما فهموا الدرس ما علينا يمكن تسمعون شيعي سني بدوي حضري ... انت شصلك ان شفخذك انت شزندك॥؟ مالكم شغل قبل ماكنا جذي او بالاحرى ... مو لهالدرجه يا عيالي لا تلوموني وتقولون ليش ما عشنا بمكان له مستقبل ترى الكويت كان فيها مستقبل واعد والله بس الله يسامح الصراعات اللي صارت وعطلت التنميه وخبري على ايامي ظهر رجل يدعي التنميه وصدقوه رجالا ومطبلجيه املا بالتنميه المنشوده ولكنه عند الإستجواب لاذ بالفرار عاد مادري شصار الحين لا تعتقدزن اني قطيتكم في مكتن مو زين ترى على ايامنا كانت الكويت حلوه واهلنا الاوليين زينين وماكانوا جذي مثل اللي تشوفونه ولا يغركم حكامكم اليوم ترى كانوا الصباح يحكمونها قبل بحكمه ولا يغركم مجلس الامه ترى كان فيه رجال محكحكت(ن) معادنها ولا يضيق خلقكم تشوفون ديرتكم منخوره وشبكات تجسس وانعدام امن ... ترى الامن قبل قوي ولا تنصدمون بالمحاكم والقضاه ترى ايامنا كانت عادله وزينه وانا ادري انتوا تشوفون الكرة وتقولون ليش نا عندنا منتخب... ترى كان عندنا قبل منتخب ووصل لكاس العالم وكان كاس الخليج مايطلع من الكويت واهز منتخبات كبيرة واخذ كاس اسيا بس عقب ظهر رجل في مكان عام وصرخ وقال (تبون كاس اسيا) ومن عقبها ماشفنا شي بس ايامنا كانوا اللي ماسكين الرياضه ينشد فيهم الظهر وليكون حسبالكم ماعندنا وزرا مثل الاوادم... لا بالعكس كان عندنا كفاءات ورجال يشهد لها التاريخ بس ووين اللي يبيهم وكان عندنا تنظيم مرور وخطط وماكو زحمه والناس اللي تسوق كانت سنعه وما كنا نقدر نغازل ونرقم البنات ... تدرون ليش لان هذي تصير لفلان رفيجي وهذي نعرف اهلها وهذي من اهلنا وكان المغازل مو بالغصب مو مثل الحين لا حشيمه ولا كرامه وقبل كان عندنا شيوخ ..... وكانوا الشيوخ أبخص... ونسيت لا اقولكم ... كنا نسافر قبل على شي اسمه الخطوط الجويه الكويتيه ههههه عاد مادري موجوده عندكم ولا إنقرضت ويا عيالي أنا خاش لكم بالتجوري أغاني نظفوا أذونكم فيها من وقل لي وقت ... هذيله مغنيين كويتييت اسمهم (شادي وسناء وعبدالكويم والمهنا والفضاله والمسباح والدوخي وغيرهم) وحطيت لكم مسلسلات حلوه من احسن الممثلين الكويتيين ادري يبا مليتوا من الفنانه القديرة (شوجي) تري الكويت كانت درة وحلوه صدقوني لوما النصيب والناس اللي ما تحمد ربها وتطمع ولوما الضعف بالحكم وعدم مخافه الله في هالبلد وتقديم المصالح الخاصه على العامه جان صرنا بخير ولو مستفيدين من درس الغزو حكاما ومحكومين جان ماصار هذا حالنا اللي مسؤول عن اللي صارتله البلد مو شخص ولا اثنين ॥ كلنا مسؤولين يا عيالي فلا تلومون احد وابدوا حياتكم من يديد واخيرا اكتب لكم هذي الرساله عشان بس تفتخرون بديرتكم وماضيكم مثل ما الإيرانيين يفتخرون بالفرس والعراقيين يفتخرون في بابل والرافدين والمصريين بالفراعنه والغرب في روما والمسلمين بالاندلس افتخروا انتم ماضيكم جميل ومن له ماضي اصيل ,,, له مستقبل واعد فلا تحزنوا وصيروا أحسن من ابوكم ... ابوكم ما سوى شي لكم ... انتوا سووا شي لعيالكم

هناك تعليقان (2):

مـغـاتيــــــــــــر يقول...

كل ما قلته واقع

لكن

التطور للأحسن قادم "غصب طيب قادم" ،
المجهول هو التوقيت و كمية الخسائر


أتمنى إني ما أقول لأحفادي
"لقد هـــرمنــا ،، من أجل هذه اللحظة التاريخية"

alala يقول...

ان شاء الله القادم أجمل ... كلامك كله صحيح و بالصميم بس ما ودي يكون هذا واقعنا و حالنا ... ابي اصدق انها مرحلة و كبوة !!!