آسف !

الناس خيبتها السبت والحد. وانا خيبتي موردتش على حد
الله يسامح من كان السبب في خيبتي الكبيرة . خيبتي المؤلمة.
الالم والحسرة والندامة هم اصدقائي منذ سنة الى يومنا هذا ويبدو لي انهم بظلون معاي ثلاث سنين بعد
ربي لا تطول الشدة ربي تفرجها من عندك يا رب
اتعس شي على البني ادم ان كل يوم يقوم الصبح ويشوف غلطته اللي ارتكبها يرجع يحس بالم وحسرة وندامة
حسرتي على عمري اني ومثل ما قال ملك الفن الحضرمي بو بكر (انا سبب نفسي بنفسي. جبت صبعي صوب عيني ) وشكله هالحسرة بتظل تلاحقني لعنتها لين اموت
اسف .. وبعتذر للجميع واولهم ديرتي حبيبتي الكويت.. ادري غلطتي لا تغتفر.. وستكتب بالتاريخ..
بل إني أعتقد اني لو بايق من الديرة جود أحسن لي من اللي سويتة.. على الاقل لا بقت يمكن بستفيد وسعر النفط يزيد وتسد مكان بوقتي..
او جان صادوني وحاكموني وضميري إرتاح.. لكن اللي سويتة ماله غفارية..
لو إني كاسر القانون جان مستفيد او عاقبوني وأكون قد اخذت جزائي... لكني للأسف الجريمة اللي سويتها لا اقدر استفيد منها ولا اقدر اتحاكم عليها.. مع إني ودي اكفر عن ذنبي والله بي إلا هالذنب ماله كفارة ولا غفارة
ماله إلا الزمن والتاريخ والكويت تسامحني بطيبها ومنّه منها علي ... غيره ماكو فايدة بعيش ندمان وبموت ندمان..

آسف يا هلى... آسف يا ديرتي.. آسف يا تاريخ..

غلطتي إني عطيت هذي صوتي

آسف يا دكتورة سلوى ولا تفهميني غلط فأنا لا اكيل بمكيالين ولا أُسيس السياسة

فمكانك ليس في قبة عبدالله السالم

وأخيرا لم يبقى لدينا من النساء إلا أسيل ... اللهم ثبتها اللهم ثبتها اللهم ثبتها