كويتيون مشردون

صديق قديم أكبر مني بعشرسنين.. مهاجر إلى أمريكا سعيا للإستقرار بعد ان افشلت الكويت (على قولتة) كل محاولاتة للإستقرار
صاحبنا إلتقيت فية في (غبقة) عند واحد من الشباب القدامى.. وبعد السلام والترحيب سألتة عن سبب زيارتة للكويت وشنو سوى خلال خمس سنين في امريكا !!

وياريتني ما سالت ...
قعد يشرحلي انة سافر مع زوجتة وعيالة من خمس سنين إلى كاليفورنيا.. وكان معاة مبلغ يمعة كان ناوي يشتريلة بيت بالكويت ولكن لان البيوت نار وشرار .. ولأن البيت هو قبر الدنيا وهو الإستقرار وهو السكينه وهو اول ما يبحث عنة الإنسان منذ آدم وحواء
ولانة عيز من الكدح وما في بوادر أمل .. قرر يصرف المبلغ في امريكا ويبدأ حياتة

يقول صاحبنا.. رحت وسكنت في شقة وبعد ما اشتغلت وضمنت معاش دائم اخذت فلوسي وحطيتها وديعة (على فكرة فلوسة كانت 80000 دينار كويتي) تحويشة العمر
واخذ قرضين من البنك بضمان وديعتة ومعاشة وراح اشترالة محطة بانزين (يالله من فضلك) على تقاطع وبعدين أخذلة بيت يطل على بحيرة عند اول الجبل ( الله يهنية يا رب)

يقول صاحبنا بيتي 1000 متر باني 300 متر والباجي حديقة وحمام سباحة وملعب سلة !!
ويقول ايضا ان بيتة يطل على جبل أخضر حلو من صوب الشمال
وعلى سهل نهايتة بحيرة صغيرة

والعجيب بالامر انة يقولي ..( أتصدق راحدت الحساسية من ايدي وولدي ما قمت اشوفة يكح من الربو) الجو هناك غير

انتهى الحديث ولا ابي اقول عن عيشتة الحلوة هناك عشان محد يحسدة..
استأذنته بان اقول قصتة وقالي على قولتة (شوووور قو أهد)

خل اقولكم على قصتي انا ..
انا متزوج وصارلي 4 اسنين ونص والحمد لله
اشتغل شغلتين وحدة دوام رسمي والثانية اطقطق فيها لعل وعسى ان يزيد الدخل..
من سكان ضاحية عبد الله السالم ... قبل الزواج..
ومن سكان العديلية ... أجار ... حاليا

من اول يوم زواج وانا اقضب الآله الحاسبة وأكسر حساباتي وحسابات القروض اللي باخذها عشان اسكن في بيت يطل على محول كهربا قد ينفجر في اي لحظة لان حكومتنا رشيدة !!
وارتداد البيت يخليك كل يوم يا داعم جارك يا اهو داعمك والسبة الضيج
بيت مساحتة على الاقل 375 متر... مو فشخرة بس لان السبعين الف ما تنعطى لاقل من هذي المساحة !!
يعني الحكومة تبي ترهي علينا بالمساحة جزاها الله خير وفي نفس الوقت تبي توهقنا بالسبعين الف
البيت شارع واحد لا سكه ولا زاوية ولا إرتداد .. تسمع سيفون جارك لا يرّة .. من كثر ما انت من الضيج دريشة دارك عند حمّامه !
وعلى فكرة انا مابيه بمسقط راسي بالضاحية .. ولا حتى افكر في الفيحا.. والعديلية حلوة وعشت فيها واهلها وزنهم ذهب لكن غالية
والسرة وقرطبة ضيج وعيج ولكن بالنسبة لي غالية.. اروح لجنوب السرة والاقي بر جوووول سعر ال 400 متر فية 230 الف !!
يا ساتر
وين اروح قررت ابحث في مناطق جنوب مشرف وضواحيها لقيتها العن !!
قررت ابعد شوي واغير البيئة بالمرة (صدقوني البيت اهم من البيئة) لقيت بيوت واراضي سعرها 250 و220 و200 باقل تقدير !!

من وين بيب فلوس؟؟
لو شغلي الخاص مشى صح راح اطلعلي بعد 10 سنسين 60000
ويبيلي ايمع من معاشي على الاقل 500 دينار لمدة عشر سنين يطلع المبلغ 60000
وآخذ من البنك 60000
وابني بالسبعين الف !!
واعيش قبل لا اسكن عيشتا ضنكا وبعد لا اسكن غرقان بالديون..
لا يا حبيبي لن استسلم لقدر حكومة غبية لا تعرف كيف تخطط لشعبها او كيف تحارب غلاء اسعار الاراضي او كيف تفكر بحلول سريعة
مسكت الاله الحاسبة لتغير حياتي من جديد وكان يوم اسود يوم ما مسكتها !!
بحسبة بسيطر جدا

انا اجاري 450 بالشهر.. يعني 5400 بالسنة
لو الله يعطيني عمر وعشت ستين سنة من اليوم يعني يصير عمري فوق التسعين
450 بالشهر
5400 بالسنة
324000 بالستين سنة
يعني ثمن بيت صغير شارع واحد داخلي في كيفان او الفيحا

ولحد يقول الاجار يزيد كل خمس سنين!!
ما عندي مانع طالما الزيادة بالمعقول وكل خمس سنين اغير الحسبة وانقص سنين عمري عشرين سنة تطلع النتيجة نفسها تقريبا لو عشت بالاجار 40 سنة من اليوم

بس بقت مشكلة واحد فقط .... هي هل بخليني صاحب البيت اللي انا امأجر عنة اقعد ستين سنة؟؟
طبعا لا !!
فالضريبة هي اني راح اتنقل كل اربع او خمس سنين بين مناطق الكويت واصبح متشردا في بلدي

فيا معشر الشباب الهائم في ملكوت الله والحاير شسوي بفلوسة .. انا اقول اصرف اللي خاشة في شغل او وناسة
وارهي على بيتك وأم اعيالك وعلى نفسك
وهالله هالله بالطخومة الطيبة من الفارس ..ترى تستاهل ام العيال لانها بتشيل فكرة البيت من مخها ويروح وراك من غار لي غار
فثمن السكوت كل نقلة هي سيارة او طخم او سفرة سنعة تشق الجيس فيها
وال300-350 الف عليك عليك فإدفعها بالاقساط المريحة وعيش ملك ولا تدفعهم مرة وحدة وتعيش منتف (وهمسة في إذن الرجل) حتى لو حطيت البيت ممكن إذا طاف سنتين بس من الجفاف المادي بتنى كل هذا وبتقولك انت ما تصرف !!

ثمن بيت بالجنة وايد ارخص واحسن من ثمن بيت بالكويت !!

حسبي الله على من جعل شباب الكويت مشرد










آخر الكلام :
إذا إحنا بيوتنا 300 وفوق ومدارس إعيالنا بفلوس لتردي المدارس الحكومية المستشفيات خاصة لتردي الحكومية.. ونبي نسافر ونبي نلبس ونبي سياير ... ومعاشنا يقحّف اخر الشهر وعيدنا الوطني 28 فبراير ليش إنة اقل الاشهر ايام والمعاش ينزل بسرعة
كل هذا وما طالبنا بإسقاط القروض

عيل اللي عايشين ببيوت اغلاها 230 وعلى المدارس الحكومية والمستشفيات الحكومية والسفرة ما قل ندر والسياير .. فورد وكامري ... بالله هذيلة شعلية بيون يسقطون القروض !