تكفين ردي !!

اكتب اليوم لج...

لج إنتي يا حبيبتي ويا سر حياتي ووجودي...

يمكن ما تدرين إني انا أهو انا صاحب هالمدونة... لكن انا متأكد إنج لا قريتي كلامي بتعرفيني وبتذكرين كل كلمة

ليش إن اللي بيننا ماصار حق احد ...

أكيد بتعرفين أنا منو.. وبتعرفين بعد إني أقصدج..

وسامحيني ماني قادر أوصلج عشان أقولج اللي فقلبي وما لقيت غير المدونة أكتب فيها لعل وعسى تكونين تقرينها وتستجيبين لي

حبيبتي ... بذكرج فيني وبحبنا الاولي وشلون تلاقينا من ثلاثين سنة

حبيبتي ... منذ ايام الطفولة.. من وعيت وعرفت اللي حولي .. عرفتج..

ربينا مع بعض .. عشت الطفوله كلها بحبج.. اصلا ربيت على حبج..

وكنت اقول حق أمي .. يمه انا احبها ..وأمي تضحك وتقول يا حبيبي كلنا نحبها.. كان قصد امي غير وقصدي انا غير
كان قصدي إني احبج مو مثلهم... إني أحبج غير
وكنت ادري إن حبي لج صعب .. نوعي هادي وما اقول اللي في قلبي.. بس كنت احب.. أحب بصمت
ومن غير أمل... ليش إن كان الكل حولج ويحبج ومايتغنون إلا بسمج.. بس والله كنت أحبج من يوم كنت ياهل
وربي إستجاب لي لما كبرت شوي
وكانت المفاجأة إنج لمحتيلي إنج هم تحبيني مثل ما أحبيج
اللـــــــه يومها ما نمت من الفرحة..
تبين أذكرج بهاليوم؟؟
يوم طحتي وإنجرحتي مثل هالحزة من ذيج السنة .. وسال دمج .. ما قدرت اصبر .. قلتلج أحبج.. وعلى طول قلتيتي هم أنا احبك
يومها بجيت من حبي لج وإنتي دموعج تبجين على طيحتج
وبعد ما برى الجرح صرنا إنتواعد بين الناس وبالعلن اطالعج من بعيد وتبتسمين لي بسمه الامل والحب من بعيد

ها عرفتيني؟؟
ولا تبين بعد أذكرج..؟؟
أذكرج يوم كنت اسولف معاج بدرب الشالية وتوعديني إنج لي واوعدج أفديج بعمري كله
وتوعديني بمستقبل حلو واوعدج إني اوفيلج العمر
سوالفنا حلوة

شكلج ما ذكرتي..
خليني أذكرج بعد شوي..
تذكرين يوم تواعدنا في جامعة العديلية لما قتلج شكلي مو ماشي بالدراسة وبسافر
يومها غصبٍ علي سافرت... كله من ابوي الله يسامحة صمم إني ادرس برة
وقلتيلي روح يا حبيبي مستقبلك أهم
وسافرت وصورتج في شقتي بالغربة إمكبرها على كبر طوفه دار نومي
ومكالماتي كلها اسأل عن أخبارج
تذكرين يوم رديت من غربتي بعد خمس سنين
يوم كنتي بالمطار تنطرين
اسلم على ربعي واشوفج من بعيد تبتسمين
وألم ربعي حيل واقصد باللمة إنتي .. وانا اطالعج من بعيد واركب السيارة رايح البيت وطول الطريج وانتي حولي لين اوصل البيت .. اصعد حق امي اسلم عليها وأنزل على طول اركب سيارتي واتمشي انا بسيارتي وإنتي وراي ويمي وجدامي اسولف معاج واشوف شصار بغيابي وشنهو الشي اليديد. لين ادوخ وارد البيت

حبيبتي تدرين وأنا اكتب الحين قلبي خفق مثل ما خفق يوم قلتي إنج تحبين وإن حبيبج انا وإن لو شيصير ما تفارقين
يا حلو ذيج الايام

وكبرت وإشتغلت عشان اوفي بوعدي لج

ذكرتيني ولا ليلحين؟
ذكرتي يوم فراقنا؟؟ يوم مات ابوج؟ وقلتلج بترجعين؟؟
قلتي ما ادري بسافر وما ادري متى برد!!
من يومها وانا ناطرج لكن للاسف ما تردين
لا حس ولا خبر وصار لي اليوم اكثر من اربع اسنين

اسال الناس عنج يقولون ما راح ترد
واسال الناس عنج يقولون يمكن ترد
واسال الناس عنج يقولون اكيد بترد
وما ادري اي ناس اصدق

على فكرة تزوجت .. كله من أمي حنت علي .. تقول تبي تشوف ذريتي
وتزوجت ويبت بنتين مثل القمر وامهم هي شمسي والنجوم
لكن تظلين إنتي السما اللي فيها القمر والشمس
تضلين إنتي الهوى اللي بلياة ما نعيش

من رحتي كل شي تغير
الناس ماهي مثل الأول.. وأنا صرت حزين أدور عليج .. وعلى فكرة مو بس أنا .. الكل مثلي يدور
ردي .... مكانج عوووود .. حزن في حزن صارت حياتي
عرفتي منو إنتي ومنو انا ؟؟
سمعي أخبارنا الحين.... جود علينا تحنين .. ويمكن يا الحبيبة تردين
فريجنا تغير.. اسامي غير .. اشكال غير.. حجي غير
شيبانا ماتوا او شبه ميتين.. يشوفون وما يتكلمون وجنة الوضع عاجبهم او مالهم خلق يسنعون
اهلنا صاروا ذيابة تنهش من يجن الليل
اللي مسافر وهايت ومخلي القرعه ترعى
واللي كل همة البيزة ايمعها ويحكم بشرعه
بإختصار يا الغالية رحتي وكل الخير صار بعيد
بإختصار الحال إنقلب فوق تحت

وبإختصار ردي بسرعه....... ولا قوليلي وين صرتي ...وأنا مستعد اسافرلج يا كويت !!
وإن كنتي زعلانة علي ولا صاير شي .. ردي يا معودة.. لو مو عشاني .. ردي تكفين عشان إعيالي
يا كويت وين صرتي ... عيزنا نكتب .. نقول .. نسوي .. نحارب كثر ما نقدر.. وساعات نسكت عشان ما نزيد النار حطب .. وينفهم سكوتنا غلط.. بس ما علية .. عشانج كل شي يهون..
أذونا ولعبوا في بيتج... وأنا وربعي وأهلي شوية .. ما نقدر عليهم..
ترى محد يقدر عليهم إلا إنتي !
يا كويت يا حبيبتي لا يمكن اتخيل حياتي من غيرج .. ولا يمكن أتأقلم مع الوضع الحالي


الرحمة ...................اريد وطني !!